ന്യൂഡൽഹി, 2026 ജൂൺ 28
ഓപ്പറേഷൻ സിന്ദൂരിനിടെ ജീവത്യാഗം ചെയ്ത ആറു സൈനികരുടെ ത്യാഗം ഇപ്പോഴാണ് ആദ്യമായി പൊതുജന ശ്രദ്ധയിൽപ്പെട്ടതെന്ന തരത്തിൽ ചില മാധ്യമങ്ങളിലും സാമൂഹിക മാധ്യമങ്ങളിലും പ്രചരിച്ച റിപ്പോർട്ടുകൾ തെറ്റാണെന്ന് പ്രതിരോധ മന്ത്രാലയം വ്യക്തമാക്കി. 2025 മെയ് 11-ന് നടന്ന ഔദ്യോഗിക വാർത്താസമ്മേളനത്തിൽ അന്നത്തെ സൈനിക നടപടികളുടെ ഡയറക്ടർ ജനറൽ ഈ സൈനികർക്ക് ആദരാഞ്ജലി അർപ്പിച്ചിരുന്നു. 2025 ഓഗസ്റ്റ് 14-ന് ധീരതയ്ക്കുള്ള ബഹുമതികൾ നൽകിയതായും വാർത്താക്കുറിപ്പിലൂടെ അറിയിച്ചിരുന്നു.
ഇന്ത്യൻ സൈന്യത്തിന്റെ ഔദ്യോഗിക സാമൂഹിക മാധ്യമ വേദികളിലും ഈ സൈനികർക്ക് ഉടൻ ആദരാഞ്ജലി അർപ്പിച്ചതായി മന്ത്രാലയം അറിയിച്ചു. 2026 ജനുവരി 15-ന് ജയ്പൂരിൽ നടന്ന സൈനിക ദിന പരേഡിൽ മൂന്ന് സൈനികരുടെ കുടുംബങ്ങൾക്ക് സേനാ മെഡൽ സമ്മാനിച്ചു. 2025 ഒക്ടോബർ 8-ന് വ്യോമസേനാ മേധാവിയും ചടങ്ങിൽ ബഹുമതി കൈമാറി. രാജ്യത്തിനായി ജീവത്യാഗം ചെയ്തവരെ ആദരിക്കാനുള്ള പ്രതിരോധ സേനയുടെ പ്രതിബദ്ധത ഇതിലൂടെ വീണ്ടും ഉറപ്പിച്ചതായും വ്യക്തമാക്കി.
ദേശീയ യുദ്ധസ്മാരകത്തിൽ വീരമൃത്യു വരിച്ച സൈനികരുടെ പേരുകൾ രേഖപ്പെടുത്തുന്നത് നിശ്ചിത നടപടിക്രമങ്ങൾ പാലിച്ചാണെന്ന് പ്രതിരോധ മന്ത്രാലയം വിശദീകരിച്ചു. നടപടിക്രമങ്ങൾ പാലിച്ചില്ലെന്ന തരത്തിലുള്ള ആരോപണങ്ങൾ വസ്തുതാവിരുദ്ധമാണെന്നും പറഞ്ഞു. അടിസ്ഥാനരഹിതമായ വിവാദങ്ങൾ ദുഃഖത്തിലായ കുടുംബങ്ങൾക്ക് കൂടുതൽ വേദനയുണ്ടാക്കുമെന്നും രാജ്യത്തിനായി ജീവത്യാഗം ചെയ്ത സൈനികരുടെ അന്തസ്സ് കുറയ്ക്കുമെന്നും മന്ത്രാലയം ചൂണ്ടിക്കാട്ടി. സ്ഥിരീകരിക്കാത്ത വിവരങ്ങൾ പ്രചരിപ്പിക്കാതിരിക്കാൻ എല്ലാവരും ഉത്തരവാദിത്തത്തോടെ പെരുമാറണമെന്നും ആവശ്യപ്പെട്ടു. ഓപ്പറേഷൻ സിന്ദൂരിലെ ആറു വീരരും രാജ്യത്തിന്റെ നായകരാണെന്നും അവരുടെ ധീരതയും ത്യാഗവും തലമുറകൾക്ക് പ്രചോദനമാകുമെന്നും പ്രതിരോധ മന്ത്രാലയം അറിയിച്ചു.
