ഹജ്ജ് നയം 2027 കേന്ദ്ര ന്യൂനപക്ഷകാര്യ മന്ത്രാലയം പ്രഖ്യാപിച്ചു. ന്യൂനപക്ഷകാര്യ-പാർലമെന്ററി കാര്യ മന്ത്രി കിരൺ റിജിജു നയം പുറത്തിറക്കുകയും 2027ലെ ഹജ്ജിനായി തീർഥാടകരിൽ നിന്ന് അപേക്ഷ ക്ഷണിക്കുന്നതായി അറിയിക്കുകയും ചെയ്തു. ഇന്നുമുതൽ ഹജ്ജ് കമ്മിറ്റി പോർട്ടലിലൂടെയും ഹജ്ജ് സുവിധാ ആപ്പിലൂടെയും ഓൺലൈനായി അപേക്ഷിക്കാം. ഹജ്ജ് കമ്മിറ്റിക്കും സ്വകാര്യ മേഖലയ്ക്കും ഇടയിലെ വിഹിത അനുപാതം 70:30 ആയി തുടരുമെന്നാണ് അറിയിച്ചത്.

തീർഥാടനം കൂടുതൽ സുരക്ഷിതവും സൗകര്യപ്രദവും മാന്യവുമാക്കുക എന്ന ലക്ഷ്യത്തോടെയാണ് പുതിയ നയം പ്രഖ്യാപിച്ചത്. സംസ്ഥാന ഹജ്ജ് ഇൻസ്പെക്ടർമാരുടെ അനുപാതം 150 തീർഥാടകർക്ക് ഒരാൾ എന്നതിൽ നിന്ന് 135 തീർഥാടകർക്ക് ഒരാൾ എന്ന രീതിയിലേക്ക് ഉയർത്തും. കാത്തിരിപ്പ് പട്ടികയിലുള്ളവരിൽ അവസാന പട്ടികയിലെ മുൻനിര 20 ശതമാനക്കാർക്ക് മുൻഗണന നൽകും. ആരോഗ്യ പരിശോധന സൗദി മാർഗനിർദേശങ്ങൾക്ക് അനുസൃതമാക്കും. കൂടാതെ കൃത്രിമ ബുദ്ധി അധിഷ്ഠിത സേവനങ്ങൾ വഴി അപേക്ഷ പരിശോധന, പരാതിനിരീക്ഷണം, യാത്രാ ക്രമീകരണങ്ങൾ തുടങ്ങിയവ ശക്തിപ്പെടുത്താനും തീരുമാനിച്ചിട്ടുണ്ട്.

2026 ജൂൺ 18ന് ചേർന്ന അവലോകന യോഗത്തിലാണ് 2027ലെ മാർഗരേഖ അന്തിമമാക്കിയത്. മിനയിലെ സോഫാ കിടക്കകൾ, മക്ക-മദീന അതിവേഗ ട്രെയിൻ യാത്ര, ഹോട്ടൽ മാതൃകയിലെ താമസം, ഇരുപത് ദിവസത്തെ ഹ്രസ്വ ഹജ്ജ് പദ്ധതി തുടങ്ങിയ മുൻവർഷത്തിലെ നടപടികളുടെ തുടർച്ചയാണ് പുതിയ നയത്തിലുള്ളത്. ഹജ്ജ് ഏകോപനത്തിനും ആശയവിനിമയത്തിനും നൽകിയ മികച്ച സേവനത്തിനുള്ള രണ്ട് പുരസ്കാരങ്ങൾ ഇന്ത്യൻ ഹജ്ജ് ദൗത്യത്തിന് ലഭിച്ചിരുന്നു. കൊൽക്കത്തയെ പുതിയ പുറപ്പെടൽ കേന്ദ്രമായി ഉൾപ്പെടുത്തുകയും ചെയ്തിട്ടുണ്ട്. ഭാവിയിൽ സൗദി സംവിധാനങ്ങളുമായി കൂടുതൽ ഏകോപനം ഉറപ്പാക്കുമെന്നും മന്ത്രാലയം അറിയിച്ചു.