ന്യൂഡൽഹി, 2026 ജൂലൈ- 04
രാജ്യത്തിന്റെ ചില ഭാഗങ്ങളിൽ സാധാരണയിലും കുറവ് മഴ ലഭിച്ചതും അതിന്റെ ആഘാതവുമാണ് കേന്ദ്ര സർക്കാർ വിലയിരുത്തിയത്. എൽ നിനോ പ്രതിഭാസത്തിന്റെ പശ്ചാത്തലത്തിലാണ് ഈ അവലോകനം നടന്നത്. ജൂലൈ 3-ന് ന്യൂഡൽഹിയിൽ കേന്ദ്ര ആഭ്യന്തര മന്ത്രി അമിത് ഷായുടെയും കേന്ദ്ര കൃഷി മന്ത്രി ശിവരാജ് സിംഗ് ചൗഹാന്റെയും നേതൃത്വത്തിലായിരുന്നു യോഗം.
കർഷകർക്ക് വിള നിർദേശങ്ങൾ നൽകാൻ നിർദേശം
യോഗത്തിൽ വിവിധ മന്ത്രാലയങ്ങളിലെയും വകുപ്പുകളിലെയും മുതിർന്ന ഉദ്യോഗസ്ഥർ പങ്കെടുത്തു. മഴക്കുറവ് തുടരുന്ന പ്രദേശങ്ങളിൽ സംസ്ഥാന സർക്കാരുകളുമായി ചേർന്ന് കർഷകർക്ക് അനുയോജ്യമായ വിളകൾ സംബന്ധിച്ച് നിർദേശം നൽകണമെന്ന് ആഭ്യന്തര മന്ത്രി പറഞ്ഞു. കുറവ് വെള്ളം മതി വളരുന്ന തീറ്റവിളകൾ, ചെറുധാന്യങ്ങൾ, പയർവർഗങ്ങൾ എന്നിവയിൽ കൂടുതൽ ശ്രദ്ധ വേണമെന്നാണ് നിർദേശം.
ജലസംഭരണികളും ഭൂഗർഭജലവും നിരീക്ഷിക്കും
രാജ്യത്തെ ചെറുതും വലുതുമായ ജലാശയങ്ങളും ഭൂഗർഭജലവും നിരീക്ഷിക്കാൻ ജലശക്തി മന്ത്രാലയത്തിന് നിർദേശം നൽകി. വൈദ്യുതി വിതരണം തടസ്സമില്ലാതെ ഉറപ്പാക്കാൻ വൈദ്യുതി മന്ത്രാലയ സെക്രട്ടറിയോടും നടപടി ആവശ്യപ്പെട്ടു. അതേസമയം, രാജ്യത്ത് അരിയും ഗോതമ്പും ഉൾപ്പെടെ അവശ്യ ഭക്ഷ്യധാന്യങ്ങൾ മതിയായ അളവിൽ ലഭ്യമാണെന്നും അവശ്യവസ്തുക്കളുടെ വില സ്ഥിരതയിലാണെന്നും യോഗത്തിൽ അറിയിക്കപ്പെട്ടു.
അസമിലേക്കും അരുണാചലിലേക്കും കേന്ദ്ര സംഘം
യോഗത്തിൽ അസമിലും അരുണാചൽ പ്രദേശിലും ഉണ്ടായ കനത്ത മഴ, പെട്ടെന്നുള്ള പ്രളയം, മണ്ണിടിച്ചിൽ എന്നിവയും ചർച്ചയായി. ഈ സംസ്ഥാനങ്ങളിലെ നാശനഷ്ടം നേരിട്ട് വിലയിരുത്താൻ ആഭ്യന്തര മന്ത്രാലയത്തിന്റെ അന്തർ മന്ത്രാലയ കേന്ദ്ര സംഘത്തെ അയയ്ക്കാനും നിർദേശം നൽകി. അടിസ്ഥാന സൗകര്യങ്ങൾ, കൃഷി, ജനവാസ മേഖലകൾ എന്നിവയ്ക്ക് ഉണ്ടായ നഷ്ടം സംഘം പരിശോധിക്കും.
