ന്യൂഡല്ഹി: അക്ഷരാർത്ഥത്തിൽ വിറങ്ങലിച്ചു നിൽക്കുകയാണ് ഡൽഹി. ഏപ്രിൽ 23 വെള്ളിയാഴ്ച വൈകിട്ട് അവസാനിച്ച 24 മണിക്കൂറിനിടെ ഡല്ഹിയില് കൊവിഡ് ബാധിച്ച് മരിച്ചവരുടെ എണ്ണം 348 ആയി. 24,331 പുതിയ കൊവിഡ് കേസുകളാണ് ഡല്ഹിയില് വെള്ളിയാഴ്ച മാത്രം റിപ്പോര്ട്ട് ചെയ്തത്.
32 ശതമാനമാണ് ഡല്ഹിയിലെ കൊവിഡ് പോസിറ്റിവിറ്റി റേറ്റ്. നിലവില് ഡല്ഹിയിൽ 92000 ആക്ടീവ് കേസുകളാണുള്ളത്.
അതേസമയം, ദല്ഹിയില് ഓക്സിജന് ക്ഷാമം രൂക്ഷമാണ്. കേന്ദ്രത്തിന്റെ പക്കല് നിന്ന് ഓക്സിജന് ലഭ്യമാക്കാനുള്ള നടപടികള് നടത്തിക്കൊണ്ടിരിക്കുകയാണ് സര്ക്കാര്.
കൊവിഡ് വ്യാപനത്തില് ഓക്സിജന് ക്ഷാമം നേരിടുന്ന ആശുപത്രികളുടെ പട്ടിക കഴിഞ്ഞദിവസം ഡല്ഹി സര്ക്കാര് പുറത്ത് വിട്ടിരുന്നു. ഓക്സിജന് ഒട്ടും ഇല്ലാത്ത ആറ് സ്വകാര്യ ആശുപത്രികളുടെയും ക്ഷാമം നേരിടുന്ന മറ്റു ആശുപത്രികളുടെയും പട്ടികയാണ് ദല്ഹി മുഖ്യമന്ത്രി അരവിന്ദ് കെജ്രിവാള് പുറത്ത് വിട്ടത്
സരോജ് സൂപ്പര് സെപ്ഷ്യാലിറ്റി ആശുപത്രി, ശാന്തി മുകുന്ദ് ആശുപത്രി, തിരത്ത് റാം ഷാ ആശുപത്രി, യു.കെ നഴ്സിംഗ് ഹോം, രാതി ആശുപത്രി, ശാന്തം ആശുപത്രി എന്നീ ആശുപത്രികളിലാണ് കരുതി വെച്ച ഓക്സിജനും തീര്ന്നതായി അറിയിച്ചത്.
സരോജ് സൂപ്പര് സെപ്ഷ്യാലിറ്റി ആശുപത്രിയും ശാന്തി മുകുന്ദ് ആശുപത്രിയും ഓക്സിജന് തീരാറായെന്ന് അറിയിച്ചിരുന്നു. സരോജ് സൂപ്പര് സെപ്ഷ്യാലിറ്റി ആശുപത്രി ഓക്സിജന് ക്ഷാമം നികത്തണമെന്ന് ആവശ്യപ്പെട്ട് ഹൈക്കോടതിയെ സമീപിക്കുകയും ചെയ്തിരുന്നു.
