പിലാത്തറ കവർച്ചക്കേസ്: കാറും സ്വർണവും തട്ടിയെടുത്ത സംഭവത്തിൽ ഒരാൾ അറസ്റ്റിൽ

കണ്ണൂർ, 2026 ജൂൺ 13 –

കണ്ണൂർ പിലാത്തറയിൽ മഹാരാഷ്ട്ര സ്വദേശികൾ സഞ്ചരിച്ച കാർ ആക്രമിച്ച് സ്വർണവും പണവും കവർന്ന കേസിൽ ഒരാൾ അറസ്റ്റിലായി. കണ്ണൂർ അഞ്ചാംപീടിക സ്വദേശി സനു സന്തോഷ് (42) ആണ് പിടിയിലായത്. കാസർകോട് അതിർത്തിയിലെ ഉപ്പളയിൽ നിന്നാണ് പ്രതിയെ പൊലീസ് അറസ്റ്റ് ചെയ്തത്. പ്രതികൾ ഉപയോഗിച്ച രണ്ട് വാഹനങ്ങളും പൊലീസ് കസ്റ്റഡിയിലെടുത്തിട്ടുണ്ട്.

ബിജെപി പ്രാദേശിക നേതാവായ സനു സന്തോഷിനെ അറസ്റ്റ് രേഖപ്പെടുത്തിയ ശേഷം കോടതിയിൽ ഹാജരാക്കി റിമാൻഡ് ചെയ്തു. കേസിലെ മറ്റ് പ്രതികൾക്കായുള്ള അന്വേഷണം ഊർജിതമാക്കിയതായി പൊലീസ് അറിയിച്ചു. ഈ മാസം രണ്ടിനാണ് മഹാരാഷ്ട്ര സ്വദേശികൾ സഞ്ചരിച്ച കാർ തടഞ്ഞുനിർത്തി ആക്രമിച്ച് രഹസ്യ അറയിൽ സൂക്ഷിച്ചിരുന്ന സ്വർണവും 55 ലക്ഷം രൂപയും കവർന്നതെന്നാണ് കേസ്.

മഹാരാഷ്ട്ര സ്വദേശി കുമാർ ജലന്ധർ നിഗമിന്റെ പരാതിയിലാണ് പൊലീസ് കേസെടുത്തത്. കാർ തടഞ്ഞുവെച്ച് ആക്രമിച്ചെന്നും ഭാര്യയുടെ ബാഗിലുണ്ടായിരുന്ന 25 ഗ്രാം സ്വർണം നഷ്ടമായെന്നുമാണ് പരാതിയിൽ പറയുന്നത്. ഭാരതീയ ന്യായ സംഹിതയിലെ 310-ാം വകുപ്പ് പ്രകാരമാണ് കേസ് രജിസ്റ്റർ ചെയ്തത്. സംഭവത്തിന് പിന്നാലെ പിലാത്തറ കോ-ഓപ്പറേറ്റീവ് കോളേജിന് സമീപത്ത് ഉപേക്ഷിക്കപ്പെട്ട നിലയിൽ കാർ കണ്ടെത്തിയിരുന്നു. കാറിനുള്ളിലെ വസ്ത്രങ്ങൾ വലിച്ചെറിഞ്ഞ നിലയിലായിരുന്നുവെന്നും കോളേജിലെ സെക്യൂരിറ്റി ജീവനക്കാരനാണ് ആദ്യം ഇത് ശ്രദ്ധിച്ച് പരിയാരം പൊലീസിനെ വിവരമറിയിച്ചതെന്നും റിപ്പോർട്ടിലുണ്ട്.