തിരുവനന്തപുരം, 2026 ജൂൺ 26 –

സംസ്ഥാനത്ത് സ്പെഷ്യൽ ഗ്രേഡ് കോളേജുകളുടെ വിഭാഗം ഒഴിവാക്കി ഉന്നത വിദ്യാഭ്യാസ വകുപ്പ് നടപടി സ്വീകരിച്ചു. എറണാകുളം മഹാരാജാസ് കോളേജ് ഉൾപ്പെടെ ഏഴ് സർക്കാർ കോളേജുകളുടെ സ്പെഷ്യൽ ഗ്രേഡ് പദവിയാണ് റദ്ദാക്കിയത്. 2020ലെ യു.ജി.സി. ചട്ടപ്രകാരം സ്പെഷ്യൽ ഗ്രേഡ് കോളേജുകൾ എന്ന വിഭാഗം നിലവിലില്ലെന്ന് കണ്ടെത്തിയതിനെ തുടർന്നാണ് ഭരണപരമായ ഏകീകരണത്തിന്റെ ഭാഗമായി തീരുമാനം എടുത്തത്.

സ്പെഷ്യൽ ഗ്രേഡ് പദവി നഷ്ടമായത് മഹാരാജാസ് കോളേജ്, തിരുവനന്തപുരം യൂണിവേഴ്സിറ്റി കോളേജ്, തിരുവനന്തപുരം ഗവൺമെന്റ് ആർട്സ് കോളേജ്, വഴുതക്കാട് ഗവൺമെന്റ് കോളേജ് ഫോർ വിമൻ, തലശ്ശേരി ഗവൺമെന്റ് ബ്രണ്ണൻ കോളേജ്, പാലക്കാട് ഗവൺമെന്റ് വിക്ടോറിയ കോളേജ്, കാസർഗോഡ് ഗവൺമെന്റ് കോളേജ് എന്നിവയ്ക്കാണ്. ഇതോടെ സ്പെഷ്യൽ ഗ്രേഡ് പ്രിൻസിപ്പൽ തസ്തിക ഒഴിവാകും. ഇനി മുതൽ പ്രിൻസിപ്പൽ തസ്തികയാണ് ഡെപ്യൂട്ടി ഡയറക്ടർ സ്ഥാനക്കയറ്റത്തിനുള്ള ഫീഡർ തസ്തിക.

അക്കാദമിക് നിലവാരത്തിന് മാറ്റമില്ല

സ്പെഷ്യൽ ഗ്രേഡ് പദവി ഒഴിവാക്കിയെങ്കിലും കോളേജുകളുടെ അക്കാദമിക് നിലവാരത്തിനോ കോഴ്സുകൾക്കോ മാറ്റമുണ്ടാകില്ല. ദേശീയ മൂല്യനിർണയ അംഗീകാരം, ദേശീയ റാങ്കിങ്, സ്വയംഭരണ പദവി എന്നിവ തുടരും. മഹാരാജാസ് കോളേജിന്റെ സ്വയംഭരണ പദവി 2029-30 വരെ പുതുക്കി നൽകിയതിനാൽ അക്കാദമിക് സ്വയംഭരണത്തിലും മാറ്റമുണ്ടാകില്ല.