വൈറ്റ് ഹൗസിന് സമീപം വെടിവയ്പ്: ആക്രമിയെ സുരക്ഷാസേന വെടിവെച്ച് കൊന്നു

വാഷിംഗ്ടൺ ഡി.സി | മേയ് 25

അമേരിക്കൻ പ്രസിഡന്റിന്റെ ഔദ്യോഗിക വസതിയായ വൈറ്റ് ഹൗസിന് സമീപം വെടിവയ്പ്പ് നടത്തിയ യുവാവിനെ സുരക്ഷാസേന വെടിവെച്ച് കൊന്നു. സീക്രട്ട് സർവീസ് ചെക്ക് പോയിന്റിന് സമീപം ആക്രമണം നടത്തിയ 21കാരനായ നസിർ ബെസ്റ്റാണ് കൊല്ലപ്പെട്ടത്. സംഭവത്തിൽ ഒരു വഴിയാത്രക്കാരനും പരിക്കേറ്റിട്ടുണ്ട്.

വെടിവയ്പ്പിനിടെ സുരക്ഷാസേന തിരിച്ചടിയായി വെടിയുതിർക്കുകയായിരുന്നു. ഗുരുതരമായി പരിക്കേറ്റ നസിർ ബെസ്റ്റിനെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. സംഭവത്തിന് പിന്നാലെ വൈറ്റ് ഹൗസിനും പരിസരപ്രദേശങ്ങൾക്കും ചുറ്റുമുള്ള സുരക്ഷ ശക്തമാക്കി.

നസിർ ബെസ്റ്റിന് മാനസിക പ്രശ്നങ്ങൾ ഉണ്ടായിരുന്നുവെന്നാണ് പ്രാഥമിക റിപ്പോർട്ടുകൾ. ഇയാൾ മുമ്പും വൈറ്റ് ഹൗസ് പരിസരത്ത് അലഞ്ഞുനടന്നതായി സീക്രട്ട് സർവീസ് ഉദ്യോഗസ്ഥർക്ക് വിവരം ലഭിച്ചിരുന്നു. ഗതാഗതം തടസപ്പെടുത്തിയതിനും നിരോധിത മേഖലയിലേക്ക് കടന്നതിനുമായി കഴിഞ്ഞ വർഷം രണ്ടുതവണ ഇയാളെ അറസ്റ്റ് ചെയ്തിരുന്നതായും റിപ്പോർട്ടുകളുണ്ട്.

അമേരിക്കൻ  പ്രസിഡന്റ് ഡോ​ണ​ൾ​ഡ് ട്രം​പ് ഇറാനുമായി ബന്ധപ്പെട്ട അന്തിമ കരാർ ഉടൻ പ്രഖ്യാപിക്കുമെന്ന സൂചന സോഷ്യൽ മീഡിയ പോസ്റ്റിലൂടെ നൽകിയതിന് പിന്നാലെയായിരുന്നു സംഭവം നടന്നത്. ഇതോടെ ആക്രമണത്തിന്റെ പശ്ചാത്തലത്തെക്കുറിച്ചും സുരക്ഷാ ഏജൻസികൾ വിശദമായ അന്വേഷണം ആരംഭിച്ചിട്ടുണ്ട്.

സംഭവത്തെ തുടർന്ന് യു.എസ് ഉന്നത സുരക്ഷാ ഏജൻസികൾ അന്വേഷണം ശക്തമാക്കി. ആക്രമിയുടെ ലക്ഷ്യം എന്തായിരുന്നു, ഇയാൾക്ക് മറ്റാരുമായെങ്കിലും ബന്ധമുണ്ടോയെന്നതടക്കമുള്ള കാര്യങ്ങൾ പരിശോധിക്കുകയാണ്. സുരക്ഷാ വീഴ്ചയുണ്ടായോയെന്നും അന്വേഷണസംഘം പരിശോധിക്കുന്നുണ്ട്.