ന്യൂഡൽഹി  / 2026  / ഒക്ടോബർ 08

വികസിത ഭാരതത്തിനായി മനുഷ്യവിഭവശേഷി ശക്തിപ്പെടുത്താനുള്ള നിർദേശങ്ങളിൽ പ്രവർത്തിക്കുന്ന ഒമ്പത് സമിതികളുടെ പുരോഗതി ഇന്ത്യൻ കാർഷിക ഗവേഷണ കൗൺസിൽ വിലയിരുത്തി. ഒക്ടോബർ ഏഴിന് നടന്ന യോഗത്തിൽ കാർഷിക ഗവേഷണ, വിദ്യാഭ്യാസ വകുപ്പ് സെക്രട്ടറിയും ഐസിഎആർ ഡയറക്ടർ ജനറലുമായ ഡോ. എം. എൽ. ജാട്ട് അധ്യക്ഷനായി. 2025 ഡിസംബറിൽ നടന്ന അഞ്ചാമത് ചീഫ് സെക്രട്ടറിമാരുടെ ദേശീയ സമ്മേളനത്തിൽ ഉയർന്ന പ്രധാന നിർദേശങ്ങൾ നടപ്പാക്കാനാണ് സമിതികൾ രൂപീകരിച്ചത്. ഉന്നത വിദ്യാഭ്യാസം, നൈപുണ്യം, നവീകരണം, ശേഷിവികസനം എന്നിവയുമായി ബന്ധപ്പെട്ട 28 കാര്യങ്ങളിലാണ് ഇവ പ്രവർത്തിക്കുന്നത്. സമിതികളുടെ പുരോഗതി പരിശോധിക്കാനും സമയബന്ധിതമായി നടപ്പാക്കാവുന്ന ശുപാർശകൾ തയ്യാറാക്കാൻ സഹായിക്കാനുമായിരുന്നു യോഗം.

ശുപാർശകൾക്ക് തെളിവും കണക്കുകളും വേണം

വികസിത ഭാരതത്തിലേക്കുള്ള മുന്നേറ്റത്തിൽ മനുഷ്യവിഭവശേഷിയും ഉന്നത വിദ്യാഭ്യാസവും ശക്തിപ്പെടുത്തണമെന്ന് ഡോ. എം. എൽ. ജാട്ട് പറഞ്ഞു. ഇതിനുള്ള ശുപാർശകൾ തെളിവുകളുടെ അടിസ്ഥാനത്തിലുള്ളതാകണം. അവയുടെ ഫലം അളക്കാനാകണം. പ്രായോഗികമായി നടപ്പാക്കാനും കഴിയണം. പ്രസക്തമായ കണക്കുകൾ, രേഖപ്പെടുത്തിയ തെളിവുകൾ, മികച്ച പ്രവർത്തനരീതികൾ എന്നിവ ശുപാർശകൾക്ക് പിന്തുണയാകണമെന്നും അദ്ദേഹം വ്യക്തമാക്കി. ഇതിലൂടെ നിർദേശങ്ങൾ ഫലപ്രദമായി നടപ്പാക്കാനും നേട്ടങ്ങൾ അളക്കാനും കഴിയും.

സമിതികൾ ഒന്നിച്ചുനീങ്ങണം; സമയപരിധി പാലിക്കണം

യോഗത്തിന്റെ തുടക്കത്തിൽ സംസാരിച്ച ഐസിഎആർ കാർഷിക വിദ്യാഭ്യാസ വിഭാഗം ഡെപ്യൂട്ടി ഡയറക്ടർ ജനറൽ ഡോ. യശ്പാൽ സിങ് മാലിക്, സമിതികളുടെ ഏകോപിത പ്രവർത്തനത്തിന്റെ പ്രാധാന്യം ചൂണ്ടിക്കാട്ടി. കണ്ടെത്തിയ കാര്യങ്ങളിൽ നിശ്ചിത സമയപരിധിക്കുള്ളിൽ നടപടിയുണ്ടാകണം. ചീഫ് സെക്രട്ടറിമാരുടെ ദേശീയ സമ്മേളനത്തിലെ ചർച്ചകൾ വ്യക്തവും നടപ്പാക്കാവുന്നതുമായ ഫലങ്ങളിലേക്ക് എത്തിക്കാൻ ചിട്ടയായ സമീപനം വേണമെന്നും അദ്ദേഹം പറഞ്ഞു.

നേട്ടങ്ങളും പോരായ്മകളും അവതരിപ്പിച്ചു

ഒമ്പത് സമിതികളുടെയും മെമ്പർ സെക്രട്ടറിമാർ തങ്ങളുടെ ചുമതലയിലുള്ള കാര്യങ്ങളിലെ പുരോഗതി യോഗത്തിൽ അവതരിപ്പിച്ചു. പ്രധാന നേട്ടങ്ങൾ, നേരത്തേ കണ്ടെത്തിയ മേഖലകളിലെ മുന്നേറ്റം, നിലവിലുള്ള പോരായ്മകൾ, നിർദേശിക്കുന്ന ശുപാർശകൾ എന്നിവ വിശദീകരിച്ചു. പ്രസക്തമായ കണക്കുകളും തെളിവുകളും മികച്ച പ്രവർത്തനരീതികളും ഉപയോഗിച്ച് ശുപാർശകൾ കൂടുതൽ ശക്തമാക്കുന്നതിനെക്കുറിച്ചും ചർച്ച നടന്നു.

കൂടുതൽ ശ്രദ്ധ വേണ്ട മേഖലകൾ കണ്ടെത്തി

സമിതികളുടെ പുരോഗതി വിലയിരുത്താനും കൂടുതൽ ശ്രദ്ധ ആവശ്യമായ മേഖലകൾ കണ്ടെത്താനും അവലോകനം അവസരമൊരുക്കി. ഉന്നത വിദ്യാഭ്യാസം, നൈപുണ്യം, നവീകരണം, ശേഷിവികസനം എന്നിവ ശക്തിപ്പെടുത്താനുള്ള നിലവിലെ ശ്രമങ്ങൾ ഏകോപിപ്പിക്കുന്നതിനും യോഗം സഹായിച്ചു. തുടർപരിഗണനയ്ക്കും നടപടികൾക്കുമായി തെളിവുകളുടെ അടിസ്ഥാനത്തിലുള്ളതും ഫലം അളക്കാനാകുന്നതും നടപ്പാക്കാവുന്നതുമായ ശുപാർശകൾ സമിതികൾ സമയബന്ധിതമായി സമർപ്പിക്കണമെന്ന നിർദേശത്തോടെയാണ് യോഗം അവസാനിച്ചത്.