തിരുവനന്തപുരം, 2026 ജൂൺ 1 –

സ്കൂൾ വിദ്യാർഥിനികൾക്ക് പ്രതിമാസം മൂന്ന് ദിവസം വരെ ആർത്തവ അവധി നൽകാനുള്ള കേരള സർക്കാരിന്റെ പുതിയ പദ്ധതിക്കെതിരെ മുൻ പൊലീസ് മേധാവിയും ഭാരതീയ ജനതാ പാർട്ടി നേതാവുമായ ആർ ശ്രീലേഖ രംഗത്തെത്തി. സർക്കാരിന്റെ “ആർത്തവ മാന്യത പദ്ധതി”യെ വിമർശിച്ച് ശനിയാഴ്ച സമൂഹമാധ്യമത്തിൽ പങ്കുവെച്ച കുറിപ്പാണ് വലിയ പൊതുചർച്ചയ്ക്ക് വഴിവെച്ചത്. സ്വകാര്യതയും സ്ത്രീശാക്തീകരണവും സംബന്ധിച്ച ചർച്ചകളാണ് ഇതോടെ ശക്തമായത്.

പ്രത്യേക അവധി എടുക്കുന്നത് വിദ്യാർഥിനിയുടെ ആർത്തവ ചക്രം കുടുംബത്തിനും സ്കൂളിനും അയൽവാസികൾക്കും വരെ മനസിലാകാൻ ഇടയാക്കുമെന്നും ഇത് സ്വകാര്യത ലംഘിക്കുന്നതും അപമാനകരവുമാകാമെന്നും ശ്രീലേഖ പറഞ്ഞു. ഈ പദ്ധതി പെൺകുട്ടികളെ ശക്തരാക്കുന്നതാണോ അതോ കൂടുതൽ ദുർബലരായി കാണിക്കുന്നതാണോ എന്ന് അവർ ചോദിച്ചു. സ്കൂൾ കാലത്തും പൊലീസ് പരിശീലന സമയത്തും കടുത്ത വേദന ഉണ്ടായിരുന്നെങ്കിലും പഠനമോ ജോലിയോ മുടക്കിയിട്ടില്ലെന്നും അതാണ് സ്ത്രീകളുടെ യഥാർത്ഥ ശക്തിയെന്നും അവർ കുറിച്ചു. അവധിക്ക് പകരം സ്കൂളുകളിലും കോളജുകളിലും വൃത്തിയുള്ള ശൗചാലയങ്ങൾ, നാപ്കിൻ വിതരണ യന്ത്രങ്ങൾ, സൗജന്യ വേദനസംഹാരികൾ എന്നിവ ഒരുക്കണമെന്ന ആവശ്യവും ശ്രീലേഖ മുന്നോട്ടുവച്ചു. അതേസമയം ഗവർണർ രാജേന്ദ്ര ആർലേക്കർ നിയമസഭയിലെ നയപ്രഖ്യാപന പ്രസംഗത്തിലാണ് വിദ്യാർഥിനികൾക്ക് പ്രതിമാസ ആർത്തവ അവധി നൽകാനുള്ള നിർദേശം പ്രഖ്യാപിച്ചത്.

ശ്രീലേഖയുടെ പരാമർശങ്ങളെ യൂത്ത് കോൺഗ്രസ് സംസ്ഥാന ജനറൽ സെക്രട്ടറി ദുൽഖിഫിൽ വി.പി ശക്തമായി എതിർത്തു. ആർത്തവം സ്വാഭാവിക ജൈവപ്രക്രിയയാണെന്നും വിശ്രമം നൽകുന്നത് ആധുനിക ജനാധിപത്യ സമൂഹത്തിന്റെ ഉത്തരവാദിത്തമാണെന്നും അദ്ദേഹം പറഞ്ഞു. ശ്വാസോച്ഛ്വാസവും ദഹനവും പോലെ സ്വാഭാവികമായ ഒന്നിനെ മറച്ചുവെക്കേണ്ട ലജ്ജാകരമായ കാര്യമായി ചിത്രീകരിക്കുകയാണ് ശ്രീലേഖ ചെയ്തതെന്നും അദ്ദേഹം ആരോപിച്ചു. കടുത്ത വേദനയും അമിത രക്തസ്രാവവും മാനസിക ബുദ്ധിമുട്ടുകളും അനുഭവിക്കുന്ന ലക്ഷക്കണക്കിന് സ്ത്രീകൾക്ക് വിശ്രമം സഹതാപമല്ല, അടിസ്ഥാന അവകാശമാണെന്നും ദുൽഖിഫിൽ കൂട്ടിച്ചേർത്തു.