തിരുവനന്തപുരം: കെഎസ്ആര്ടിസി ജീവനക്കാര്ക്ക് ശബളം നല്കാന് സഹായിക്കണമെന്ന ഉത്തരവിനെതിരെ സംസ്ഥാന സര്ക്കാര് സമര്പ്പിച്ച അപ്പീല് ഹൈക്കോടതി 31/08/22 ബുധനാഴ്ച പരിഗണിക്കും.
ജീവനക്കാര്ക്ക് ശബളവും, ഉത്സവ ബത്തയും നല്കുന്നതിന് 103 കോടി രൂപ കെഎസ്ആര്ടിസിക്ക് അനുവദിക്കണമെന്ന സിംഗിള് ബെഞ്ച് ഉത്തരവ് റദ്ദാക്കണമെന്നാണ് സര്ക്കാരിന്റെ ആവശ്യം. ജസ്റ്റിസുമാരായ എ.കെ. ജയശങ്കരന് നമ്പ്യാര്, സി.പി. മുഹമ്മദ് നിയാസ് എന്നിവരടങ്ങിയ ഡിവിഷന് ബെഞ്ചാണ് അപ്പീല് പരിഗണിക്കുന്നത്. കെഎസ്ആര്ടിസി ജീവനക്കാര്ക്ക് ശബളം നല്കാന് നിയമപരമായോ, കരാര് പ്രകാരമോ ബാധ്യതയില്ലെന്നാണ് സംസ്ഥാന സര്ക്കാരിന്റെ വാദം.
2021-22 കാലയളവില് 2037 കോടിയില്പ്പരം കെഎസ്ആര്ടിസിക്ക് അനുവദിച്ചെന്നും, കൂടുതല് സാമ്പത്തിക ബാധ്യത വരുത്തിവയ്ക്കാന് കഴിയില്ലെന്നും സര്ക്കാര് ചൂണ്ടിക്കാട്ടി. സര്ക്കാര് ധനസഹായം നല്കണമെന്നത് ജീവനക്കാര് പോലും ഉന്നയിക്കാത്ത ആവശ്യമാണെന്നും അപ്പീലില് സര്ക്കാര് പറയുന്നു.
