ന്യൂഡൽഹി, 2026 ജൂൺ 11 –

ഹോമിയോപതിയെയും രജിസ്റ്റർ ചെയ്ത ഹോമിയോപതി ചികിത്സകരെയും കുറിച്ച് ഉത്തരവാദിത്തത്തോടെയും സ്ഥിരീകരിച്ച വിവരങ്ങളുടെ അടിസ്ഥാനത്തിലുമാത്രം പൊതുപ്രസ്താവനകൾ നടത്തണമെന്ന് ദേശീയ ഹോമിയോപതി കമ്മീഷൻ നിർദേശിച്ചു. ജൂൺ എട്ടിന് പുറത്തിറക്കിയ സർക്കുലറിന്റെ അടിസ്ഥാനത്തിൽ കമ്മീഷൻ ഈ നിർദേശം നൽകിയതായി ചെയർമാൻ ഡോക്ടർ താർകേശ്വർ ജെയിൻ അറിയിച്ചു. അച്ചടി, ദൃശ്യ, ഡിജിറ്റൽ, സാമൂഹിക മാധ്യമങ്ങളിലൂടെ പ്രചരിക്കുന്ന തെറ്റായതും സ്ഥിരീകരിക്കാത്തതുമായ പ്രസ്താവനകളെ തുടർന്നാണ് നടപടി.

ഹോമിയോപതി നിയമപരമായി അംഗീകരിക്കപ്പെട്ട ചികിത്സാരീതിയാണെന്നും അതുമായി ബന്ധപ്പെട്ട മരുന്നുകൾ നിലവിലുള്ള നിയമങ്ങളുടെ പരിധിയിൽ നിയന്ത്രിക്കപ്പെടുന്നതാണെന്നും കമ്മീഷൻ വ്യക്തമാക്കി. ഹോമിയോപതിയിലെ ബിരുദ, ബിരുദാനന്തര പഠനങ്ങൾ കമ്മീഷൻ നിശ്ചയിച്ച അക്കാദമിക് ചട്ടക്കൂടിനുള്ളിൽ നടക്കുന്നതായും യോഗ്യത നേടിയ വിദ്യാർഥികളാണ് പ്രവേശനം നേടുന്നതെന്നും അറിയിച്ചു. സ്ഥാപനങ്ങൾ, പ്രൊഫഷണൽ സംഘടനകൾ, ആരോഗ്യ സ്ഥാപനങ്ങൾ, മാധ്യമങ്ങൾ, സാമൂഹിക മാധ്യമ ഉപയോക്താക്കൾ എന്നിവർ വസ്തുതാപരമായ കൃത്യത ഉറപ്പാക്കിയ ശേഷമേ പ്രസ്താവനകൾ നടത്താവൂ എന്നും കമ്മീഷൻ ആവശ്യപ്പെട്ടു.

ദേശീയ ഹോമിയോപതി കമ്മീഷൻ വിദ്യാഭ്യാസം, ചികിത്സാ പ്രവർത്തനം, തൊഴിൽധാർമികത എന്നിവയുടെ നിലവാരം സംരക്ഷിക്കുന്നതിനാണ് പ്രവർത്തിക്കുന്നത്. ഏതെങ്കിലും ചികിത്സകനെതിരായ പരാതികളോ ആരോപണങ്ങളോ ഉണ്ടെങ്കിൽ നിയമപരവും നിയന്ത്രണപരവും അച്ചടക്കപരവും നീതിന്യായപരവുമായ സംവിധാനങ്ങളിലൂടെ പരിഹരിക്കണമെന്നാണ് നിർദേശം. അടിസ്ഥാനരഹിതവും തെറ്റിദ്ധരിപ്പിക്കുന്നതുമായ അപകീർത്തികരമായ പ്രചാരണങ്ങൾ മനപ്പൂർവം നടത്തുന്നവർക്കെതിരെ ആവശ്യമായ നിയമനടപടികൾ ഉൾപ്പെടെ സ്വീകരിക്കുമെന്നും കമ്മീഷൻ അറിയിച്ചു.