ന്യൂഡൽഹി / 2026 / ഒക്ടോബർ 10
രാജ്യത്തെ യുവാക്കളുടെ സാങ്കേതിക ആശയങ്ങളെ പ്രായോഗിക പരിഹാരങ്ങളാക്കി മാറ്റാൻ ലക്ഷ്യമിട്ടുള്ള ഫൈവ്‌ജി യൂസ് കേസ് ലാബ് ശിൽപ്പശാല കേന്ദ്രമന്ത്രി ജ്യോതിരാദിത്യ എം. സിന്ധ്യ ഉദ്ഘാടനം ചെയ്തു. പത്താമത് ഇന്ത്യ മൊബൈൽ കോൺഗ്രസ് വേദിയിൽ ഒക്ടോബർ ഒമ്പതിനായിരുന്നു പരിപാടി. വാർത്താവിനിമയത്തിന്റെയും വടക്കുകിഴക്കൻ മേഖലാ വികസനത്തിന്റെയും ചുമതലയുള്ള മന്ത്രി, ഇന്ത്യയുടെ ഫൈവ്‌ജി, സിക്‌സ്‌ജി മുന്നേറ്റത്തിൽ വിദ്യാർഥികൾക്കും ഗവേഷകർക്കുമുള്ള പങ്ക് എടുത്തുപറഞ്ഞു. തദ്ദേശീയ കണ്ടുപിടിത്തങ്ങളും ഗവേഷണവും ശക്തിപ്പെടുത്തുന്നതിനൊപ്പം വിദ്യാഭ്യാസ സ്ഥാപനങ്ങളെയും വ്യവസായ മേഖലയെയും ബന്ധിപ്പിക്കുകയാണ് ഈ സംരംഭത്തിന്റെ ലക്ഷ്യം.
ഗവേഷണങ്ങൾ ലാബുകളിൽ ഒതുങ്ങരുത്
ബുദ്ധിപരമായി പ്രവർത്തിക്കുന്ന നെറ്റ്‌വർക്കുകൾ സൃഷ്ടിക്കുന്നതും ഫൈവ്‌ജി അഡ്വാൻസ്ഡ്, സിക്‌സ്‌ജി കാലഘട്ടത്തിലേക്ക് നയിക്കുന്ന കണ്ടുപിടിത്തങ്ങളുമായിരുന്നു ശിൽപ്പശാലയുടെ പ്രമേയം. വിദ്യാഭ്യാസ സ്ഥാപനങ്ങളിലെ ഗവേഷണങ്ങളെ സാങ്കേതികവിദ്യയുടെ സഹായത്തോടെയുള്ള പ്രായോഗിക പരിഹാരങ്ങളാക്കി വേഗത്തിൽ മാറ്റാനാണ് ശ്രമം. പുതിയ ഫൈവ്‌ജി ആപ്ലിക്കേഷനുകൾ വികസിപ്പിക്കുന്നതിലും അടുത്ത തലമുറ വാർത്താവിനിമയ സാങ്കേതികവിദ്യകൾക്കായി രാജ്യത്തെ പ്രതിഭകളെ സജ്ജമാക്കുന്നതിലും വിദ്യാർഥികൾക്കും ഗവേഷകർക്കും വിദ്യാഭ്യാസ സ്ഥാപനങ്ങൾക്കും നിർണായക പങ്കുണ്ട്. ഗവേഷണവും വ്യവസായ മേഖലയുടെ ആവശ്യങ്ങളും തമ്മിലുള്ള വിടവ് നികത്തേണ്ടതിന്റെ ആവശ്യകതയും ശിൽപ്പശാല ചൂണ്ടിക്കാട്ടി. ഈ ലാബുകളിലൂടെ പുതിയ സാങ്കേതികവിദ്യകൾ പരിചയപ്പെടാനും യഥാർഥ സാഹചര്യങ്ങളിൽ അവ പരീക്ഷിക്കാനും വിവിധ മേഖലകൾക്ക് പ്രയോജനപ്പെടുന്ന പരിഹാരങ്ങൾ വികസിപ്പിക്കാനും കഴിയും. നിർമിതബുദ്ധിയെ അടിസ്ഥാനമാക്കിയ നെറ്റ്‌വർക്കുകൾ, ബുദ്ധിപരമായ കണക്റ്റിവിറ്റി, കൂടുതൽ വ്യാപകമായി ഉപയോഗിക്കാവുന്ന ഫൈവ്‌ജി പ്രയോഗങ്ങൾ, സിക്‌സ്‌ജി സ്പെക്ട്രത്തിനുള്ള പ്രവർത്തനരേഖ, ആഗോള മാനദണ്ഡങ്ങൾ രൂപപ്പെടുത്തൽ, വ്യവസായ–വിദ്യാഭ്യാസ സഹകരണം എന്നിവയും ചർച്ചാവിഷയങ്ങളായി.
നാളത്തെ നെറ്റ്‌വർക്കുകൾ യുവാക്കളുടെ മനസ്സിലും പിറക്കും
നാളത്തെ നെറ്റ്‌വർക്കുകളുടെ ആശയങ്ങൾ പ്രദർശനഹാളുകളിൽ മാത്രമല്ല, സർവകലാശാലകളിലും ഗവേഷണ ലാബുകളിലും യുവാക്കളുടെ മനസ്സിലും പിറക്കുമെന്ന് സിന്ധ്യ പറഞ്ഞു. അടിസ്ഥാനസൗകര്യം ഒരുക്കാൻ മാത്രമല്ല, ഇന്ത്യയ്ക്കും ലോകത്തിനും വേണ്ട പരിഹാരങ്ങൾ വികസിപ്പിക്കാൻ കഴിയുന്ന യുവാക്കളെ വളർത്താനാണ് നൂറ് ഫൈവ്‌ജി യൂസ് കേസ് ലാബുകൾ സ്ഥാപിച്ചതെന്നും അദ്ദേഹം വ്യക്തമാക്കി. സാധാരണ അടിസ്ഥാനസൗകര്യ വികസനത്തിനപ്പുറം കണ്ടുപിടിത്തങ്ങളെ പ്രോത്സാഹിപ്പിക്കണമെന്ന് ടെലികമ്മ്യൂണിക്കേഷൻസ് വകുപ്പ് സെക്രട്ടറി അമിത് അഗർവാൾ പറഞ്ഞു. വാർത്താവിനിമയത്തിന്റെ ഭാവി രൂപപ്പെടുത്താൻ രാജ്യത്തെ വിദ്യാഭ്യാസ–ഗവേഷണ മേഖലയെ ശക്തിപ്പെടുത്തണമെന്നും അദ്ദേഹം ആവശ്യപ്പെട്ടു. വിദ്യാഭ്യാസ സ്ഥാപനങ്ങൾ, വ്യവസായം, ഗവേഷണ സ്ഥാപനങ്ങൾ എന്നിവയുടെ സഹകരണത്തിലൂടെ സാങ്കേതിക വികസനം വേഗത്തിലാക്കാനും തദ്ദേശീയ പരിഹാരങ്ങൾ പ്രോത്സാഹിപ്പിക്കാനുമുള്ള സർക്കാർ നിലപാട് ശിൽപ്പശാല ആവർത്തിച്ചു. യുവാക്കളെയും ഗവേഷണത്തെയും മുന്നിൽനിർത്തുന്ന ഈ സംരംഭം, വാർത്താവിനിമയ കണ്ടുപിടിത്തങ്ങളുടെ ആഗോള കേന്ദ്രമായി ഇന്ത്യയെ വളർത്താനും സാങ്കേതികമായി ശക്തവും സ്വയംപര്യാപ്തവുമായ രാജ്യമെന്ന ലക്ഷ്യത്തിന് കരുത്തേകാനും ഉദ്ദേശിച്ചുള്ളതാണ്.
ഹാക്കത്തോൺ വിജയികൾക്കും സുരക്ഷാ പരിശീലനം നേടിയ ഉദ്യോഗസ്ഥർക്കും ആദരം
ഉദ്ഘാടനച്ചടങ്ങിൽ ഫൈവ്‌ജി ഇന്നൊവേഷൻ ഹാക്കത്തോൺ രണ്ടാം പതിപ്പിലെ വിജയികൾക്ക് സിന്ധ്യ പുരസ്കാരങ്ങൾ നൽകി. ഇന്ത്യയിലെ യുവപ്രതിഭകളുടെ കഴിവ് തെളിയിച്ച വിജയികളെയും അവസാനഘട്ടത്തിലെത്തിയ അമ്പത് ടീമുകളെയും അദ്ദേഹം അഭിനന്ദിച്ചു. പങ്കെടുത്ത ആയിരത്തിനാനൂറ് ടീമുകളും പുതിയ ആശയങ്ങളും സാങ്കേതിക പരിഹാരങ്ങളും തേടുന്നത് തുടരണമെന്നും മന്ത്രി ആവശ്യപ്പെട്ടു. നെറ്റ്‌വർക്ക്, മൊബൈൽ സുരക്ഷ എന്നിവയിൽ പ്രത്യേക ശേഷിവികസന പരിശീലനം പൂർത്തിയാക്കിയ ടെലികമ്മ്യൂണിക്കേഷൻസ് വകുപ്പ് ഉദ്യോഗസ്ഥരെയും അദ്ദേഹം അഭിനന്ദിച്ചു. സി.ഐ.എസ്.എസ്.പി., സി.ഇ.എച്ച്., പെൻടെസ്റ്റ്, സൈസ തുടങ്ങിയ അന്താരാഷ്ട്ര സർട്ടിഫിക്കേഷനുകൾ ഉൾപ്പെട്ടതായിരുന്നു പരിശീലനം. രാജ്യത്തിന്റെ ഡിജിറ്റൽ അടിസ്ഥാനസൗകര്യങ്ങളുടെ സുരക്ഷ ശക്തിപ്പെടുത്തുന്നതിലുള്ള അവരുടെ പങ്ക് അംഗീകരിച്ച് മന്ത്രി സർട്ടിഫിക്കറ്റുകളും ബാഡ്ജുകളും വിതരണം ചെയ്തു. രണ്ടായിരത്തിനാല്പത്തിയേഴോടെ വികസിത ഭാരതമെന്ന ലക്ഷ്യത്തിലേക്ക് മുന്നേറുന്നതിൽ ഫൈവ്‌ജി അഡ്വാൻസ്ഡ്, സിക്‌സ്‌ജി, ഗവേഷണ ലാബുകൾ എന്നിവയുടെ പ്രാധാന്യവും അദ്ദേഹം എടുത്തുപറഞ്ഞു. ഇന്ത്യയിൽ രൂപകൽപ്പന ചെയ്ത് നിർമിക്കുന്നതും ലോകത്തിന് വിശ്വസിക്കാവുന്നതുമായ ബുദ്ധിപരമായ നെറ്റ്‌വർക്കുകൾ വികസിപ്പിക്കാൻ കൂട്ടായ ശ്രമം വേണമെന്ന് ആവശ്യപ്പെട്ട മന്ത്രി ഏകദിന ശിൽപ്പശാല ഔദ്യോഗികമായി ഉദ്ഘാടനം ചെയ്തു. കണ്ടുപിടിത്തങ്ങൾ മത്സരങ്ങളിലും പ്രാഥമിക മാതൃകകളിലും ഒതുങ്ങാതെ ബൗദ്ധികസ്വത്ത് സൃഷ്ടിക്കൽ, സംരംഭകത്വം, വ്യവസായ പങ്കാളിത്തം, വാണിജ്യാടിസ്ഥാനത്തിലുള്ള ഉപയോഗം എന്നിവയിലേക്ക് വളരണമെന്ന് അമിത് അഗർവാൾ പറഞ്ഞു. ഗവേഷണം, വ്യവസായ ആവശ്യങ്ങൾ, ദേശീയ സാങ്കേതിക മുൻഗണനകൾ എന്നിവയെ ബന്ധിപ്പിച്ച് സാങ്കേതികവിദ്യ സ്വീകരിക്കുന്ന ഘട്ടത്തിൽനിന്ന് സ്വന്തമായി വികസിപ്പിക്കുന്ന ഘട്ടത്തിലേക്ക് ഇന്ത്യയെ എത്തിക്കേണ്ടതിന്റെ ആവശ്യകതയും ശിൽപ്പശാല വ്യക്തമാക്കി. ഗവേഷണവും സംരംഭകത്വവും പ്രോത്സാഹിപ്പിക്കാനും വിദ്യാഭ്യാസ സ്ഥാപനങ്ങൾ, സ്റ്റാർട്ടപ്പുകൾ, വ്യവസായം എന്നിവയുടെ സഹകരണം ശക്തിപ്പെടുത്താനുമുള്ള പ്രതിബദ്ധത വകുപ്പ് ആവർത്തിച്ചു.
നൂറ് ലാബുകൾ; അറുനൂറ്റിമുപ്പത്തിനാല് ഉൽപ്പന്നങ്ങളും പ്രയോഗങ്ങളും
രാജ്യത്തെ വിദ്യാഭ്യാസ സ്ഥാപനങ്ങൾക്ക് നൂറ് ഫൈവ്‌ജി യൂസ് കേസ് ലാബുകൾ പ്രധാനമന്ത്രി നരേന്ദ്ര മോദി അനുവദിച്ചത് രണ്ടായിരത്തിയിരുപത്തിമൂന്ന് ഒക്ടോബറിലാണ്. തൊണ്ണൂറ്റിയേഴ് കോടി അറുപത്തിയേഴ് ലക്ഷം രൂപയുടെ സർക്കാർ പദ്ധതിയിൽ സ്ഥാപിച്ച എല്ലാ ലാബുകളും രണ്ടായിരത്തിയിരുപത്തിയഞ്ച് ഏപ്രിലോടെ പ്രവർത്തനസജ്ജമായി. പ്രായോഗിക പഠനം ശക്തിപ്പെടുത്തുക, ഫൈവ്‌ജി ഗവേഷണവും വികസനവും പ്രോത്സാഹിപ്പിക്കുക, വ്യവസായ–വിദ്യാഭ്യാസ സഹകരണം വളർത്തുക എന്നിവയാണ് ലക്ഷ്യങ്ങൾ. പുതിയ ആപ്ലിക്കേഷനുകൾ വികസിപ്പിക്കാൻ സ്റ്റാർട്ടപ്പുകൾക്കും സൂക്ഷ്മ, ചെറുകിട, ഇടത്തരം സംരംഭങ്ങൾക്കും ഫൈവ്‌ജി അടിസ്ഥാനസൗകര്യം ഉപയോഗിക്കാനും പദ്ധതി അവസരമൊരുക്കുന്നു. രണ്ടായിരത്തിയിരുപത്തിയാറ് ഓഗസ്റ്റോടെ പതിനേഴായിരത്തിനാനൂറിലധികം വിദ്യാർഥികൾ ലാബുകൾ ഉപയോഗിച്ചു. തൊണ്ണൂറ്റിയേഴ് സ്ഥാപനങ്ങൾ ഫൈവ്‌ജി കോഴ്‌സുകൾ നടത്തുന്നുണ്ട്. ഇവയിൽ ഇരുപത്തിയൊന്നായിരത്തിലധികം വിദ്യാർഥികൾ ചേർന്നു. അറുനൂറ്റിമുപ്പത്തിനാല് ഉൽപ്പന്നങ്ങളും പ്രായോഗിക ഉപയോഗങ്ങളും വികസിപ്പിക്കാൻ പദ്ധതി സഹായിച്ചു. ബൗദ്ധികസ്വത്തവകാശവുമായി ബന്ധപ്പെട്ട നൂറ്റിയമ്പത്തിയെട്ട് അപേക്ഷകൾ സമർപ്പിച്ചു. മുപ്പത്തിരണ്ട് പേറ്റന്റുകൾ ലഭിച്ചു. പങ്കെടുത്ത സ്ഥാപനങ്ങൾ സ്റ്റാർട്ടപ്പുകൾ, സൂക്ഷ്മ–ചെറുകിട–ഇടത്തരം സംരംഭങ്ങൾ, മറ്റ് വിദ്യാഭ്യാസ–ഗവേഷണ സ്ഥാപനങ്ങൾ എന്നിവയുമായുള്ള പങ്കാളിത്തവും ശക്തിപ്പെടുത്തി.
പുതിയ ആശയങ്ങളുമായി മുപ്പത്തിയഞ്ച് ടീമുകൾ പ്രദർശനത്തിൽ
ഈ വർഷത്തെ ഫൈവ്‌ജി ഇന്നൊവേഷൻ ഹാക്കത്തോണിലേക്ക് ആയിരത്തിനാനൂറിലധികം നിർദേശങ്ങൾ ലഭിച്ചു. ഫൈവ്‌ജി അഡ്വാൻസ്ഡ്, നിർമിതബുദ്ധി, ഇന്റർനെറ്റ് ഓഫ് തിങ്‌സ്, ഭൂതലത്തിന് പുറത്തുള്ള സംവിധാനങ്ങളെ ആശ്രയിക്കുന്ന നെറ്റ്‌വർക്കുകൾ, ഫിക്സഡ് വയർലെസ് ആക്സസ്, നെറ്റ്‌വർക്ക് സ്ലൈസിങ്, വാർത്താവിനിമയ സുരക്ഷ തുടങ്ങിയ മേഖലകളിലായിരുന്നു നിർദേശങ്ങൾ. നൂറ് ഫൈവ്‌ജി യൂസ് കേസ് ലാബുകളിലൂടെ രൂപപ്പെട്ട കണ്ടുപിടിത്തങ്ങളുടെ അന്തരീക്ഷത്തിന് ഹാക്കത്തോൺ കൂടുതൽ കരുത്തേകി. തിരഞ്ഞെടുക്കപ്പെട്ട അമ്പത് ടീമുകൾക്ക് ആശയങ്ങൾ വികസിപ്പിക്കാനുള്ള പ്രാരംഭ ധനസഹായം നൽകി. ഇതിൽ മുപ്പത്തിയഞ്ച് ടീമുകൾ ഇന്ത്യ മൊബൈൽ കോൺഗ്രസിൽ തങ്ങളുടെ കണ്ടുപിടിത്തങ്ങൾ പ്രദർശിപ്പിക്കുന്നുണ്ട്. പരിഹാരങ്ങൾ അവതരിപ്പിക്കാനും വ്യവസായ മേഖലയിലുള്ളവരുമായി ആശയവിനിമയം നടത്താനും കൂടുതൽ വികസനത്തിനും വാണിജ്യ ഉപയോഗത്തിനുമുള്ള സാധ്യതകൾ തേടാനും ഇതിലൂടെ അവസരം ലഭിക്കുന്നു.
