കൊച്ചി, 2026 ജൂൺ 13 –
കൊച്ചിയിലെ ചേരാനെല്ലൂരിൽ വാടകയ്ക്ക് എടുത്ത വീട്ടിൽ ഏഴ് ഇതര സംസ്ഥാനക്കാരെ കെട്ടിയിട്ട് തടങ്കലിൽ പാർപ്പിച്ച് ഭീഷണിപ്പെടുത്തിയ സംഭവത്തിൽ കൂടുതൽ വിവരങ്ങൾ പുറത്തുവന്നു. ആറു ദിവസത്തോളം ഇവരെ തടങ്കലിൽ പാർപ്പിച്ചിരുന്നുവെന്നാണ് വിവരം. തട്ടിപ്പ് സംഘം പുറത്തുപോയ സമയത്താണ് ഒരാൾ രക്ഷപ്പെട്ട് വീടിന് പുറത്തേക്ക് ഓടിയത്. നാട്ടുകാർ വിവരം അറിയിച്ചതിനെ തുടർന്ന് പൊലീസ് എത്തി ഏഴ് പേരെയും രക്ഷപ്പെടുത്തി.
സംഭവവുമായി ബന്ധപ്പെട്ട് പശ്ചിമ ബംഗാൾ സ്വദേശി അബ്ദുൾ റഹീമിനെ പൊലീസ് അറസ്റ്റ് ചെയ്തു. ഒരാൾ നിലവിളിച്ചുകൊണ്ട് രക്ഷിക്കണമെന്ന് പറഞ്ഞ് ഓടിയെത്തിയതായി ദൃക്സാക്ഷി പറഞ്ഞു. ഏഴ് പേരെയും വീട്ടിൽ കെട്ടിയിട്ടിരുന്നുവെന്നും തോക്ക് ചൂണ്ടി ഭീഷണിപ്പെടുത്തിയെന്നുമാണ് രക്ഷപ്പെട്ടയാൾ പറഞ്ഞത്. കാനഡയിൽ ജോലി വാഗ്ദാനം ചെയ്ത് 30 ലക്ഷം രൂപ വാങ്ങിയ ശേഷം വിസ നൽകാതെ ഇവരെ വാടകവീട്ടിൽ തടങ്കലിൽ പാർപ്പിക്കുകയായിരുന്നു. കുടുംബങ്ങൾക്ക് സംശയം തോന്നാതിരിക്കാൻ കാനഡയിലാണെന്ന് തോന്നുന്ന രീതിയിൽ വീഡിയോ കോൾ നടത്തുകയും ചെയ്തു.
ഹരിയാന, പഞ്ചാബ്, മധ്യപ്രദേശ്, കർണാടക സംസ്ഥാനങ്ങളിൽ നിന്നുള്ളവരാണ് ഇരകൾ. അയൽവാസികൾക്ക് സംശയം തോന്നാതിരിക്കാൻ പ്രതികൾ സൗഹൃദപരമായാണ് പെരുമാറിയതെന്ന് ദൃക്സാക്ഷി പറഞ്ഞു. ഇരകൾ രക്ഷപ്പെട്ട വിവരം അറിഞ്ഞതോടെ മറ്റ് പ്രതികൾ പണവും മറ്റ് സാധനങ്ങളുമായി മുങ്ങി. സംഘത്തിൽ മലയാളിയുമുണ്ടെന്ന സംശയമുണ്ട്. റഹീമിന്റെ പക്കൽ നിന്ന് തടവിലാക്കപ്പെട്ടവരുടെ ഫോണുകളും പാസ്പോർട്ടും ഒരു ലക്ഷത്തോളം രൂപയും പൊലീസ് കണ്ടെടുത്തു. മറ്റ് പ്രതികൾക്കായുള്ള അന്വേഷണം പൊലീസ് ഊർജിതമാക്കിയിട്ടുണ്ട്.
