വികസിത രാഷ്ട്രമാകാനുള്ള ഇന്ത്യയുടെ യാത്ര കൃഷിയിടങ്ങളിലൂടെയും ഗ്രാമങ്ങളിലൂടെയും കടന്നുപോകുന്നതാണെന്ന് ലോക്സഭാ സ്പീക്കർ ഓം ബിർള പറഞ്ഞു. സുസ്ഥിര കൃഷി, നവീകരണം, ഗവേഷണം എന്നിവയാണ് വികസിത ഭാരതം ലക്ഷ്യമിടുന്ന മുന്നേറ്റത്തിന്റെ അടിത്തറയെന്നും അദ്ദേഹം വ്യക്തമാക്കി. ന്യൂഡൽഹിയിൽ നടന്ന രണ്ടുദിവസത്തെ ദേശീയ സമ്മേളനത്തിന്റെ ഉദ്ഘാടന സമ്മേളനത്തിൽ സംസാരിക്കവെയായിരുന്നു അദ്ദേഹത്തിന്റെ പരാമർശം.

അഖില ഭാരതീയ ദേശീയ ശൈക്ഷിക മഹാസംഘം, ഇന്ത്യൻ കാർഷിക ഗവേഷണ കൗൺസിൽ, കാർഷിക-കർഷക ക്ഷേമ മന്ത്രാലയം എന്നിവയുടെ സഹകരണത്തോടെയാണ് സമ്മേളനം സംഘടിപ്പിച്ചത്. കാലാവസ്ഥാ വ്യതിയാനവും ആഗോള മാറ്റങ്ങളും ഉയർത്തുന്ന വെല്ലുവിളികളെ നേരിടാൻ ശാസ്ത്രാധിഷ്ഠിതവും ഗവേഷണ പിന്തുണയുള്ളതുമായ കൃഷിരീതികൾ ആവശ്യമാണെന്ന് അദ്ദേഹം പറഞ്ഞു. പരമ്പരാഗത അറിവും ആധുനിക സാങ്കേതികവിദ്യയും ചേർന്നാൽ ഇന്ത്യ ആഗോള കാർഷിക രംഗത്ത് മുൻനിരയിലെത്തുമെന്നും അദ്ദേഹം അഭിപ്രായപ്പെട്ടു.

കൃഷി ഇന്ത്യയിൽ ഒരു സാമ്പത്തിക മേഖലയെന്നതിലുപരി സംസ്കാരത്തിന്റെയും ജീവിതരീതിയുടെയും ഭാഗമാണെന്നും ഓം ബിർള പറഞ്ഞു. കാർഷിക സർവകലാശാലകൾ, ഗവേഷണ സ്ഥാപനങ്ങൾ, ശാസ്ത്രജ്ഞർ, നവീന ആശയങ്ങൾ മുന്നോട്ടുവയ്ക്കുന്നവർ എന്നിവരാണ് രാജ്യത്തിന്റെ കാർഷിക ഭാവിയുടെ പ്രധാന തൂണുകളെന്നും അദ്ദേഹം ചൂണ്ടിക്കാട്ടി. ജലസംരക്ഷണം, സൂക്ഷ്മ ജലസേചനം, മണ്ണിന്റെ ആരോഗ്യസംരക്ഷണം, മികച്ച വിത്തുകൾ, കാലാവസ്ഥയെ അതിജീവിക്കുന്ന വിളവർഗങ്ങൾ എന്നിവയുടെ പ്രാധാന്യവും അദ്ദേഹം എടുത്തുപറഞ്ഞു. യുവജനങ്ങളുടെ ഊർജവും വനിതകളുടെ നേതൃത്വവും ഗ്രാമതല നവീകരണങ്ങളും ഗ്രാമീണ സമ്പദ്‌വ്യവസ്ഥയ്ക്ക് ശക്തി പകരുമെന്നും അദ്ദേഹം പറഞ്ഞു.