തിരുവനന്തപുരം, 2026 ജൂൺ 26 –

സംസ്ഥാനത്ത് സമ്പൂർണ മദ്യനിരോധനം ഇപ്പോൾ നടപ്പാക്കാൻ കഴിയില്ലെന്ന് ആരോഗ്യമന്ത്രി കെ. മുരളീധരൻ പറഞ്ഞു. വീര്യം കുറഞ്ഞ മദ്യം പോലും ലഭ്യമല്ലെങ്കിൽ ആളുകൾ മറ്റുവസ്തുക്കൾ കലർത്തി ഉപയോഗിച്ച് മദ്യദുരന്തങ്ങൾ ഉണ്ടാകാൻ സാധ്യതയുണ്ടെന്നും അതുകൊണ്ടാണ് വീര്യം കുറഞ്ഞ മദ്യം കൊണ്ടുവരുന്നതെന്നുമാണ് മന്ത്രിയുടെ പ്രതികരണം.

സമ്പൂർണ മദ്യനിരോധനം നടപ്പാക്കണമെങ്കിൽ അതിനുള്ള സാമൂഹിക സാഹചര്യം രൂപപ്പെടണമെന്ന് മന്ത്രി പറഞ്ഞു. സമൂഹത്തിൽ മദ്യം ഉപയോഗിക്കുന്നവർ ഇപ്പോഴുമുണ്ടെന്നും, അതുകൊണ്ടാണ് നല്ല നിലവാരമുള്ള മദ്യം ലഭ്യമാക്കാൻ ശ്രമിക്കുന്നതെന്നും വ്യക്തമാക്കി. കെ. കരുണാകരന്റെ കാലത്താണ് ബെവ്കോ ആരംഭിച്ചതെന്നും അദ്ദേഹം പറഞ്ഞു.

വിദ്യാർഥികൾക്ക് മദ്യം നൽകാൻ അനുവദിക്കില്ല

വിദ്യാർഥികൾക്ക് മദ്യം നൽകാൻ ഒരിക്കലും അനുവദിക്കില്ലെന്നും നിയമം ലംഘിക്കുന്നവർക്കെതിരെ അതിശക്തമായ നടപടി സ്വീകരിക്കുമെന്നും ആരോഗ്യമന്ത്രി വ്യക്തമാക്കി. ഉമ്മൻ ചാണ്ടിയുടെ കാലത്ത് ബാറുകളുടെ എണ്ണം കുറച്ചിരുന്നുവെന്നും, പിന്നീട് എണ്ണം കൂട്ടി വീര്യം കുറഞ്ഞ മദ്യം നൽകുന്നത് അതിന്റെ പ്രത്യാഘാതം കുറയ്ക്കാനാണെന്നും പറഞ്ഞു.

നികുതി ഇളവിൽ തീരുമാനം ചർച്ചയ്ക്ക് ശേഷം മാത്രം

വീര്യം കുറഞ്ഞ മദ്യത്തിന് നികുതി ഇളവ് നൽകുന്ന കാര്യത്തിൽ ചർച്ച നടത്താതെയൊരു തീരുമാനവും ഉണ്ടാകില്ലെന്ന് മന്ത്രി വ്യക്തമാക്കി. ഇക്കാര്യത്തിൽ മുഖ്യമന്ത്രി നേരത്തേ തന്നെ നിലപാട് വ്യക്തമാക്കിയിട്ടുണ്ടെന്നും അദ്ദേഹം കൂട്ടിച്ചേർത്തു.