കോഴിക്കോട്: 32-ാമത് രാമാശ്രമം ഉണ്ണീരിക്കുട്ടി അവാര്‍ഡ് മുന്‍ ആരോഗ്യമന്ത്രി കെ.കെ. ശൈലജയ്ക്ക്. 50,000 രൂപയും പ്രശസ്തിപത്രവും ഫലകവുമടങ്ങുന്നതാണ് അവാര്‍ഡ്. എം. മുകുന്ദന്‍, വി.ആര്‍. സുധീഷ്, എം. മോഹനന്‍ എന്നിവരടങ്ങുന്ന കമ്മറ്റിയാണ് അവാര്‍ഡ് ജേതാവിനെ തെരഞ്ഞെടുത്തത്. അടുത്തമാസം കോഴിക്കോട് നടക്കുന്ന ചടങ്ങില്‍ അവാര്‍ഡ് സമ്മാനിക്കും. കഴിഞ്ഞ ഇടതുപക്ഷ സര്‍ക്കാരില്‍ ആരോഗ്യമന്ത്രിയെന്ന നിലയില്‍ നിപ്പാ – കോവിഡ് പ്രതിരോധ പ്രവര്‍ത്തനങ്ങള്‍ക്ക് സ്തുത്യര്‍ഹമായ സേവനമാണ് കെ.കെ. ശൈലജ നടത്തിയതെന്ന് രാമാശ്രമം ട്രസ്റ്റ് ചെയര്‍മാനും ജൂറി അംഗവുമായ എം. മുകുന്ദന്‍ വാര്‍ത്താസമ്മേളനത്തില്‍ പറഞ്ഞു. അവര്‍ കാഴ്ചവച്ച പ്രവര്‍ത്തനം കേരളത്തിന്റെ ആരോഗ്യമേഖലയില്‍ സമാനതകളില്ലാത്തതും സര്‍വാംഗീകൃതവുമാണ്. അടുത്തകാലത്ത് കേരളം ഏറ്റവും കൂടുതല്‍ ചര്‍ച്ച ചെയ്ത സ്ത്രീവ്യക്തിത്വവും ശൈലജയാണെന്ന് എം. മുകുന്ദന്‍ പറഞ്ഞു. വാര്‍ത്താസമ്മേളനത്തില്‍ രാമാശ്രമം മാനേജിങ് ട്രസ്റ്റി എം.എ. ശിഷന്‍, വി.ആര്‍. സുധീഷ്, എം. മോഹനന്‍ എന്നിവര്‍ പങ്കെടുത്തു.
രാമാശ്രമം അവാര്‍ഡ് കെ.കെ. ശൈലജയ്ക്ക്
