മലപ്പുറം, 2026 ജൂൺ 25 –

കേരള ഫയർഫോഴ്‌സിൽ അച്ചടക്ക നടപടിയിൽ വേർതിരിവുണ്ടെന്ന ആക്ഷേപം ഉയരുന്നു. സൗഹൃദ വാട്‌സ്ആപ്പ് ഗ്രൂപ്പിൽ മേലുദ്യോഗസ്ഥരെ അവഹേളിച്ചെന്നാരോപിച്ച് നിലമ്പൂർ നിലയത്തിലെ ഡ്രൈവർ വി. വിമലിനെ കാസർകോട് ഉപ്പളയിലേക്ക് സ്ഥലംമാറ്റി. ഫീൽഡിൽ ജോലി ചെയ്യുന്ന സേനാംഗങ്ങൾക്ക് കേന്ദ്ര ആഭ്യന്തര മന്ത്രാലയത്തിന്റെ മെഡൽ ലഭിക്കാത്തതിനെ വിമർശിച്ചുള്ള സന്ദേശമാണ് നടപടിക്ക് വഴിവെച്ചത്.

ഓഫീസ് ജോലികൾ മാത്രം ചെയ്യുന്ന ഉദ്യോഗസ്ഥർക്കും മെഡൽ ലഭിച്ചതിനെ പരിഹസിച്ചായിരുന്നു വി. വിമലിന്റെ വാട്‌സ്ആപ്പ് സന്ദേശം. ‘ട്രംപിന്റെ മെഡൽ മാത്രമേ ഇനി കിട്ടാൻ ബാക്കിയുള്ളൂ’ എന്ന പരാമർശം ഉൾപ്പെട്ട സന്ദേശം അനൗദ്യോഗിക വാട്‌സ്ആപ്പ് ഗ്രൂപ്പിൽ പങ്കുവെച്ചു. ഇതിന്റെ സ്ക്രീൻഷോട്ട് പ്രചരിച്ചതോടെയാണ് സ്ഥലംമാറ്റ നടപടി ഉണ്ടായത്. അതേസമയം, യൂണിഫോം ധരിച്ചും ഔദ്യോഗിക വാഹനങ്ങളും ഉപകരണങ്ങളും ഉപയോഗിച്ചും മേലുദ്യോഗസ്ഥരെ അവഹേളിച്ച് റീൽസ് ചിത്രീകരിച്ച ജീവനക്കാർക്കെതിരെ ഇതുവരെ നടപടിയെടുത്തിട്ടില്ലെന്ന വിമർശനവും ഉയരുന്നുണ്ട്.

ഫയർഫോഴ്‌സിൽ യൂണിഫോം ധരിച്ചും ഔദ്യോഗിക വാഹനങ്ങളും ഉപകരണങ്ങളും ഉപയോഗിച്ചും റീൽസ് ചിത്രീകരിക്കുന്നത് വിലക്കി നേരത്തെ ഉത്തരവിറക്കിയിരുന്നു. വകുപ്പിന്റെ സേവനങ്ങൾ പരിചയപ്പെടുത്തുന്നതിനും ബോധവൽക്കരണത്തിനും മാത്രമാണ് ഇത്തരം ദൃശ്യങ്ങൾ ചിത്രീകരിക്കാവൂ എന്നും, നിർദേശം ലംഘിക്കുന്നവർക്കെതിരെ വകുപ്പുതല നടപടി സ്വീകരിക്കുമെന്നും ഉത്തരവിൽ വ്യക്തമാക്കിയിട്ടുണ്ട്.