ന്യൂഡൽഹി /  2026  /  ഒക്ടോബർ 5

പെൻഷൻകാരുടെയും കുടുംബങ്ങളുടെയും ജീവിതം കൂടുതൽ എളുപ്പമാക്കാൻ പെൻഷൻ സേവനങ്ങൾ ലളിതവും എല്ലാവർക്കും ലഭ്യമാകുന്നതുമാക്കുമെന്ന് കേന്ദ്ര സഹമന്ത്രി ഡോ. ജിതേന്ദ്ര സിങ്. ന്യൂഡൽഹിയിലെ ഇന്ത്യൻ ഇൻസ്റ്റിറ്റ്യൂട്ട് ഓഫ് പബ്ലിക് അഡ്മിനിസ്ട്രേഷനിലെ ടി. എൻ. ചതുർവേദി മെമ്മോറിയൽ ഹാളിൽ തിങ്കളാഴ്ച നടന്ന പതിനേഴാമത് അഖിലേന്ത്യാ പെൻഷൻ അദാലത്തിലാണ് മന്ത്രി ഇക്കാര്യം പറഞ്ഞത്. പെൻഷൻ ആൻഡ് പെൻഷനേഴ്സ് വെൽഫെയർ വകുപ്പ് സംഘടിപ്പിച്ച അദാലത്തിൽ പരിഗണിച്ച, ഏറെക്കാലമായി തീർപ്പാകാതെ കിടന്ന 897 പരാതികളിൽ 756 എണ്ണം പരിഹരിച്ചു. പരാതി പരിഹാര നിരക്ക് 84.2 ശതമാനമാണ്. കുടുംബ പെൻഷൻകാരുടെയും ഏറ്റവും ഉയർന്ന പ്രായത്തിലുള്ള പെൻഷൻകാരുടെയും പരാതികൾ വേഗത്തിൽ തീർപ്പാക്കുന്നതിനും അവരുടെ ക്ഷേമം ഉറപ്പാക്കുന്നതിനുമായിരുന്നു അദാലത്തിൽ മുൻഗണന.

പരിഷ്‌കാരങ്ങളുടെ ഗുണം അവസാനത്തെ ആളിലേക്കും എത്തണം

ശാസ്ത്ര സാങ്കേതികം, ഭൗമശാസ്ത്രം എന്നീ വകുപ്പുകളുടെ സ്വതന്ത്ര ചുമതലയുള്ള കേന്ദ്ര സഹമന്ത്രിയാണ് ഡോ. ജിതേന്ദ്ര സിങ്. പ്രധാനമന്ത്രിയുടെ ഓഫീസ്, പേഴ്സണൽ, പൊതുപരാതികൾ, പെൻഷൻ, ആണവോർജം, ബഹിരാകാശം എന്നീ മേഖലകളുടെ സഹമന്ത്രി ചുമതലയും അദ്ദേഹത്തിനുണ്ട്. പെൻഷൻകാരുടെ അനുഭവങ്ങളും ബുദ്ധിമുട്ടുകളും മനസ്സിലാക്കി നിലവിലെ സംവിധാനത്തിലെ പോരായ്മകൾ തുടർച്ചയായി പരിഹരിക്കണമെന്ന് അദ്ദേഹം പറഞ്ഞു. പെൻഷൻ വിതരണത്തിലെ വിടവുകൾ കണ്ടെത്തണം. സാങ്കേതിക പുരോഗതി മാത്രമാകരുത് പരിഷ്‌കാരങ്ങളുടെ ലക്ഷ്യം. അതിന്റെ ഗുണം അവസാനത്തെ ഗുണഭോക്താവിലേക്കും എത്തുകയും അവരുടെ ജീവിതത്തിൽ വ്യക്തമായ മാറ്റമുണ്ടാക്കുകയും വേണം. 2017ൽ ‘പഞ്ചായത്ത് അദാലത്ത്’ എന്ന ആശയം അവതരിപ്പിച്ചതിന് പ്രധാനമന്ത്രി നരേന്ദ്ര മോദിയെ മന്ത്രി അഭിനന്ദിച്ചു. ഒക്ടോബർ അഞ്ചുവരെ 756 പരാതികൾ പരിഹരിച്ചെന്നും ശേഷിക്കുന്നവ വരുംദിവസങ്ങളിൽ തീർപ്പാക്കാനുള്ള നടപടികൾ തുടരുകയാണെന്നും അദ്ദേഹം വ്യക്തമാക്കി. സമയബന്ധിതമായ പരാതി പരിഹാരത്തിനും പെൻഷൻകാരുടെ ക്ഷേമത്തിനുമുള്ള സർക്കാരിന്റെ തുടർച്ചയായ ശ്രദ്ധയുടെ ഭാഗമാണിത്.

മുഖം തിരിച്ചറിഞ്ഞുള്ള സേവനങ്ങൾ; ഡിജിറ്റൽ സൗകര്യങ്ങൾ അറിയണം

പെൻഷൻ സേവനങ്ങളിൽ ഡിജിറ്റൽ സാങ്കേതികവിദ്യയുടെ ഉപയോഗം വർധിക്കുകയാണെന്ന് മന്ത്രി പറഞ്ഞു. ഡിജിറ്റൽ തിരിച്ചറിയലും മുഖം തിരിച്ചറിയുന്ന സംവിധാനങ്ങളും ഉപയോഗിച്ച് നടപടികൾ കൂടുതൽ ലളിതമാക്കാനാണ് ശ്രമം. ഈ സൗകര്യങ്ങളെക്കുറിച്ച് പെൻഷൻകാരെ തുടർച്ചയായി അറിയിക്കണം. അപ്പോഴാണ് ലഭ്യമായ ഡിജിറ്റൽ സേവനങ്ങൾ അവർക്ക് പൂർണമായി ഉപയോഗിക്കാനാകുക. ഡിജിറ്റൽ ലൈഫ് സർട്ടിഫിക്കറ്റ് എളുപ്പത്തിൽ ലഭ്യമാക്കാൻ പ്രചാരണങ്ങളും ബോധവത്കരണ പരിപാടികളും പ്രധാനമാണെന്നും അദ്ദേഹം പറഞ്ഞു. ഇത്തരം പ്രവർത്തനങ്ങൾ ഇതിനകം വലിയ തോതിൽ നടപ്പാക്കിയിട്ടുണ്ട്. കൂടുതൽ ബോധവത്കരണവും കൂടുതൽ ആളുകളിലേക്കുള്ള എത്തിച്ചേരലും അവയുടെ ഫലം ശക്തമാക്കും. രാജ്യത്തെ പെൻഷൻകാരിലേക്ക് പരിഷ്‌കാരങ്ങൾ എത്തിക്കുന്നതിൽ മാധ്യമങ്ങൾക്കും പൊതുജന ആശയവിനിമയത്തിനും പ്രധാന പങ്കുണ്ട്. മുൻകാല ബോധവത്കരണ പരിപാടികൾ നല്ല ഫലം നൽകിയിട്ടുണ്ട്. ലഭ്യമായ സേവനങ്ങളും പരിഷ്‌കാരങ്ങളും പെൻഷൻകാരും കുടുംബങ്ങളും അറിയുന്നുവെന്ന് ഉറപ്പാക്കാൻ ആധുനിക ആശയവിനിമയ മാർഗങ്ങൾ തുടർന്നും ഉപയോഗിക്കണമെന്നും മന്ത്രി ആവശ്യപ്പെട്ടു.

സാങ്കേതികവിദ്യയ്‌ക്കൊപ്പം പെൻഷൻകാരുടെ ആവശ്യങ്ങളും കാണണം

പതിവ് സേവനങ്ങൾ നൽകാൻ മാത്രമല്ല, പ്രശ്നങ്ങൾ കണ്ടെത്താനും പെൻഷൻ ഭരണസംവിധാനം മെച്ചപ്പെടുത്താനും സാങ്കേതികവിദ്യ ഉപയോഗിക്കണമെന്ന് ജിതേന്ദ്ര സിങ് പറഞ്ഞു. പോരായ്മകളോ ഒഴിവാക്കാവുന്ന ബുദ്ധിമുട്ടുകളോ ശ്രദ്ധയിൽപ്പെട്ടാൽ അവ അറിയിക്കുകയും പരിഹരിക്കുകയും വേണം. അങ്ങനെ സംവിധാനത്തെ തുടർച്ചയായി മെച്ചപ്പെടുത്താനാകും. സർക്കാരിന്റെ സമീപനത്തിൽ പെൻഷൻകാരുടെ ക്ഷേമത്തിനാണ് കേന്ദ്രസ്ഥാനം. സാങ്കേതിക മാറ്റങ്ങൾ നടപ്പാക്കുമ്പോൾ പെൻഷൻകാരുടെയും കുടുംബ പെൻഷൻകാരുടെയും ആവശ്യങ്ങൾ കരുതലോടെ കാണണം. പെൻഷൻ നടപടികൾ ലളിതമാക്കാനും കുടുംബങ്ങൾക്ക് ലഭിക്കുന്ന പിന്തുണ മെച്ചപ്പെടുത്താനുമുള്ള ശ്രമങ്ങൾ തുടരുകയാണ്. ഗുണഭോക്താക്കൾ നേരിടുന്ന പ്രായോഗിക ബുദ്ധിമുട്ടുകൾ പരിഹരിക്കാനും അവരുടെ ജീവിതം കൂടുതൽ എളുപ്പമാക്കാനുമാകണം പരിഷ്‌കാരങ്ങൾ സഹായിക്കേണ്ടത്. സേവനങ്ങൾ കൂടുതൽ പ്രാപ്യവും സാങ്കേതികവിദ്യയുടെ സഹായത്തോടെയുള്ളതും പൗരന്മാരുടെ ആവശ്യങ്ങൾക്ക് മുൻഗണന നൽകുന്നതുമാക്കാനാണ് സർക്കാർ പ്രവർത്തിക്കുന്നതെന്നും മന്ത്രി വ്യക്തമാക്കി.

പരാതികൾ നേരിട്ട് കേട്ടു; അനുഭവങ്ങൾ പങ്കുവെച്ച് പ്രസിദ്ധീകരണങ്ങൾ

പെൻഷൻകാരെയും ബന്ധപ്പെട്ട മന്ത്രാലയങ്ങളെയും വകുപ്പുകളെയും ഒരുമിച്ചുകൊണ്ടുവന്ന അദാലത്തിൽ പരാതികൾ അവതരിപ്പിക്കുകയും പരിഗണിക്കുകയും ചെയ്തു. പെൻഷൻ വിഭാഗം ജോയിന്റ് സെക്രട്ടറി ഡോ. ജിതേന്ദ്ര സിങ്ങിനു മുന്നിൽ കേസുകൾ അവതരിപ്പിച്ചു. പരാതികൾ നേരിട്ട് പരിശോധിക്കാനും അവ വേഗത്തിൽ പരിഹരിക്കാൻ ഏകോപിച്ച നടപടികൾ സ്വീകരിക്കാനും ഇതിലൂടെ സാധിച്ചു. പതിനാറാമത് പെൻഷൻ അദാലത്തിലെ വിജയാനുഭവങ്ങൾ വിവരിക്കുന്ന ലഘുലേഖകളും ‘കുടുംബ പെൻഷൻകാരുടെ ജീവിതം എളുപ്പമാക്കുന്നു’ എന്ന ഇലക്ട്രോണിക് ചെറുപുസ്തകവും ചടങ്ങിൽ പുറത്തിറക്കി. പരാതികൾ ഫലപ്രദമായി പരിഹരിക്കാനും പെൻഷൻകാരുടെയും കുടുംബ പെൻഷൻകാരുടെയും സേവനാനുഭവം മെച്ചപ്പെടുത്താനുമുള്ള സർക്കാരിന്റെ തുടർച്ചയായ ശ്രമങ്ങളാണ് ഈ പ്രസിദ്ധീകരണങ്ങൾ അവതരിപ്പിക്കുന്നത്. പെൻഷൻകാരുടെ പരാതികൾ ഫലപ്രദമായും എളുപ്പത്തിൽ സമീപിക്കാവുന്ന രീതിയിലും വേഗത്തിലും പരിഹരിക്കാൻ പെൻഷൻ ആൻഡ് പെൻഷനേഴ്സ് വെൽഫെയർ വകുപ്പ് രൂപപ്പെടുത്തിയ സ്ഥിരം സംവിധാനത്തിന്റെ ഭാഗമാണ് പതിനേഴാമത് പെൻഷൻ അദാലത്ത്.

ഒരാൾക്ക് 2.02 കോടി കുടിശ്ശിക; മറ്റൊരാൾക്ക് 72 ലക്ഷത്തിലേറെ

അദാലത്തിലൂടെ പരിഹാരം ലഭിച്ച ശ്രദ്ധേയമായ കേസുകളിൽ ഒന്നാണ് ചന്ദർ കാന്ത ജല്ലിയുടേത്. അവരുടെ ഭർത്താവ് 1973ൽ ജീവത്യാഗം ചെയ്തിരുന്നു. ചന്ദർ കാന്തയ്ക്ക് ഉദാരവത്കരിച്ച കുടുംബ പെൻഷൻ അനുവദിച്ചിരുന്നെങ്കിലും ചില കാരണങ്ങളാൽ അർഹമായതിലും കുറഞ്ഞ തുകയാണ് ലഭിച്ചിരുന്നത്. ഇക്കാര്യം മനസ്സിലാക്കിയ അവർ വിവിധ വേദികളെ സമീപിച്ചു. അദാലത്തിൽ മകൻ ജസ്വിന്ദർ ജല്ലി ചണ്ഡീഗഢിൽനിന്ന് വിഡിയോ കോൺഫറൻസിലൂടെ പങ്കെടുത്ത് അമ്മയുടെ പരാതി പെൻഷൻ ചുമതലയുള്ള കേന്ദ്ര സഹമന്ത്രിക്കു മുന്നിൽ അവതരിപ്പിച്ചു. കേസ് വിശദമായി ചർച്ച ചെയ്തതിനു പിന്നാലെ 2.02 കോടി രൂപയുടെ കുടുംബ പെൻഷൻ കുടിശ്ശിക അനുവദിച്ചു. മറ്റൊരു കേസിൽ ദമയന്തി സിൻഹയ്ക്ക് അദാലത്തിന്റെ സഹായത്തോടെ 72 ലക്ഷം രൂപയിലേറെ പെൻഷൻ ആനുകൂല്യങ്ങൾ ലഭ്യമാക്കി. ഇരുവരും ഏറ്റവും ഉയർന്ന പ്രായത്തിലുള്ള കുടുംബ പെൻഷൻകാരാണ്.