ചെന്നൈ  / 2026   / നവംബർ 12 

ചെന്നൈ തുറമുഖം വഴി മലേഷ്യയിലേക്ക് കടത്താൻ ശ്രമിച്ച 12.87 മെട്രിക് ടൺ രക്തചന്ദനം പിടികൂടിയതായി ഡയറക്ടറേറ്റ് ഓഫ് റവന്യൂ ഇന്റലിജൻസ് അറിയിച്ചു. ഏകദേശം 7.72 കോടി രൂപ വിലവരുന്ന രക്തചന്ദനമാണ് കണ്ടെത്തിയത്. ചെന്നൈ കേന്ദ്രീകരിച്ചുള്ള കടത്തുസംഘത്തെക്കുറിച്ച് ലഭിച്ച രഹസ്യവിവരത്തിന്റെ അടിസ്ഥാനത്തിലായിരുന്നു നടപടി. നവംബർ ഒമ്പതുമുതൽ പതിനൊന്നുവരെ നടന്ന പരിശോധനാനടപടികളുടെ ഭാഗമായി, കപ്പലിൽ കയറ്റുന്നതിനുമുമ്പ് കയറ്റുമതി കണ്ടെയ്നർ ഉദ്യോഗസ്ഥർ തടഞ്ഞു. സംഭവത്തിൽ സംഘത്തിലെ പ്രധാനികളായ മൂന്നുപേരെ അറസ്റ്റ് ചെയ്തു.

പേപ്പർ ലാമിനേറ്റ് റോളുകൾക്കിടയിൽ രക്തചന്ദനം

പേപ്പർ ലാമിനേറ്റ് റോളുകളാണെന്ന് രേഖപ്പെടുത്തിയ കണ്ടെയ്നറിൽ നവംബർ ഒമ്പതിനും പത്തിനും വിശദമായ പരിശോധന നടത്തി. ഉയർന്ന ഗുണനിലവാരമുള്ള രക്തചന്ദനത്തടികളാണ് ഇതിനുള്ളിൽ കണ്ടെത്തിയത്. രേഖകളിൽ പറഞ്ഞ ചരക്കിന്റെ ചെറിയൊരു ഭാഗത്തിനും ചരൽക്കല്ലുകൾക്കുമൊപ്പമാണ് തടികൾ ഒളിപ്പിച്ചിരുന്നത്. 1962ലെ കസ്റ്റംസ് നിയമപ്രകാരം രക്തചന്ദനവും മറയ്ക്കാനുപയോഗിച്ച ചരക്കുകളും പിടിച്ചെടുത്തു.

സ്വയം സീൽ ചെയ്യാനുള്ള സൗകര്യം ദുരുപയോഗം ചെയ്തു

ഉൽപ്പാദകനും കയറ്റുമതിക്കാരനുമായ സ്ഥാപനത്തിന് ലഭ്യമായ, കണ്ടെയ്നർ സ്വയം സീൽ ചെയ്യാനുള്ള സൗകര്യം സംഘം ദുരുപയോഗം ചെയ്തെന്നാണ് പ്രാഥമിക അന്വേഷണത്തിൽ കണ്ടെത്തിയത്. കയറ്റുമതിക്കാരൻ മുഖേന ചരക്ക് അയയ്ക്കാനുള്ള ക്രമീകരണം സംഘം ഒരുക്കി. തുടർന്ന് കണ്ടെയ്നർ ഒരു സ്വകാര്യ ഗോഡൗണിലേക്ക് വഴിതിരിച്ചുവിട്ടു. അവിടെവെച്ച് രേഖകളിൽ പറഞ്ഞ പേപ്പർ ലാമിനേറ്റ് റോളുകൾ മാറ്റി രക്തചന്ദനത്തടികൾ നിറച്ചശേഷമാണ് കയറ്റുമതിക്കായി അയച്ചതെന്ന് ഡി.ആർ.ഐ. അറിയിച്ചു.

ഗോഡൗണിലെ പരിശോധനയിൽ കൂടുതൽ തെളിവുകൾ

പിന്നീട് ഗോഡൗണിൽ നടത്തിയ പരിശോധനയിൽ ആദ്യം കയറ്റുമതിക്കായി രേഖപ്പെടുത്തിയിരുന്ന ചരക്ക് കണ്ടെത്തി. വ്യാവസായിക ആവശ്യങ്ങൾക്കുള്ള തൂക്കയന്ത്രവും രക്തചന്ദനത്തിന്റെ അവശിഷ്ടങ്ങളും അവിടെനിന്ന് ലഭിച്ചു. കടത്തിനായി ഉപയോഗിച്ച രീതിക്ക് കൂടുതൽ തെളിവുകളാണ് ഇവയെന്ന് ഡി.ആർ.ഐ. വ്യക്തമാക്കി. കടത്തിൽ ഉൾപ്പെട്ട സംഘത്തിലെ പ്രധാനികളായ മൂന്നുപേരെയും 1962ലെ കസ്റ്റംസ് നിയമപ്രകാരമാണ് അറസ്റ്റ് ചെയ്തത്.

ഇന്ത്യയിൽനിന്ന് കയറ്റുമതി നിരോധിച്ച സംരക്ഷിത ഇനം

ടെറോകാർപ്പസ് സാന്റാലിനസ് എന്ന ശാസ്ത്രീയനാമമുള്ള രക്തചന്ദനം സംരക്ഷിത സസ്യയിനമാണ്. വംശനാശഭീഷണി നേരിടുന്ന വന്യജീവികളുടെയും സസ്യങ്ങളുടെയും അന്താരാഷ്ട്ര വ്യാപാരം നിയന്ത്രിക്കുന്ന സൈറ്റ്സ് കൺവെൻഷന്റെ അനുബന്ധം രണ്ടിലും, 1972ലെ വന്യജീവി സംരക്ഷണ നിയമത്തിന്റെ പട്ടിക നാലിലും ഇത് ഉൾപ്പെടുന്നു. ഇന്ത്യയുടെ വിദേശവ്യാപാര നയപ്രകാരം രക്തചന്ദനത്തിന്റെ കയറ്റുമതി നിരോധിച്ചിട്ടുണ്ട്.

നിയമാനുസൃത കയറ്റുമതി സംവിധാനങ്ങളും വ്യാപാരം സുഗമമാക്കാനുള്ള സൗകര്യങ്ങളും സംഘടിത വന്യജീവി കടത്തിനായി ദുരുപയോഗം ചെയ്യുന്നതാണ് ഈ നടപടിയിലൂടെ പുറത്തുവന്നതെന്ന് ഡി.ആർ.ഐ. അറിയിച്ചു. രഹസ്യവിവരങ്ങളുടെ അടിസ്ഥാനത്തിലുള്ള നിയമനടപടികളിലൂടെ ഇത്തരം കടത്തുശൃംഖലകൾ തകർക്കാനും ഇന്ത്യയുടെ സമ്പന്നമായ ജൈവവൈവിധ്യം സംരക്ഷിക്കാനും പ്രതിജ്ഞാബദ്ധമാണെന്നും ഏജൻസി വ്യക്തമാക്കി.

.