പൂവാർ, 2026 ജൂൺ 24 –

ഒരുകാലത്ത് പ്രദേശവാസികളുടെയും കാർഷിക മേഖലയുടെയും പ്രധാന ആശ്രയമായിരുന്ന പൂവാറിലെ കുളങ്ങൾ ഇന്ന് നാശത്തിന്റെ വക്കിലെന്ന് നാട്ടുകാർ. അരുമാനൂർ പനച്ചമൂട്ടുകുളം, കാട്ടുകുളം, താമരക്കുളം, ശാസ്താംകുളം എന്നിവ സംരക്ഷണവും പരിപാലനവും ഇല്ലാതെ മലിനജലക്കെട്ടുകളായി മാറുകയാണ്. ഒഴുക്കില്ലാതെ കെട്ടിക്കിടക്കുന്ന വെള്ളം കൊതുകുകളുടെയും ഇഴജന്തുക്കളുടെയും ആവാസകേന്ദ്രമായി മാറിയതും ജനങ്ങളിൽ ആശങ്ക സൃഷ്ടിക്കുന്നു.

പ്രദേശത്തെ ഏറ്റവും വലിയ ജലസ്രോതസ്സായ പനച്ചമൂട്ടുകുളം കരിയിലയും പായലും മാലിന്യവും നിറഞ്ഞ നിലയിലാണ്. ഏതാനും മാസങ്ങൾക്ക് മുമ്പ് തൊഴിലുറപ്പ് തൊഴിലാളികൾ കുളം വൃത്തിയാക്കിയിരുന്നെങ്കിലും വീണ്ടും പഴയ അവസ്ഥയിലായെന്നാണ് പരാതി. വേനൽക്കാലത്ത് പായലും ചെളിയും പൂർണമായി നീക്കം ചെയ്യാത്തതും കുളത്തിന് ചുറ്റുമുള്ള മരങ്ങളുടെ ശിഖരങ്ങൾ വെട്ടിമാറ്റാത്തതും വെള്ളം മലിനമാകാൻ കാരണമായതായി നാട്ടുകാർ പറയുന്നു.

ഈ കുളങ്ങളിൽ നിന്നുള്ള ജലമാണ് കൈപ്പൂർ ഏലയിലെ കൃഷിക്ക് പ്രധാനമായും ഉപയോഗിച്ചിരുന്നത്. ഒരുകാലത്ത് 200 ഹെക്ടർ വിസ്തൃതിയിൽ നെൽകൃഷി നടന്നിരുന്ന പ്രദേശത്ത് കുളങ്ങളുടെ നാശത്തോടെ കൃഷിയും വലിയ തോതിൽ കുറഞ്ഞു. കൈയേറ്റവും പരിപാലനക്കുറവും കുളങ്ങളുടെ സ്വാഭാവിക വിസ്തൃതിയും ജലസംഭരണ ശേഷിയും കുറച്ചതായി ചൂണ്ടിക്കാണിക്കപ്പെടുന്നു. ജലസ്രോതസ്സുകൾ സംരക്ഷിക്കാൻ ഹരിത കേരളം മിഷൻ മുന്നോട്ടുവയ്ക്കുന്ന നിർദേശങ്ങൾ അടിയന്തരമായി നടപ്പാക്കണമെന്ന് നാട്ടുകാർ ആവശ്യപ്പെട്ടു.