മണ്ഡപം /  2026 /    ഒക്ടോബർ 14 

തമിഴ്‌നാട്ടിലെ മണ്ഡപം ക്യാമ്പിലുള്ള മുന്നൈക്കാട് കടൽപ്പായൽ കൃഷിസ്ഥലം കേന്ദ്ര ഫിഷറീസ് സെക്രട്ടറി ഡോ. അഭിലാക്ഷ് ലിഖി സന്ദർശിച്ചു. സ്വയംസഹായ സംഘങ്ങളിലെ കടൽപ്പായൽ കർഷകരുമായി അദ്ദേഹം സംസാരിച്ചു. കടൽപ്പായൽ കൃഷി പ്രോത്സാഹിപ്പിക്കാനും തീരദേശത്തെ ഉപജീവനമാർഗങ്ങൾ ശക്തമാക്കാനും ഉൽപ്പാദനം മുതൽ വിപണനം വരെയുള്ള പ്രവർത്തനങ്ങൾ വേഗത്തിലാക്കാനുമുള്ള ഫിഷറീസ് വകുപ്പിന്റെ ശ്രമങ്ങളുടെ ഭാഗമായിരുന്നു സന്ദർശനം. തമിഴ്‌നാട്ടിൽ ഉപയോഗിക്കുന്ന ഒറ്റക്കയർ രീതിയും ചങ്ങാടം ഉപയോഗിച്ചുള്ള കൃഷിരീതിയും കർഷകർ വിശദീകരിച്ചു. കൃഷി, പരിപാലനം, വിളവെടുപ്പ് എന്നിവ നേരിൽ കാണിച്ചുകൊടുത്തു. സ്ഥിരമായ ഉപജീവനമാർഗങ്ങൾ ഒരുക്കുന്നതിൽ വനിതകൾ നയിക്കുന്ന സ്വയംസഹായ സംഘങ്ങളുടെ പങ്കിനെ സെക്രട്ടറി അഭിനന്ദിച്ചു. ഉൽപ്പാദനം വർധിപ്പിക്കാനും കൂടുതൽ കർഷകരെ സംഘടിത കൃഷിയിലേക്ക് കൊണ്ടുവരാനും അദ്ദേഹം പ്രോത്സാഹിപ്പിച്ചു. പ്രധാനമന്ത്രി മത്സ്യ സമ്പദാ യോജന, പ്രധാനമന്ത്രി മത്സ്യ കിസാൻ സമൃദ്ധി സഹയോജന എന്നിവ ഉൾപ്പെടെയുള്ള സർക്കാർ പദ്ധതികളുടെ ആനുകൂല്യങ്ങൾ പ്രയോജനപ്പെടുത്തണമെന്നും നിർദേശിച്ചു.

കടൽപ്പായൽ കൃഷിക്ക് അനുയോജ്യമായ 384 സ്ഥലങ്ങൾ

സന്ദർശനത്തിന് ഒരു ദിവസം മുമ്പ് മണ്ഡപത്തെ ഇന്ത്യൻ കാർഷിക ഗവേഷണ കൗൺസിലിന്റെ കേന്ദ്ര സമുദ്രമത്സ്യ ഗവേഷണ സ്ഥാപനത്തിന്റെ പ്രാദേശിക കേന്ദ്രത്തിൽ കടൽപ്പായൽ കൃഷി സംബന്ധിച്ച യോഗത്തിന് ഡോ. ലിഖി അധ്യക്ഷത വഹിച്ചു. കൃഷിപദ്ധതികളുടെ പുരോഗതി വിലയിരുത്തി. ഉൽപ്പാദനം കൂട്ടാനും മൂല്യവർധിത ഉൽപ്പന്നങ്ങൾ വികസിപ്പിക്കാനും വിപണിയുമായി ബന്ധിപ്പിക്കാനുമുള്ള നടപടികൾ ചർച്ച ചെയ്തു. തീരദേശ സംസ്ഥാനങ്ങളുടെയും കേന്ദ്രഭരണ പ്രദേശങ്ങളുടെയും പ്രതിനിധികൾ, ഗവേഷണ സ്ഥാപനങ്ങൾ, സാങ്കേതിക ഏജൻസികൾ, രാജ്യത്തിന്റെ വിവിധ ഭാഗങ്ങളിലെ കടൽപ്പായൽ മേഖലയുമായി ബന്ധപ്പെട്ടവർ എന്നിവർ പങ്കെടുത്തു. ഇന്ത്യയിൽ കടൽപ്പായൽ കൃഷിക്ക് വലിയ സാധ്യതയുണ്ടെന്ന് സെക്രട്ടറി പറഞ്ഞു. രാജ്യത്തിന്റെ 11,099 കിലോമീറ്റർ തീരപ്രദേശം ഈ മേഖല വിപുലീകരിക്കാൻ അനുകൂലമാണ്. തീരദേശ സംസ്ഥാനങ്ങളിലും കേന്ദ്രഭരണ പ്രദേശങ്ങളിലുമായി 24,707 ഹെക്ടർ വിസ്തൃതിയുള്ള 384 അനുയോജ്യ സ്ഥലങ്ങൾ ഗവേഷണ സ്ഥാപനങ്ങൾ കണ്ടെത്തിയിട്ടുണ്ട്.

181.11 കോടി രൂപയുടെ പദ്ധതികൾക്ക് അംഗീകാരം

തൊഴിലവസരങ്ങൾ സൃഷ്ടിക്കാനും മത്സ്യത്തൊഴിലാളികളുടെയും തീരദേശ ജനങ്ങളുടെയും വരുമാനം കൂട്ടാനുമായി പ്രധാനമന്ത്രി മത്സ്യ സമ്പദാ യോജനയിൽ കടൽപ്പായൽ കൃഷിക്ക് മുൻഗണന നൽകിയിട്ടുണ്ടെന്ന് സെക്രട്ടറി അറിയിച്ചു. 2020–27 കാലയളവിൽ കടൽപ്പായൽ വികസനത്തിനായി 181.11 കോടി രൂപയുടെ പദ്ധതികൾക്ക് അംഗീകാരം നൽകിയിട്ടുണ്ട്. തമിഴ്‌നാട്ടിലെ കടൽപ്പായൽ പാർക്കും ഇതിൽ ഉൾപ്പെടുന്നു. കടൽപ്പായൽ കൃഷിക്കായി 37,255 ചങ്ങാടങ്ങളും 44,080 ഒറ്റക്കയർ യൂണിറ്റുകളും സ്ഥാപിക്കാൻ സാമ്പത്തിക സഹായം നൽകിയിട്ടുണ്ട്. വിത്ത് ബാങ്കുകൾ, ബോധവത്കരണം, പരിശീലനം, പ്രവർത്തനശേഷി വർധിപ്പിക്കുന്ന പരിപാടികൾ എന്നിവയ്ക്കും പിന്തുണ നൽകുന്നു. കേന്ദ്ര ഫിഷറീസ് വകുപ്പിലെ സമുദ്രമത്സ്യമേഖലാ ജോയിന്റ് സെക്രട്ടറി ഡോ. സുരഭി റായ്, ഉൾനാടൻ മത്സ്യമേഖലാ ജോയിന്റ് സെക്രട്ടറി ഗുഞ്ജൻ കൃഷ്ണ, ഇന്ത്യൻ കാർഷിക ഗവേഷണ കൗൺസിലിലെ ഫിഷറീസ് സയൻസ് ഡെപ്യൂട്ടി ഡയറക്ടർ ജനറൽ ഡോ. ജെ. കെ. ജേന, ദേശീയ മത്സ്യവികസന ബോർഡ് ചീഫ് എക്സിക്യൂട്ടീവ് ഡോ. ബിജയ് കുമാർ ബെഹ്റ എന്നിവർ യോഗത്തിൽ പങ്കെടുത്തു. കേന്ദ്ര ഫിഷറീസ് വകുപ്പിലെയും സംസ്ഥാന മത്സ്യവകുപ്പുകളിലെയും ഉദ്യോഗസ്ഥർ നേരിട്ടും ഓൺലൈനായും പങ്കാളികളായി.

വിത്ത് ബാങ്കുകൾ മുതൽ വിപണിവരെ നടപടികൾ

കടൽപ്പായൽ മേഖലയുടെ വളർച്ച വേഗത്തിലാക്കാനുള്ള പ്രധാന നടപടികൾ യോഗം ചർച്ച ചെയ്തു. നേരത്തേ നിശ്ചയിച്ച വികസന നടപടികൾ നടപ്പാക്കുക, വിവിധ ഏജൻസികൾ തമ്മിലുള്ള ഏകോപനം ശക്തമാക്കുക, പ്രാദേശികതലത്തിൽ വിത്ത് ബാങ്കുകൾ സ്ഥാപിക്കുക എന്നിവ ഇതിൽ ഉൾപ്പെടുന്നു. പ്രധാനമന്ത്രി മത്സ്യ സമ്പദാ യോജനയുടെ പിന്തുണയുള്ള പദ്ധതികൾ നടപ്പാക്കുന്നതിലെ തടസ്സങ്ങൾ പരിഹരിക്കുന്നതും സംരംഭകത്വവും വിപണിബന്ധവും പ്രോത്സാഹിപ്പിക്കുന്നതും ചർച്ചയായി. തീരത്തുനിന്ന് അകലെയുള്ള കടലിൽ കടൽപ്പായൽ കൃഷിക്ക് സൗകര്യമൊരുക്കുക, കൂടുതൽ കർഷകരിലേക്ക് സഹായവും വിവരങ്ങളും എത്തിക്കുക, പരിശീലനത്തിലൂടെ അവരുടെ കഴിവുകൾ മെച്ചപ്പെടുത്തുക എന്നിവയ്ക്കും പ്രാധാന്യം നൽകി. തമിഴ്‌നാട് കടൽപ്പായൽ പാർക്ക് പ്രവർത്തനക്ഷമമാക്കുന്നത് വേഗത്തിലാക്കണമെന്നും യോഗം വിലയിരുത്തി. ഭക്ഷണം, മൃഗങ്ങളുടെ തീറ്റ, വളങ്ങൾ, മറ്റു മൂല്യവർധിത ഉൽപ്പന്നങ്ങൾ എന്നിവയിൽ കടൽപ്പായലിന്റെ ഉപയോഗം വിപുലീകരിക്കാനുള്ള സാധ്യതകളും ചർച്ച ചെയ്തു. സാങ്കേതികവിദ്യയുടെ ഉപയോഗത്തിനും മൂല്യവർധനയ്ക്കും സ്ഥിരമായ ഉപജീവനത്തിനും ഊന്നൽ നൽകിയ സെക്രട്ടറി, മേഖലയുടെ സുസ്ഥിരവും സമഗ്രവുമായ വികസനത്തിന് ദീർഘകാല പ്രവർത്തനരേഖ തയ്യാറാക്കേണ്ടതിന്റെ ആവശ്യകതയും വ്യക്തമാക്കി.

ഉൽപ്പാദനം ഉയർന്നു; ലക്ഷദ്വീപിൽ പ്രത്യേക ക്ലസ്റ്റർ

ഉപജീവനമാർഗങ്ങൾ സൃഷ്ടിക്കാനും തീരദേശ സമൂഹങ്ങളുടെ വികസനത്തിനും സമുദ്രത്തിലെ ജൈവവിഭവങ്ങളെ അടിസ്ഥാനമാക്കിയുള്ള സാമ്പത്തിക പ്രവർത്തനങ്ങൾ പ്രോത്സാഹിപ്പിക്കാനും കഴിയുന്നതിനാൽ ഇന്ത്യയുടെ നീല സമ്പദ്‌വ്യവസ്ഥാ പ്രവർത്തനങ്ങളിൽ കടൽപ്പായൽ കൃഷിക്ക് മുൻഗണന ലഭിച്ചിട്ടുണ്ട്. രാജ്യത്തെ കടൽപ്പായൽ ഉൽപ്പാദനം 2015ലെ 18,890 ടണ്ണിൽനിന്ന് 2024ൽ 74,083 ടണ്ണായും 2025ൽ 82,728 ടണ്ണായും ഉയർന്നു. ഉൽപ്പാദനം മുതൽ വിപണനം വരെയുള്ള ശൃംഖല ശക്തമാക്കാനും മത്സരശേഷിയും കയറ്റുമതി സാധ്യതയും വർധിപ്പിക്കാനും ഫിഷറീസ് വകുപ്പ് ക്ലസ്റ്റർ അടിസ്ഥാനത്തിലുള്ള സമീപനം സ്വീകരിച്ചിട്ടുണ്ട്. രാജ്യത്താകെ 34 മത്സ്യ ഉൽപ്പാദന–സംസ്‌കരണ ക്ലസ്റ്ററുകൾ വിജ്ഞാപനം ചെയ്തു. ഇതിന്റെ ഭാഗമായി ലക്ഷദ്വീപിനെ കടൽപ്പായൽ ക്ലസ്റ്ററായി പ്രഖ്യാപിച്ചിട്ടുണ്ട്. മണ്ഡപത്തെ കേന്ദ്ര സമുദ്രമത്സ്യ ഗവേഷണ സ്ഥാപനത്തിന്റെ പ്രാദേശിക കേന്ദ്രത്തെ കടൽപ്പായൽ വികസനത്തിനും ഗവേഷണത്തിനുമുള്ള മികവിന്റെ കേന്ദ്രമായി നിയോഗിച്ചു. മേഖലയുടെ ഏകോപിത വികസനത്തിനായി കടൽപ്പായൽ വികസന അന്തർമന്ത്രാലയ സമിതിയും സാങ്കേതിക ഉപദേശക സമിതിയും രൂപീകരിച്ചിട്ടുണ്ട്.

.