മിൽപിറ്റാസ്, 2026 സെപ്റ്റംബർ 1 –

അമേരിക്കയിലെ കാലിഫോർണിയയിൽ രണ്ട് മലയാളി യുവതികൾ കൊല്ലപ്പെട്ടു. തിരുവനന്തപുരം കേശവദാസപുരം സ്വദേശിനി ആൻ മേരി മാത്യു (40), തൃശൂർ മുടിക്കോട് സ്വദേശിനി അഞ്ജന ഹരി (35) എന്നിവരാണ് മരിച്ചത്. ഓഗസ്റ്റ് 28ന് മിൽപിറ്റാസിലെ മിൽ ക്രീക്ക് അപ്പാർട്ട്മെന്റ്സ് സമുച്ചയത്തിലാണ് സംഭവം. ആൻ മേരിയെ അപ്പാർട്ട്മെന്റിനുള്ളിൽ കുത്തേറ്റ നിലയിലും അഞ്ജനയെ പാർക്കിങ് സ്ഥലത്ത് വാഹനം ഇടിച്ച് ഗുരുതരമായി പരിക്കേറ്റ നിലയിലുമാണ് കണ്ടെത്തിയത്. ഇരുവരുടെയും മരണം കൊലപാതകമായാണ് പൊലീസ് അന്വേഷിക്കുന്നത്.

പരിചയക്കാരിയായ യുവതി പിടിയിൽ

സംഭവവുമായി ബന്ധപ്പെട്ട് മിൽപിറ്റാസിൽ താമസിക്കുന്ന 32കാരിയെ പൊലീസ് കസ്റ്റഡിയിലെടുത്തു. ബന്ധുക്കൾ ഇവരെ കോട്ടയം മൂന്നിലവ് സ്വദേശിനിയായ അനിലയെന്നാണ് തിരിച്ചറിഞ്ഞത്. കൊല്ലപ്പെട്ട ഇരുവരെയും അനിലയ്ക്ക് പരിചയമുണ്ടായിരുന്നുവെന്നും ഒരേ അപ്പാർട്ട്മെന്റ് സമുച്ചയത്തിലാണ് താമസിച്ചിരുന്നതെന്നും റിപ്പോർട്ടിലുണ്ട്. കുടുംബങ്ങൾക്ക് അമേരിക്കയിൽ നിന്ന് ലഭിച്ച വിവരമനുസരിച്ച് ആൻ മേരിയെ കുത്തിയ ശേഷം അഞ്ജനയെ കാറിടിച്ചതായാണ് ആരോപണം. എന്നാൽ സംഭവത്തിന് പിന്നിലെ കാരണം ഇതുവരെ കണ്ടെത്തിയിട്ടില്ലെന്ന് പൊലീസ് അറിയിച്ചു.

കാർ കണ്ടെത്തി; ഡ്രൈവർ അറസ്റ്റിൽ

ഡിക്സൺ ലാൻഡിങ് റോഡിന് സമീപം വാഹനമിടിച്ച ശേഷം നിർത്താതെ പോയെന്ന വിവരത്തെ തുടർന്നാണ് പൊലീസ് സ്ഥലത്തെത്തിയത്. പാർക്കിങ് സ്ഥലത്ത് ഗുരുതരമായി പരിക്കേറ്റ സ്ത്രീയെ കണ്ടെത്തി. നീല എസ്‌യുവി ഇടിച്ച ശേഷം കടന്നുകളഞ്ഞതായി ദൃക്സാക്ഷികൾ പൊലീസിനോട് പറഞ്ഞു. പിന്നീട് സമീപത്തെ പാർക്കിങ് സ്ഥലത്ത് സമാനമായ വാഹനം കണ്ടെത്തുകയും ഡ്രൈവറെ അറസ്റ്റ് ചെയ്യുകയും ചെയ്തു.

ഇരുവരും അധ്യാപകർ

2021ലാണ് അഞ്ജന അമേരിക്കയിലെത്തിയത്. കാലിഫോർണിയയിൽ സ്കൂൾ അധ്യാപികയായി ജോലി ചെയ്യുകയായിരുന്നു. സോഫ്റ്റ്‌വെയർ എൻജിനീയറായ വിജീഷാണ് ഭർത്താവ്. ആറുവയസ്സുള്ള മകളുണ്ട്. ആൻ മേരി അമേരിക്കയിലെ ഒരു സ്കൂളിൽ കമ്പ്യൂട്ടർ അധ്യാപികയായിരുന്നു. ചിങ്ങവനം സ്വദേശിയായ ജേക്കബാണ് ഭർത്താവ്. ദമ്പതികൾക്ക് രണ്ട് പെൺമക്കളുണ്ട്. സംഭവത്തിന് ദിവസങ്ങൾക്ക് മുമ്പ് ഇരുവരും കുടുംബങ്ങൾക്കൊപ്പം ഓണം ആഘോഷിച്ചിരുന്നതായും റിപ്പോർട്ടിൽ പറയുന്നു.

മൃതദേഹങ്ങൾ നാട്ടിലെത്തിക്കാൻ നടപടി

കേന്ദ്രമന്ത്രി സുരേഷ് ഗോപി മരണവിവരം സ്ഥിരീകരിച്ചു. മൃതദേഹങ്ങൾ കേരളത്തിലെത്തിക്കാനുള്ള നടപടികൾ പുരോഗമിക്കുകയാണെന്നും സാൻഫ്രാൻസിസ്കോയിലെ ഇന്ത്യൻ കോൺസൽ ജനറലുമായി ബന്ധപ്പെട്ടിട്ടുണ്ടെന്നും അദ്ദേഹം പറഞ്ഞു. പോസ്റ്റ്മോർട്ടം പൂർത്തിയായ ശേഷമായിരിക്കും മൃതദേഹങ്ങൾ വിട്ടുനൽകുക. സംഭവത്തിന്റെ കാരണം ഉൾപ്പെടെയുള്ള കൂടുതൽ വിവരങ്ങൾ അമേരിക്കൻ അധികൃതരുടെ ഔദ്യോഗിക റിപ്പോർട്ട് ലഭിച്ചശേഷമേ വ്യക്തമാകൂ.