മുതിർന്ന പൗരന്മാരുടെ ക്ഷേമനയങ്ങൾ ദേശീയ കൗൺസിൽ അവലോകനം ചെയ്തു; ‘സ്നേഹ’ ഇ-പുസ്തകം പുറത്തിറക്കി

ന്യൂഡൽഹി /  2026 / ഓഗസ്റ്റ് 15

മുതിർന്ന പൗരന്മാരുടെ ക്ഷേമം, ആരോഗ്യപരിരക്ഷ, ശാക്തീകരണം എന്നിവയുമായി ബന്ധപ്പെട്ട പ്രധാന പദ്ധതികളും നയപ്രശ്നങ്ങളും ദേശീയ മുതിർന്ന പൗരന്മാരുടെ കൗൺസിലിന്റെ അഞ്ചാമത് യോഗം അവലോകനം ചെയ്തു. ന്യൂഡൽഹിയിലെ ഡോ. അംബേദ്കർ അന്താരാഷ്ട്ര കേന്ദ്രത്തിലായിരുന്നു യോഗം. കേന്ദ്ര സാമൂഹികനീതി-ശാക്തീകരണ മന്ത്രി ഡോ. വീരേന്ദ്ര കുമാർ അധ്യക്ഷനായി.

കേന്ദ്രവും സംസ്ഥാനങ്ങളും ഒരുമിച്ച്

സാമൂഹികനീതി-ശാക്തീകരണ മന്ത്രാലയം സെക്രട്ടറി സുധാംശു പന്ത്, മുതിർന്ന പൗരന്മാരുടെ വിഭാഗം ജോയിന്റ് സെക്രട്ടറി മോണാലി പി. ധക്കാട്ടെ, കൗൺസിൽ അംഗങ്ങൾ, കേന്ദ്ര മന്ത്രാലയങ്ങളുടെയും സംസ്ഥാന സർക്കാരുകളുടെയും പ്രതിനിധികൾ, വിദഗ്ധർ, സന്നദ്ധസംഘടനകൾ, മുതിർന്ന പൗരന്മാരുടെ സംഘടനകൾ എന്നിവർ പങ്കെടുത്തു. മാന്യമായ ജീവിതം, സുരക്ഷ, നല്ല ആരോഗ്യം, സമൂഹത്തിലെ സജീവ പങ്കാളിത്തം എന്നിവ മുതിർന്ന പൗരന്മാർക്ക് ഉറപ്പാക്കുകയാണ് സർക്കാരിന്റെ ലക്ഷ്യമെന്ന് മന്ത്രി പറഞ്ഞു. വികസിത ഭാരതം 2047 എന്ന ലക്ഷ്യത്തിന്റെ പ്രധാന ഭാഗമാണ് വയോജന ക്ഷേമമെന്നും അദ്ദേഹം വ്യക്തമാക്കി.

അടൽ വയോ അഭ്യുദയ പദ്ധതിയും ആരോഗ്യപരിരക്ഷയും

അടൽ വയോ അഭ്യുദയ യോജനയുടെ വ്യാപ്തി, ഫലപ്രാപ്തി, സ്വാധീനം എന്നിവ കൗൺസിൽ വിശദമായി പരിശോധിച്ചു. ആയുഷ്മാൻ ഭാരത് പ്രധാനമന്ത്രി ജൻ ആരോഗ്യ യോജനയിലൂടെ മുതിർന്ന പൗരന്മാർക്ക് നൽകുന്ന ആരോഗ്യപരിരക്ഷയും ചർച്ചയായി. നിലവിലെ ഔദ്യോഗിക വ്യവസ്ഥ പ്രകാരം 70 വയസും അതിൽ കൂടുതലുമുള്ള എല്ലാ മുതിർന്ന പൗരന്മാർക്കും സാമ്പത്തിക നില പരിഗണിക്കാതെ ആരോഗ്യപരിരക്ഷ ലഭ്യമാണ്. ആറുകോടി മുതിർന്ന പൗരന്മാരെ ഉൾക്കൊള്ളുന്നതാണ് പദ്ധതി.

കേന്ദ്ര സർക്കാർ ആരോഗ്യ പദ്ധതിയുടെ നിരക്കുപട്ടികയിൽ വയോജന പരിചരണ സഹായികളുടെ സേവനം ഉൾപ്പെടുത്താനുള്ള നിർദേശവും കൗൺസിൽ ചർച്ച ചെയ്തു. നാലാമത് കൗൺസിൽ യോഗത്തിലെ തീരുമാനങ്ങളിൽ സ്വീകരിച്ച നടപടികളും പരിശോധിച്ചു. ബന്ധപ്പെട്ട മന്ത്രാലയങ്ങളും സംസ്ഥാനങ്ങളും കേന്ദ്രഭരണ പ്രദേശങ്ങളും ഏകോപിച്ച് ശുപാർശകൾ വേഗത്തിൽ നടപ്പാക്കണമെന്ന് മന്ത്രി ആവശ്യപ്പെട്ടു.

21 മാസത്തെ പ്രവർത്തനങ്ങളുമായി ‘സ്നേഹ’

യോഗത്തിൽ ‘സ്നേഹ’ എന്ന ഇ-പുസ്തകവും ഡോ. വീരേന്ദ്ര കുമാർ പുറത്തിറക്കി. 2024 ഒക്ടോബർ മുതൽ 2026 ജൂൺ വരെയുള്ള 21 മാസത്തിനിടെ മുതിർന്ന പൗരന്മാരുടെ ക്ഷേമത്തിനും ശാക്തീകരണത്തിനുമായി നടപ്പാക്കിയ പ്രധാന പദ്ധതികളും പ്രവർത്തനങ്ങളും നേട്ടങ്ങളുമാണ് ഇതിൽ ഉൾപ്പെടുത്തിയിരിക്കുന്നത്. ആരോഗ്യകരമായ വാർധക്യം പ്രോത്സാഹിപ്പിക്കാനും രാഷ്ട്രനിർമാണത്തിൽ മുതിർന്ന പൗരന്മാരുടെ സജീവ പങ്കാളിത്തം വർധിപ്പിക്കാനുമുള്ള പ്രവർത്തനങ്ങളും പുസ്തകം വിശദീകരിക്കുന്നു.

സേവനങ്ങൾ കൈവിരൽത്തുമ്പിലെത്തിക്കാൻ ‘ജീവൻ’, ‘ശതായു’

വയോജന സേവനങ്ങളിൽ സാങ്കേതികവിദ്യയുടെ ഉപയോഗം ശക്തമാക്കുന്ന ‘ജീവൻ’, ‘ശതായു’ എന്നീ രണ്ട് ഡിജിറ്റൽ സംവിധാനങ്ങളും യോഗം വിലയിരുത്തി. മുതിർന്ന പൗരന്മാർക്കും കുടുംബങ്ങൾക്കും ക്ഷേമപദ്ധതികളും സേവനങ്ങളും ഒരിടത്ത് ലഭ്യമാക്കാനാണ് ‘ജീവൻ’ ആപ്പ്. പരിശീലനം ലഭിച്ച വയോജന പരിചരണ സഹായികളുടെ സേവനം ലഭ്യമാക്കാനുള്ള സംവിധാനമാണ് ‘ശതായു’. മന്ത്രാലയങ്ങൾ തമ്മിലുള്ള ഏകോപനവും ഡിജിറ്റൽ സേവനങ്ങളും ശക്തമാക്കി ആരോഗ്യകരവും സജീവവും മാന്യവുമായ വാർധക്യം ഉറപ്പാക്കണമെന്ന പ്രതിജ്ഞയോടെയാണ് യോഗം അവസാനിച്ചത്.

.