പഞ്ച്കുള (ഹരിയാന) / 2026 / നവംബർ 02
ജനാധിപത്യത്തിൽ വിയോജിപ്പുകളെ സ്വാഗതം ചെയ്യാനും ബഹുമാനിക്കാനും ജനപ്രതിനിധികൾ തയ്യാറാകണമെന്ന് ലോക്‌സഭാ സ്പീക്കർ ഓം ബിർള. ഭരണഘടനാ പക്ഷാചരണത്തിന്റെ ഭാഗമായി ഹരിയാന നിയമസഭ പഞ്ച്കുളയിൽ സംഘടിപ്പിച്ച ജനപ്രതിനിധി സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. സമൂഹത്തിലെ ഏറ്റവും പിന്നിലുള്ള വ്യക്തിയുടെ ജീവിതത്തിൽ മാറ്റമുണ്ടാക്കുന്നതാകണം ജനപ്രതിനിധികളുടെ ലക്ഷ്യമെന്നും അദ്ദേഹം പറഞ്ഞു. ഹരിയാനയുടെ ആറുപതിറ്റാണ്ടത്തെ വികസനയാത്രയും ഭരണഘടനാ മൂല്യങ്ങളും ജനാധിപത്യത്തിന്റെ കരുത്തും പ്രസംഗത്തിൽ അദ്ദേഹം എടുത്തുപറഞ്ഞു.
ആരോഗ്യകരവും സജീവവുമായ ജനാധിപത്യത്തിൽ യോജിപ്പും വിയോജിപ്പും ഒരേ നാണയത്തിന്റെ രണ്ടുവശങ്ങളാണെന്ന് ബിർള പറഞ്ഞു. പുതിയ കാഴ്ചപ്പാടുകൾ അവതരിപ്പിക്കാനും ഭരണസംവിധാനത്തിന്റെ ശ്രദ്ധയിൽപ്പെടാതെ പോകുന്ന കാര്യങ്ങൾ ചൂണ്ടിക്കാട്ടാനും മികച്ച ഭരണം ഉറപ്പാക്കാനും വിയോജിപ്പുകൾ സഹായിക്കും. രാഷ്ട്രീയവും കക്ഷിപരവും ആശയപരവുമായ വ്യത്യാസങ്ങൾക്കപ്പുറം സംസ്ഥാനത്തിന്റെയും രാജ്യത്തിന്റെയും തുടർച്ചയായ പുരോഗതിയാകണം എല്ലാ ജനപ്രതിനിധികളുടെയും പൊതുലക്ഷ്യമെന്നും അദ്ദേഹം വ്യക്തമാക്കി.
ആറുപതിറ്റാണ്ടിന്റെ വളർച്ചയിൽ ഹരിയാനയുടെ കരുത്ത്
ഹരിയാന നിയമസഭയിലെ നിലവിലെയും മുൻകാലത്തെയും അംഗങ്ങളും മുൻ മന്ത്രിമാരും പങ്കെടുത്ത സമ്മേളനത്തിൽ സംസ്ഥാനത്തിന്റെ അറുപതുവർഷത്തെ വളർച്ച ബിർള അനുസ്മരിച്ചു. സാമൂഹികവും സാമ്പത്തികവുമായ വെല്ലുവിളികളെ അതിജീവിച്ച ഹരിയാന വിവിധ മേഖലകളിൽ നേതൃത്വം നൽകി. ഈ നേട്ടങ്ങൾ ഇന്ത്യയുടെ ഭരണഘടനാ മൂല്യങ്ങളുടെയും ജനാധിപത്യ സംസ്കാരത്തിന്റെയും പശ്ചാത്തലത്തിലാണ് കാണേണ്ടതെന്ന് അദ്ദേഹം പറഞ്ഞു. ചരിത്രപരവും ഭരണപരവുമായ നിരവധി വെല്ലുവിളികൾക്കിടയിലും ദേശീയ പുരോഗതിയുടെ മുൻനിരയിൽ ഹരിയാന തുടർന്നു.
ഭഗവദ്ഗീതയിലെ കാലാതീതമായ കർമസന്ദേശവുമായി സംസ്ഥാനത്തിന്റെ മുന്നേറ്റത്തെ ബന്ധപ്പെടുത്തിയാണ് അദ്ദേഹം സംസാരിച്ചത്. ആധുനിക കാർഷിക സാങ്കേതികവിദ്യകൾ സ്വീകരിക്കുന്നതിൽ മുൻകൈയെടുത്ത കർഷകർ വിളവ് വർധിപ്പിക്കുകയും രാജ്യത്തിന്റെ ഭക്ഷ്യസുരക്ഷയ്ക്ക് വലിയ സംഭാവന നൽകുകയും ചെയ്തു. അതിർത്തികളും ആഭ്യന്തരസുരക്ഷയും സംരക്ഷിക്കുന്നതിൽ അസാധാരണ ധീരത കാട്ടുന്ന ഹരിയാനയിലെ സൈനികരെയും അദ്ദേഹം പ്രശംസിച്ചു. അന്താരാഷ്ട്ര കായികവേദികളിൽ ഇന്ത്യയുടെ അഭിമാനം തുടർച്ചയായി ഉയർത്തുന്ന സംസ്ഥാനത്തെ കായികതാരങ്ങളെയും അഭിനന്ദിച്ചു.
ഭരണഘടന ഇന്ത്യയുടെ ആത്മാവും ധാർമിക വഴികാട്ടിയും
എല്ലാവരെയും ഉൾക്കൊള്ളുകയും വിശദമായ ചർച്ചകൾക്ക് ഇടം നൽകുകയും ചെയ്തതാണ് ഇന്ത്യയുടെ ഭരണഘടനാ രൂപീകരണയാത്രയെന്ന് ബിർള പറഞ്ഞു. കരട് സമിതി അധ്യക്ഷൻ ബാബാസാഹേബ് ഡോ. ബി. ആർ. അംബേദ്കറുടെ മാർഗനിർദേശത്തിൽ ഭരണഘടനാ നിർമാണസഭ പാർലമെന്ററി ജനാധിപത്യത്തിന് അടിത്തറയിട്ടു. ഹരിയാനയും പഞ്ചാബും ഉൾപ്പെടെ വിവിധ പ്രദേശങ്ങളിൽനിന്നുള്ള പ്രമുഖ നേതാക്കൾ ഇതിൽ പങ്കാളികളായി. ഭാഷയിലും സംസ്കാരത്തിലും മതത്തിലുമുള്ള വലിയ വൈവിധ്യങ്ങൾക്കിടയിലും രാജ്യത്തെ ഒരുമിപ്പിക്കുന്ന ജനാധിപത്യ സംവിധാനമാണ് അവർ രൂപപ്പെടുത്തിയത്.
വൈവിധ്യങ്ങളുള്ള ഇന്ത്യയുടെ ഫെഡറൽ സംവിധാനം നിലനിൽക്കുന്നതും വളരുന്നതും ജനാധിപത്യത്തിന്റെ അതിജീവനശേഷിക്ക് ലോകത്തിന് മുന്നിലുള്ള തെളിവാണെന്ന് അദ്ദേഹം പറഞ്ഞു. ഭരണഘടന സർക്കാർ നടത്താനുള്ള ചട്ടക്കൂട് മാത്രമല്ല. അത് ഇന്ത്യയുടെ ജീവിക്കുന്ന ആത്മാവും ധാർമിക വഴികാട്ടിയുമാണ്. രാജ്യത്തിന്റെ ദേശീയബോധവും കോടിക്കണക്കിന് ജനങ്ങളുടെ പ്രതീക്ഷകളും ഭരണഘടനയിൽ പ്രതിഫലിക്കുന്നുവെന്നും അദ്ദേഹം വ്യക്തമാക്കി.
പദവിക്കാലം കഴിഞ്ഞാലും ജനസേവനം തുടരണം
നിയമസഭയിലെ കാലാവധി പൂർത്തിയാകുന്നതോടെ പൊതുസേവനത്തോടുള്ള ഉത്തരവാദിത്വം അവസാനിക്കുന്നില്ലെന്ന് ബിർള ഓർമിപ്പിച്ചു. ഭരണനിർവഹണത്തെ നടപടിക്രമങ്ങൾ നടപ്പാക്കാനുള്ള സംവിധാനം എന്നതിലുപരി താഴെത്തട്ടിലുള്ള ജനങ്ങളെ ശക്തിപ്പെടുത്താനുള്ള ഉപാധിയായി ജനപ്രതിനിധികൾ കാണണം. സമൂഹത്തിലെ ഏറ്റവും ദുർബലരായ വിഭാഗങ്ങളുടെ ജീവിതത്തിൽ വ്യക്തമായ സാമൂഹിക, സാമ്പത്തിക മാറ്റവും യഥാർഥ സന്തോഷവും കൊണ്ടുവരുന്നതാണ് രാഷ്ട്രീയ, സാമൂഹിക ജീവിതത്തിന്റെ വിജയമളക്കാനുള്ള മാനദണ്ഡം. നിരയിലെ അവസാന വ്യക്തിയിലേക്കും ഈ മാറ്റം എത്തണമെന്നും അദ്ദേഹം പറഞ്ഞു.
ആറുപതിറ്റാണ്ടത്തെ പാർലമെന്ററി പ്രവർത്തനത്തിലൂടെ ഹരിയാന നിയമസഭ മാതൃകാപരമായ നിലവാരം സ്ഥാപിച്ചതായും അദ്ദേഹം വിലയിരുത്തി. ഉന്നതനിലവാരമുള്ള ചർച്ചകളും യുക്തിപൂർവമായ സംവാദങ്ങളും നിയമനിർമാണ സഭയുടെ അന്തസ്സ് കാത്തുള്ള പ്രവർത്തനവുമാണ് ഇതിന് സഹായിച്ചത്. രാജ്യത്തെ മറ്റു നിയമനിർമാണ സഭകൾക്കും ഹരിയാന നിയമസഭ പ്രചോദനമായി. ജനക്ഷേമത്തിലും സ്ഥാപനങ്ങളുടെ ഉത്തരവാദിത്വത്തിലും ഉറച്ചുനിൽക്കുമ്പോഴാണ് ജനാധിപത്യ സ്ഥാപനങ്ങൾ കൂടുതൽ ശക്തമാകുന്നതെന്നും അദ്ദേഹം പറഞ്ഞു.
മുഖ്യമന്ത്രിയും പ്രതിപക്ഷ നേതാവും പങ്കെടുത്തു
ഹരിയാന മുഖ്യമന്ത്രി നായബ് സിങ് സൈനി, നിയമസഭാ സ്പീക്കർ ഹർവീന്ദർ കല്യാൺ, നിയമസഭയിലെ പ്രതിപക്ഷ നേതാവ് ഭൂപീന്ദർ സിങ് ഹൂഡ, സംസ്ഥാന പാർലമെന്ററികാര്യ മന്ത്രി മഹിപാൽ ധണ്ഡ, നിയമസഭാ ഡെപ്യൂട്ടി സ്പീക്കർ ഡോ. കൃഷ്ണലാൽ മിദ്ധ എന്നിവരും ചടങ്ങിൽ പങ്കെടുത്തു.
.
