തിരുവനന്തപുരം, 2026 ജൂൺ 4 –

സംസ്ഥാന സർക്കാരിന്റെ ധവളപത്രം നിയമസഭയുടെ മേശപ്പുറത്ത് വച്ചതിന് പിന്നാലെ സഭയിൽ കടുത്ത വാക്പോര് അരങ്ങേറി. മുൻകാല ധവളപത്രങ്ങൾ രാഷ്ട്രീയ രേഖകളായിരുന്നുവെന്ന മുഖ്യമന്ത്രി വി.ഡി. സതീശന്റെ പരാമർശത്തെ തുടർന്നാണ് മുഖ്യമന്ത്രിയും പ്രതിപക്ഷ നേതാവ് പിണറായി വിജയനും തമ്മിൽ തർക്കം ഉയർന്നത്.

ധവളപത്രം ധനവകുപ്പ് തയ്യാറാക്കിയതല്ലെന്നും ഇത് ഒരു രാഷ്ട്രീയ രേഖയാണെന്നും പിണറായി വിജയൻ ആരോപിച്ചു. അതിന് മറുപടിയായി പ്രതിപക്ഷ നേതാവിന്റെ പ്രതികരണം രാഷ്ട്രീയ പ്രസ്താവന മാത്രമാണെന്ന് മുഖ്യമന്ത്രി സഭയിൽ പറഞ്ഞു. ധവളപത്രം വായിച്ചുപോലും നോക്കാതെയാണ് വിമർശനമെന്നും മുൻവിധിയോടെയാണ് പ്രതികരിക്കുന്നതെന്നും മുഖ്യമന്ത്രി കുറ്റപ്പെടുത്തി. ധവളപത്രം തയ്യാറാക്കാൻ ഔദ്യോഗിക രേഖകൾ പുറത്തുനൽകിയത് ക്രമവിരുദ്ധമാണെന്ന് മുൻ ധനമന്ത്രി കെ.എൻ. ബാലഗോപാലും വിയോജിപ്പ് പ്രകടിപ്പിച്ചിരുന്നു.

എന്നാൽ ബാലഗോപാലിന്റെ ആരോപണങ്ങൾ അടിസ്ഥാനരഹിതമാണെന്ന് മുഖ്യമന്ത്രി വ്യക്തമാക്കി. ഒരു രേഖയും പുറത്തുപോയിട്ടില്ലെന്നും ഉപയോഗിച്ച എല്ലാ രേഖകളും പൊതുമധ്യത്തിലുള്ളവയാണെന്നും അദ്ദേഹം പറഞ്ഞു. വകുപ്പ് ഉദ്യോഗസ്ഥരാണ് ധവളപത്രം തയ്യാറാക്കിയതെന്നും മന്ത്രിസഭ അത് അംഗീകരിച്ചിട്ടുണ്ടെന്നും മുഖ്യമന്ത്രി വ്യക്തമാക്കി. രഹസ്യ രേഖകളൊന്നും ഉപയോഗിച്ചിട്ടില്ലെന്നും ധനവകുപ്പിന്റെ നേതൃത്വത്തിലാണ് ധവളപത്രം തയ്യാറാക്കിയതെന്നും അദ്ദേഹം കൂട്ടിച്ചേർത്തു.