ന്യൂഡൽഹി / 2026 / ഓഗസ്റ്റ് 27
കഴിവുകൾ വികസിപ്പിക്കുന്നതിനൊപ്പം ചിന്താശേഷിയും മനോഭാവവും വളർത്തുന്നത് ഇന്ത്യയുടെ ആഗോള പ്രസക്തി നിലനിർത്താൻ ഒരുപോലെ അനിവാര്യമാണെന്ന് കേന്ദ്രമന്ത്രി ഡോ. ജിതേന്ദ്ര സിങ് പറഞ്ഞു. ന്യൂഡൽഹിയിലെ ഇന്ത്യ ഹാബിറ്റാറ്റ് സെന്ററിൽ നളന്ദ സർവകലാശാല സംഘടിപ്പിച്ച ശേഷിവികസന വട്ടമേശ സമ്മേളനത്തിൽ സംസാരിക്കുകയായിരുന്നു അദ്ദേഹം. വ്യക്തികളുടെ കഴിവുകൾ മാത്രം മെച്ചപ്പെടുത്തുന്നതിൽ നിന്ന് മാറി സമൂഹത്തെ മുഴുവൻ പങ്കാളിയാക്കുന്ന കൂട്ടായ സമീപനമായി ശേഷിവികസനം മാറണമെന്ന് മന്ത്രി പറഞ്ഞു. അതിവേഗം മാറുന്ന സാങ്കേതികവിദ്യയുടെയും ആഗോള സാഹചര്യങ്ങളുടെയും വെല്ലുവിളികൾ നേരിടാൻ സർക്കാർ, സ്വകാര്യ മേഖല, സമൂഹം എന്നിവ ഒരുമിച്ച് പ്രവർത്തിക്കണമെന്നും അദ്ദേഹം ആവശ്യപ്പെട്ടു.
പഠനം ഒരിക്കലും അവസാനിക്കരുത്
സാങ്കേതികവിദ്യയിലും സമൂഹത്തിലും മാറ്റങ്ങളുടെ വേഗം വലിയ തോതിൽ വർധിച്ചിരിക്കുകയാണെന്ന് ഡോ. ജിതേന്ദ്ര സിങ് പറഞ്ഞു. അതുകൊണ്ടുതന്നെ തുടർച്ചയായ പഠനം ഒഴിവാക്കാനാകാത്ത കാര്യമായി മാറി. ഇന്ന് പഠിക്കുന്ന കാര്യം നാളെ തന്നെ കാലഹരണപ്പെട്ടേക്കാം. അതിനാൽ വ്യക്തികളും സ്ഥാപനങ്ങളും എപ്പോഴും പഠിച്ചുകൊണ്ടിരിക്കാനും പുതിയ സാഹചര്യങ്ങളോട് പൊരുത്തപ്പെടാനും കഴിയുന്ന ശേഷി വളർത്തണം.
പുതിയ വെല്ലുവിളികളെ നേരിടാൻ കൂട്ടായ ശേഷിവികസനത്തിന് കൂടുതൽ പ്രാധാന്യമുണ്ട്. സ്ഥാപനങ്ങൾ ഒറ്റപ്പെട്ട് പ്രവർത്തിക്കുന്നതിന് പകരം പരസ്പരം ഏകോപിപ്പിച്ച് പ്രവർത്തിക്കാൻ പഠിക്കണം. സംഘടനകളുടെ അതിരുകൾക്കപ്പുറം സഹകരണം ശക്തമാക്കണം. പുതിയ വെല്ലുവിളികളോട് വേഗത്തിൽ പ്രതികരിക്കാനും നയങ്ങളെ ഫലപ്രദമായി നടപ്പാക്കാനും ഇത് സഹായിക്കും. സ്ഥാപനങ്ങൾ തമ്മിലുള്ള ഏകോപനവും സമൂഹത്തെ മുഴുവൻ ഉൾക്കൊള്ളുന്ന സമീപനവും ഇന്ത്യ ഒരുമിച്ച് മുന്നോട്ടുകൊണ്ടുപോകണമെന്ന് മന്ത്രി പറഞ്ഞു.
കഴിവ് മാത്രം പോരാ, മനോഭാവവും മാറണം
ശേഷിവികസനം പുതിയ കഴിവുകൾ നേടുന്നതിലോ ഏൽപ്പിച്ച ജോലി ചെയ്യാൻ വ്യക്തികളെ സജ്ജരാക്കുന്നതിലോ മാത്രം ഒതുങ്ങരുതെന്ന് ഡോ. ജിതേന്ദ്ര സിങ് പറഞ്ഞു. ശരിയായ മനോഭാവം വളർത്തുന്ന ‘മനസ്സിന്റെ ശേഷിവികസനം’ അത്രതന്നെ പ്രധാനമാണ്. വ്യക്തികൾക്കും സ്ഥാപനങ്ങൾക്കും പുതിയ സാഹചര്യങ്ങളോട് പൊരുത്തപ്പെടാനും പുതുമകൾ കൊണ്ടുവരാനും പ്രസക്തി നിലനിർത്താനും ശരിയായ ചിന്താരീതി ആവശ്യമാണ്. ആഗോളതലത്തിൽ പ്രസക്തമായി തുടരണമെങ്കിൽ ഇന്ത്യ ആഗോള മാനദണ്ഡങ്ങളും തന്ത്രങ്ങളും പിന്തുടരണമെന്നും അദ്ദേഹം പറഞ്ഞു.
എല്ലാ കാര്യങ്ങളും സർക്കാർ മാത്രം ചെയ്യുമെന്ന് പ്രതീക്ഷിക്കാനാകില്ല. മറ്റു പങ്കാളികളുടെ കൂടുതൽ സജീവമായ ഇടപെടൽ ആവശ്യമാണ്. ബഹിരാകാശം, ആണവോർജം തുടങ്ങിയ മേഖലകൾ സ്വകാര്യ പങ്കാളിത്തത്തിനായി തുറന്നുകൊടുത്ത ഇന്ത്യയുടെ അനുഭവം ചൂണ്ടിക്കാട്ടിയ മന്ത്രി, വിവിധ മേഖലകൾ തമ്മിൽ ചേർന്ന് പ്രവർത്തിക്കാൻ രാജ്യം പഠിക്കണമെന്ന് പറഞ്ഞു. പൊതുവായ ദേശീയ ലക്ഷ്യത്തിനായി വ്യത്യസ്ത പങ്കാളികൾ സംഭാവന നൽകുന്ന ഒരു സാഹചര്യം രൂപപ്പെടണം.
ഭരണത്തിൽ പ്രായോഗിക സമീപനത്തിനും വലിയ പ്രാധാന്യമുണ്ടെന്ന് മന്ത്രി പറഞ്ഞു. ഉത്തരവാദിത്വങ്ങൾ നിറവേറ്റുമ്പോൾ ചട്ടപുസ്തകത്തിൽ മാത്രം കുടുങ്ങിക്കിടക്കുന്ന രീതിയിൽ നിന്ന് ഉദ്യോഗസ്ഥർ മാറണം. ഫലപ്രദമായി പ്രവർത്തിക്കാൻ ആവശ്യമായ തോതിലുള്ള പ്രായോഗിക സമീപനം വേണം. അതിന് മനോഭാവത്തിലും മാറ്റം ആവശ്യമാണ്.
തുടർച്ചയായ പഠനത്തിന് വലിയ സംവിധാനം
ശേഷിവികസനത്തിൽ തുടർച്ചയായ പഠന സംവിധാനങ്ങളുടെ പങ്കും ഡോ. ജിതേന്ദ്ര സിങ് ചൂണ്ടിക്കാട്ടി. സർക്കാർ ഉദ്യോഗസ്ഥർക്ക് തുടർച്ചയായി പഠിക്കാനുള്ള അവസരം നൽകുന്ന ഐഗോട്ട് സംവിധാനത്തിൽ 40 ലക്ഷത്തിലധികം പേർ രജിസ്റ്റർ ചെയ്തിട്ടുണ്ടെന്ന് അദ്ദേഹം അറിയിച്ചു.
നാഷണൽ സെന്റർ ഫോർ ഗുഡ് ഗവേണൻസ്, ഇന്ത്യൻ ഇൻസ്റ്റിറ്റ്യൂട്ട് ഓഫ് പബ്ലിക് അഡ്മിനിസ്ട്രേഷൻ എന്നിവയും ഭരണവും ശേഷിവികസനവുമായി ബന്ധപ്പെട്ട് പ്രവർത്തിക്കുന്ന വിപുലമായ സ്ഥാപന ശൃംഖലയുടെ ഭാഗമാണെന്ന് മന്ത്രി പറഞ്ഞു. ശേഷിവികസന മേഖലയിൽ പ്രവർത്തിക്കുന്ന വിവിധ സ്ഥാപനങ്ങളെ ഒരു വലിയ സംവിധാനത്തിന്റെ ഭാഗമാക്കി ബന്ധിപ്പിക്കാം.
ഇന്ത്യയുടെ ചരിത്രപരവും പരമ്പരാഗതവുമായ അറിവുകളെ ഇന്നത്തെ ഭരണശേഷിയുമായി ബന്ധിപ്പിക്കുന്നതിൽ കൗടില്യ സെന്ററിന് വലിയ സാധ്യതയുണ്ടെന്നും അദ്ദേഹം പറഞ്ഞു. ഇത്തരമൊരു സംവിധാനം വിശാലമായ ആഗോള ദക്ഷിണ മേഖലയിലെ രാജ്യങ്ങൾക്കും ശേഷിവികസനത്തിനുള്ള വേദിയായി മാറാൻ കഴിയുമെന്നും മന്ത്രി ചൂണ്ടിക്കാട്ടി.
ഗവേഷണത്തിന് സ്വകാര്യ പങ്കാളിത്തവും സംഭാവനകളും വേണം
ഗവേഷണത്തിലും നവീകരണത്തിലും സർക്കാരിതര പങ്കാളിത്തം വർധിപ്പിക്കണമെന്നും ഡോ. ജിതേന്ദ്ര സിങ് ആവശ്യപ്പെട്ടു. നാഷണൽ റിസർച്ച് ഫൗണ്ടേഷനും ഒരു ലക്ഷം കോടി രൂപയുടെ ഗവേഷണ-വികസന-നവീകരണ ധനസഹായ പദ്ധതിയും അദ്ദേഹം പരാമർശിച്ചു. ഗവേഷണത്തിലും നവീകരണത്തിലും സ്വകാര്യ പങ്കാളിത്തത്തിനും സ്വകാര്യ വിഭവങ്ങൾക്കും കൂടുതൽ ഇടം ലഭിക്കുന്ന സാഹചര്യം സൃഷ്ടിക്കാനുള്ള ശ്രമത്തിന്റെ ഭാഗമാണ് ഈ പദ്ധതികളെന്ന് അദ്ദേഹം പറഞ്ഞു.
ഗവേഷണത്തിന് സംഭാവന നൽകുന്ന സംസ്കാരം ഇന്ത്യയിൽ കൂടുതൽ ശക്തമാക്കണമെന്നും മന്ത്രി ആവശ്യപ്പെട്ടു. സാമൂഹികവും മാനുഷികവുമായ നിരവധി ആവശ്യങ്ങൾക്കായി സംഭാവനകൾ നൽകുന്ന പതിവ് രാജ്യത്തുണ്ടെങ്കിലും ഗവേഷണത്തിന് അതേ പരിഗണന പരമ്പരാഗതമായി ലഭിച്ചിട്ടില്ല. മനുഷ്യരാശിയുടെ ക്ഷേമത്തിനായുള്ള ഗവേഷണത്തെ പിന്തുണയ്ക്കുന്നതും സമൂഹത്തിനുള്ള സേവനവും സംഭാവനയുമായി കാണണമെന്ന് അദ്ദേഹം പറഞ്ഞു.
ആവശ്യമായ സംവിധാനം വളർത്താൻ എല്ലാ മേഖലകളിൽ നിന്നുമുള്ള വലിയ നിക്ഷേപം ഇന്ത്യയ്ക്ക് ആവശ്യമുണ്ട്. രാജ്യത്തെ യുവ സംരംഭകർ കഴിവിനൊപ്പം സംരംഭകത്വവും കൂട്ടിച്ചേർക്കുകയാണ്. അവർക്ക് അനുയോജ്യമായ സാഹചര്യം ഒരുക്കിയാൽ നവീകരണത്തിന്റെ വേഗം കൂട്ടാനും വളർന്നുവരുന്ന മേഖലകളിൽ കൂടുതൽ ശക്തമായ ശേഷി സൃഷ്ടിക്കാനും കഴിയുമെന്ന് മന്ത്രി പറഞ്ഞു.
രാജ്യങ്ങൾ തമ്മിലും അറിവ് പങ്കിടണം
ശേഷിവികസനത്തിലും അറിവിന്റെ കൈമാറ്റത്തിലും രാജ്യാന്തര സഹകരണത്തിനുള്ള പ്രാധാന്യവും ഡോ. ജിതേന്ദ്ര സിങ് എടുത്തുപറഞ്ഞു. ആഗോള ദക്ഷിണ മേഖലയിലെ രാജ്യങ്ങൾ തമ്മിലുള്ള സഹകരണം വർധിക്കുന്ന സാഹചര്യത്തിൽ ഇത്തരം സംരംഭങ്ങൾ കൂടുതൽ രാജ്യങ്ങളെ ഒരുമിച്ചുകൊണ്ടുവരുമെന്ന് അദ്ദേഹം പ്രത്യാശ പ്രകടിപ്പിച്ചു. അറിവും അനുഭവങ്ങളും ശേഷിവികസന രീതികളും പങ്കിടുന്നതിനുള്ള വിപുലമായ ശൃംഖല ഇതിലൂടെ രൂപപ്പെടുത്താൻ കഴിയുമെന്നും അദ്ദേഹം പറഞ്ഞു.
വ്യക്തികൾക്കും സ്ഥാപനങ്ങൾക്കും സർക്കാരിനും വ്യവസായ മേഖലയ്ക്കും സമൂഹത്തിനും ഇന്ത്യയുടെ പുരോഗതിക്കും ആഗോള പ്രസക്തിക്കും ഫലപ്രദമായി സംഭാവന നൽകാൻ കഴിയുന്ന സാഹചര്യം ഒരുക്കുക എന്നതായിരിക്കണം ശേഷിവികസനത്തിന്റെ പൊതുലക്ഷ്യമെന്ന് മന്ത്രി വ്യക്തമാക്കി.
