മങ്കട: കടന്നമണ്ണ സര്വീസ് സഹകരണ ബാങ്ക് കോഴിക്കോട്ടുപറമ്പ് ശാഖ, വെള്ളില വനിതാ ബാങ്ക് എന്നിവിടങ്ങളില് നിന്നു മുക്കുപണ്ടം പണയം വച്ച് ലക്ഷങ്ങള് തട്ടിയെടുത്ത യുവതി പിടിയില്. വെള്ളില ആയിരനാഴിപ്പടി സ്വദേശിനി പൊട്ടന്കണ്ടത്തില് ആമിന (32) യെയാണ് മങ്കട എസ്.ഐ. ഷിജോ സി. തങ്കച്ചന്റെ നേതൃത്വത്തിലുള്ള പോലീസ് സംഘം രഹസ്യകേന്ദ്രത്തില് നിന്നു അറസ്റ്റ് ചെയ്തത്.
പല തവണകളായി കടന്നമണ്ണ സര്വീസ് സഹകരണ ബാങ്കിന്റെ കോഴിക്കോട്ടുപറമ്പ് ശാഖയില് നിന്നും വെള്ളില വനിതാ ബാങ്കില് നിന്നും ലക്ഷങ്ങള് തട്ടിയെടുത്തതിന് ബാങ്ക് സെക്രട്ടറിമാരുടെ പരാതിയില് മങ്കട പോലീസ് കേസ് രജിസ്റ്റര് ചെയ്തിരുന്നു. ലക്ഷങ്ങള് തട്ടിയെടുത്ത ശേഷം മുങ്ങിയ യുവതി കേരളത്തിനകത്തും പുറത്തും വിവിധ സ്ഥലങ്ങളില് വേഷം മാറിയും മറ്റും ഒളിവില് താമസിച്ചുവരികയായിരുന്നു.
പോലീസ് ശാസ്ത്രീയമായ രീതിയില് നടത്തിയ പഴുതടച്ച അന്വേഷണത്തിലാണ് ഇവര് പോലീസിന്റെ പിടിയിലായത്. പണം തട്ടിയെടുത്ത് ഒളിവില് പോയ ആമിന ഫോണുകള് ഉപയോഗിക്കാതെ വേഷം മാറിയും മറ്റും താമസിച്ചത് പോലീസിനെ കുഴക്കിയിരുന്നു. എന്നാല് പോലീസ് മങ്കടയിലും മറ്റു പ്രദേശങ്ങളിലും ആയിരക്കണക്കിന് ടെലിഫോണ് നമ്പറുകള് കേന്ദ്രീകരിച്ചും മങ്കടയിലും പരിസരങ്ങളിലും മറ്റു സ്ഥലങ്ങളിലുമുള്ള മൊബൈല് ടവറുകള് കേന്ദ്രീകരിച്ചും സൈബര്സെല്ലിന്റെ സഹായത്തോടെ നടത്തിയ ശാസ്ത്രീയ അന്വേഷണത്തിലാണ് രഹസ്യ കേന്ദ്രത്തില് താമസിക്കുകയായിരുന്ന ആമിനയെ മങ്കട പോലീസ് അറസ്റ്റ് ചെയ്തത്. കോടതിയില് ഹാജരാക്കിയ ഇവരെ 14 ദിവസത്തേക്ക് റിമാന്ഡ് ചെയ്തു.
വ്യാജ സ്വര്ണാഭരണങ്ങളുടെ ഉറവിടം കണ്ടെത്തുന്നതിനും പ്രതിക്ക് വ്യാജ സ്വര്ണാഭരണങ്ങള് നല്കിയ കണ്ണികളെ കണ്ടെത്തുന്നതിനും പ്രതിയെ കസ്റ്റഡിയില് വാങ്ങി ചോദ്യം ചെയ്യുമെന്നു മങ്കട എസ്.ഐ. ഷിജോ സി. തങ്കച്ചന് അറിയിച്ചു. എസ്.ഐമാരായ ഷംസു സീന്, അലവിക്കുട്ടി, അബ്ദുള് സലിം, എ.എസ്.ഐ. കൃഷ്ണദാസ്, പോലീസുകാരായ മുഹമ്മദ് ഫൈസല്, അബ്ദുസലാം, പ്രീതി, രാജീവ്, മുഹമ്മദ് സുഹൈല്, സോണി ജോണ്സണ്, അനീഷ്, അനീഷ്രാജ്, പ്രജീഷ്, ഷിനോജ്, ധന്യ എന്നിവരും ചേര്ന്നാണ് പ്രതിയെ പിടികൂടിയത്
