ന്യൂഡൽഹി  /  2026  / ഒക്ടോബർ 22 

ഗുജറാത്തിലെ ഏകതാ നഗറിൽ ഒക്ടോബർ 31ന് നടക്കുന്ന ദേശീയ ഐക്യദിന, ഭാരത് പർവ് ആഘോഷങ്ങളുടെ ഒരുക്കങ്ങൾ വിശദീകരിച്ച് കേന്ദ്ര ആഭ്യന്തര സെക്രട്ടറി ഗോവിന്ദ് മോഹൻ. ഒക്ടോബർ 21ന് ന്യൂഡൽഹിയിൽ നടത്തിയ വാർത്താസമ്മേളനത്തിലാണ് അദ്ദേഹം പരിപാടികൾ അറിയിച്ചത്. പ്രധാനമന്ത്രി നരേന്ദ്ര മോദി രാവിലെ ഏകതാ പ്രതിമയിൽ സർദാർ വല്ലഭ്ഭായി പട്ടേലിന് ആദരമർപ്പിക്കുന്നതോടെ പ്രധാന ചടങ്ങുകൾ തുടങ്ങും. വൈകുന്നേരമാണ് ഏകതാ പരേഡ്. സായുധ നക്സലിസം അവസാനിപ്പിച്ചതിന്റെ ആഘോഷമായിരിക്കും ഇത്തവണത്തെ പരേഡെന്ന് ആഭ്യന്തര സെക്രട്ടറി പറഞ്ഞു.

ഇത്തവണ പരേഡിന്റെ ഘടന പുതുക്കിയിട്ടുണ്ട്. കൂടുതൽ വൈവിധ്യവും ആകർഷണവുമുള്ള പരിപാടികളാണ് ഒരുക്കുന്നത്. രാജ്യത്തെ പൊലീസ് സേനകളും കേന്ദ്ര സായുധ പൊലീസ് സേനകളും കേന്ദ്ര പൊലീസ് സംഘടനകളും നടത്തുന്ന അസാധാരണ പ്രവർത്തനങ്ങൾ ജനങ്ങളുടെ ശ്രദ്ധയിൽപ്പെടുത്തുകയാണ് ആഘോഷങ്ങളുടെ ഒരു ലക്ഷ്യം.

രാജ്യത്തിന്റെ എല്ലാ ഭാഗങ്ങളിൽനിന്നുമുള്ള ആളുകളെ ഏകതാ നഗറിലേക്ക് ആകർഷിക്കുകയാണ് മറ്റൊരു ലക്ഷ്യം. ലോകത്തിലെ ഏറ്റവും ഉയരം കൂടിയ സർദാർ പട്ടേൽ പ്രതിമയും പ്രദേശത്തെ കാഴ്ചകളും ആഘോഷങ്ങളും ജനങ്ങൾക്ക് ആസ്വദിക്കാം. ഏകതാ നഗറിന് ചുറ്റും നിരവധി ആകർഷണങ്ങൾ ഒരുക്കിയിട്ടുണ്ടെന്നും രാജ്യത്തെ പ്രധാന വിനോദസഞ്ചാര കേന്ദ്രങ്ങളിലൊന്നായി ഇവിടം മാറിയെന്നും ഗോവിന്ദ് മോഹൻ പറഞ്ഞു.

നക്സലിസത്തിനെതിരായ പോരാട്ടം മൂന്ന് അവതരണങ്ങളിലൂടെ

സായുധ നക്സലിസത്തിൽനിന്ന് 2026ൽ ഇന്ത്യയെ മോചിപ്പിച്ചെന്ന നേട്ടത്തിനാണ് പരേഡിൽ പ്രധാന ഊന്നൽ നൽകുന്നതെന്ന് ആഭ്യന്തര സെക്രട്ടറി പറഞ്ഞു. ഈ പോരാട്ടത്തിന്റെ മുൻനിരയിലുണ്ടായിരുന്ന സംസ്ഥാന പൊലീസ് സേനകളും കേന്ദ്ര സായുധ പൊലീസ് സേനകളും പരേഡിൽ അണിനിരക്കും. ഓരോ സംഘവും പ്രധാനമന്ത്രിക്ക് മുന്നിലൂടെ കടന്നുപോകുമ്പോൾ അവരുടെ പ്രധാന നേട്ടങ്ങൾ വിവരിക്കുന്ന ഹ്രസ്വചിത്രങ്ങൾ വിവിധ എൽഇഡി സ്‌ക്രീനുകളിൽ പ്രദർശിപ്പിക്കും.

ഒരുകാലത്ത് സായുധ നക്സലിസത്തിന്റെ ഭീഷണി നേരിട്ട 126 ജില്ലകളിൽനിന്നുള്ള രണ്ടായിരത്തോളം കലാകാരന്മാരെ അണിനിരത്തി നാഷണൽ സ്‌കൂൾ ഓഫ് ഡ്രാമ ‘നക്സൽ മുക്ത ഭാരത്’ നാടകാവതരണം ഒരുക്കും. ജീവനും സ്വത്തിനും ഭീഷണി നേരിട്ട കാലത്തെ ദുരിതങ്ങളും അതിജീവനപോരാട്ടവും ഇവർ കലാവതരണങ്ങളിലൂടെ അവതരിപ്പിക്കും.

ഇതേ 126 ജില്ലകളിൽനിന്നുള്ള അയ്യായിരത്തോളം ആളുകളെ എല്ലാ പരിപാടികളും കാണാൻ ക്ഷണിച്ചിട്ടുണ്ട്. ആശയവിനിമയങ്ങളിലൂടെ ഇവർ സ്വന്തം അനുഭവങ്ങളും പങ്കുവെക്കും. സായുധ നക്സലിസത്തിനെതിരായ ഇന്ത്യയുടെ പോരാട്ടവും അതിന്റെ നിർമാർജനവും അക്രമത്തിന് പകരം ഈ ജില്ലകളിൽ വികസനം മുന്നേറുന്നതും ഈ മൂന്ന് ഘടകങ്ങളിലൂടെ അവതരിപ്പിക്കുമെന്ന് ഗോവിന്ദ് മോഹൻ വ്യക്തമാക്കി.

വന്ദേമാതരം പ്രമേയം; പരിപാടികളെല്ലാം വൈകുന്നേരം

വന്ദേമാതരമാണ് നിശ്ചലദൃശ്യങ്ങൾ ഉൾപ്പെടെയുള്ള സാംസ്കാരിക പരിപാടികളുടെ പ്രമേയം. വന്ദേമാതരത്തിന്റെ നൂറ്റമ്പതാം വർഷമായതിനാൽ ഇത്തവണ പുതുതായി ഉൾപ്പെടുത്തിയ പല പരിപാടികൾക്കും അതിൽനിന്നാണ് ആശയം സ്വീകരിച്ചിരിക്കുന്നത്.

പരേഡും എല്ലാ കലാവതരണങ്ങളും വൈകുന്നേരം നടത്തുന്നതാണ് മറ്റൊരു മാറ്റം. പകൽ സമയത്തെ ഉയർന്ന ചൂട് കണക്കിലെടുത്താണ് തീരുമാനം. പരിപാടികൾ കൂടുതൽ ആസ്വാദ്യകരമാക്കാനും ഇതിലൂടെ കഴിയുമെന്ന് ആഭ്യന്തര സെക്രട്ടറി പറഞ്ഞു.

ജനങ്ങളുടെ ആശയങ്ങളിൽ പതിനഞ്ച് നിശ്ചലദൃശ്യങ്ങൾ

സാധാരണയായി കേന്ദ്ര മന്ത്രാലയങ്ങളോ വകുപ്പുകളോ സംസ്ഥാന സർക്കാരുകളോ മറ്റ് സർക്കാർ സ്ഥാപനങ്ങളോ ആണ് നിശ്ചലദൃശ്യങ്ങൾ രൂപകൽപ്പന ചെയ്യുന്നത്. ഇത്തവണ പൊതുജനങ്ങളിൽനിന്നാണ് ആശയങ്ങളും രൂപരേഖകളും ക്ഷണിച്ചത്. ഇതിനായി മൈഗവ് വേദിയിലൂടെ ദേശീയതലത്തിലും ഗുജറാത്തിലെ എല്ലാ ജില്ലകളിലും മത്സരങ്ങൾ നടത്തി.

ദേശീയതലത്തിലും സംസ്ഥാനതലത്തിലും ലഭിച്ച ആശയങ്ങളും രൂപരേഖകളും കൂട്ടിച്ചേർത്ത് പതിനഞ്ച് നിശ്ചലദൃശ്യങ്ങൾ ഒരുക്കും. മന്ത്രാലയങ്ങളുടെയോ വകുപ്പുകളുടെയോ പങ്കാളിത്തമില്ലാതെ പൊതുജനങ്ങൾ തയ്യാറാക്കിയ രൂപകൽപ്പനകളാണ് ഉപയോഗിക്കുക. സർക്കാർ സ്ഥാപനങ്ങളുടെ നിശ്ചിത പ്രമേയങ്ങൾക്കൊപ്പം സാധാരണക്കാരുടെ ആഗ്രഹങ്ങൾക്കും പ്രധാന ചടങ്ങുകളിൽ ഇടം നൽകുന്ന സമീപനത്തിലേക്കാണ് നീങ്ങുന്നതെന്ന് ഗോവിന്ദ് മോഹൻ പറഞ്ഞു. ഏകതാ നഗറിൽ ആദ്യമായാണ് ഇത്തരത്തിൽ ജനങ്ങളുടെ നിശ്ചലദൃശ്യങ്ങൾ അവതരിപ്പിക്കുന്നത്.

അയ്യായിരം കലാകാരന്മാരുടെ സംഗമം; ആനന്ദമഠം നാടകവും

സാംസ്കാരിക പരിപാടികളുടെ സംഘാടനത്തിലും ഇത്തവണ മാറ്റമുണ്ട്. ഇതുവരെ സാംസ്കാരിക മന്ത്രാലയമായിരുന്നു പരിപാടികൾ ഒരുക്കിയിരുന്നത്. ഇത്തവണ ഗുജറാത്തിൽ താമസിക്കുന്ന വിവിധ സംസ്ഥാനങ്ങളിൽനിന്നുള്ള ജനവിഭാഗങ്ങളെയും പങ്കാളികളാക്കി. തലമുറകളായി ഗുജറാത്തിനെ സ്വന്തം നാടാക്കി ജീവിക്കുന്ന ഇവരോട് അതത് സംസ്ഥാനങ്ങളുടെ കലാപാരമ്പര്യം അടിസ്ഥാനമാക്കി അവതരണങ്ങൾ തയ്യാറാക്കാൻ ആവശ്യപ്പെട്ടു.

ഇത്തരത്തിലുള്ള അമ്പതോളം അവതരണഘടകങ്ങൾ കൂട്ടിച്ചേർത്താണ് അയ്യായിരത്തോളം കലാകാരന്മാരുടെ സാംസ്കാരിക പരിപാടി ഒരുക്കിയത്. ‘ഏക ഭാരതം ശ്രേഷ്ഠ ഭാരതം’ എന്ന ആശയത്തിന്റെ മികച്ച ഉദാഹരണമായിരിക്കും ഇതെന്ന് ആഭ്യന്തര സെക്രട്ടറി പറഞ്ഞു.

കഴിഞ്ഞ വർഷം മുതൽ നാഷണൽ സ്‌കൂൾ ഓഫ് ഡ്രാമയുടെ നേതൃത്വത്തിൽ വലിയ നാടകാവതരണവും സംഘടിപ്പിക്കുന്നുണ്ട്. കഴിഞ്ഞ വർഷം സർദാർ പട്ടേലായിരുന്നു പ്രമേയം. ഇത്തവണ പ്രധാനമന്ത്രിക്ക് മുന്നിൽ അവതരിപ്പിക്കുന്ന നാടകത്തിന് ബങ്കിം ചന്ദ്ര ചട്ടോപാധ്യായയുടെ ശ്രദ്ധേയ നോവലായ ‘ആനന്ദമഠം’ അടിസ്ഥാനമാകും. രാജ്യത്തിന് ശോഭനമായ ഭാവി സൃഷ്ടിക്കാൻ ഓരോ ഇന്ത്യക്കാരനും ഉത്തരവാദിത്വമുണ്ടെന്ന നോവലിന്റെ ആശയം സമകാലിക പശ്ചാത്തലത്തിൽ അവതരിപ്പിക്കും. സാംസ്കാരിക പൈതൃകത്തെക്കുറിച്ചുള്ള അവബോധവും രാജ്യത്തിന്റെ അഭിലാഷങ്ങൾ നിറവേറ്റുന്നതിൽ സന്നദ്ധപങ്കാളിത്തവും നാടകത്തിൽ ഉയർത്തിക്കാട്ടും.