എല്ലാ പോലീസ് സ്റ്റേഷനുകളിലും നർകോട്ടിക് സെല്ലുകൾ വരുന്നു

കണ്ണൂർ | മേയ് 25

ലഹരി ഉപയോഗവും മയക്കുമരുന്ന് കടത്തും ശക്തമായി തടയുന്നതിനായി സംസ്ഥാനത്തെ എല്ലാ പൊലീസ് സ്റ്റേഷനുകളിലും നർകോട്ടിക് സെല്ലുകൾ ആരംഭിക്കാൻ ശിപാർശ. കേരള പൊലീസിന്റെ പുതിയ ലഹരിവിരുദ്ധ പദ്ധതിയായ ‘തൂഫാൻ ദി നർകോ ഹണ്ട്’ന്റെ ഭാഗമായാണ് ഈ നിർണായക നീക്കം.

ഇപ്പോൾ ഡിവൈഎസ്പിമാരുടെ നേതൃത്വത്തിൽ പൊലീസ് ആസ്ഥാനങ്ങൾ കേന്ദ്രീകരിച്ചായിരുന്നു നർകോട്ടിക് സെല്ലുകളുടെ പ്രവർത്തനം. എന്നാൽ ലഹരി വ്യാപനം ഗ്രാമങ്ങളിലേക്കും വിദ്യാഭ്യാസ സ്ഥാപനങ്ങളിലേക്കും വ്യാപകമായി എത്തുന്ന സാഹചര്യത്തിലാണ് സ്റ്റേഷൻതലത്തിലേക്ക് സംവിധാനം വ്യാപിപ്പിക്കാൻ തീരുമാനം.

മറ്റ് സംസ്ഥാനങ്ങളിൽ നിന്നാണ് പ്രധാനമായും സിന്തറ്റിക് മയക്കുമരുന്നുകൾ കേരളത്തിലേക്ക് എത്തുന്നതെന്നാണ് പൊലീസിന്റെ വിലയിരുത്തൽ. ഇത് തടയാൻ അതിർത്തി ചെക്ക്പോസ്റ്റുകളിൽ പ്രത്യേക നർകോട്ടിക് സ്ക്വാഡുകളെയും വിന്യസിക്കും. എക്സൈസും കേരള പൊലീസും ചേർന്നായിരിക്കും ഈ സ്ക്വാഡുകളുടെ പ്രവർത്തനം.

സ്കൂളുകളിൽ സ്റ്റുഡന്റ്സ് പൊലീസ് കേഡറ്റ് (SPC) സംവിധാനത്തിന്റെയും കോളജുകളിൽ എൻസിസിയുടെയും നേതൃത്വത്തിൽ ലഹരി ഉപയോഗം കണ്ടെത്താൻ പ്രത്യേക നിരീക്ഷണ സംഘങ്ങളെ നിയോഗിക്കാനും ആലോചനയുണ്ട്. വിദ്യാർത്ഥികൾക്കിടയിലെ ലഹരി ഉപയോഗം നേരത്തെ കണ്ടെത്തി തടയുക എന്നതാണ് ഇതിന്റെ പ്രധാന ലക്ഷ്യം.

നർകോട്ടിക് സെല്ലിന് കീഴിൽ പ്രവർത്തിക്കുന്ന ഡാൻസാഫ് ടീമുകളും കൂടുതൽ ശക്തിപ്പെടുത്തും. അംഗങ്ങളുടെ എണ്ണം വർധിപ്പിക്കുന്നതോടൊപ്പം മയക്കുമരുന്ന് വേട്ടയ്ക്കായി പ്രത്യേക പരിശീലനവും നൽകും. 24 മണിക്കൂറും ഇവരുടെ സേവനം ലഭ്യമാക്കാനാണ് പൊലീസ് നീക്കം.

സംസ്ഥാനത്ത് ലഹരി കേസുകൾ വർധിക്കുകയും സ്കൂൾ-കോളജ് വിദ്യാർത്ഥികളിലേക്ക് മയക്കുമരുന്ന് വ്യാപനം കടക്കുകയും ചെയ്യുന്ന സാഹചര്യത്തിലാണ് സർക്കാർ-പോലീസ് തലത്തിൽ ശക്തമായ നടപടികൾ ആരംഭിച്ചിരിക്കുന്നത്.