തിരുവനന്തപുരം, 2026 ജൂൺ 19 –

ബജറ്റിൽ പ്രഖ്യാപിച്ച ജോൺസൺ മാഷ് സംഗീത അക്കാദമിയെ സ്വാഗതം ചെയ്ത് സംഗീത സംവിധായകൻ ഔസേപ്പച്ചൻ. അക്കാദമി ആരംഭിക്കുമെന്ന പ്രഖ്യാപനം വരും തലമുറകൾക്ക് വലിയ പ്രചോദനമാകുമെന്ന് പ്രതികരിച്ചു. വർഷങ്ങളായി ഉയർത്തിക്കാട്ടിയ ആവശ്യം ഇപ്പോഴാണ് യാഥാർഥ്യമാകുന്നതെന്നും പറഞ്ഞു.

തൃശൂരിൽ നടന്ന കൂടിക്കാഴ്ചയിൽ അക്കാദമിക്കായുള്ള ആവശ്യം മുഖ്യമന്ത്രിയുടെ ശ്രദ്ധയിൽപ്പെടുത്തിയിരുന്നു. ആദ്യം അത് മറ്റ് രാഷ്ട്രീയ വാഗ്ദാനങ്ങൾ പോലെ മറന്നുപോകുമെന്ന് കരുതിയിരുന്നുവെങ്കിലും സത്യപ്രതിജ്ഞയ്ക്ക് തലേദിവസം വിളിച്ച് ആവശ്യം ഓർമയുണ്ടെന്ന് അറിയിച്ചപ്പോൾ പദ്ധതി നടപ്പാകുമെന്ന വിശ്വാസം ലഭിച്ചതായും പറഞ്ഞു. ജോൺസൺ മാഷ് അക്കാദമി യാഥാർഥ്യമാകുന്നതിന്റെ മുഴുവൻ ക്രെഡിറ്റും മുഖ്യമന്ത്രിക്കാണെന്നും കൂട്ടിച്ചേർത്തു.

അതേസമയം സിനിമാ മേഖലയ്ക്കും ബജറ്റിൽ സുപ്രധാന പ്രഖ്യാപനങ്ങളുണ്ട്. ജെ.സി. ഡാനിയേൽ ഇന്റർനാഷണൽ ഫിലിം സിറ്റി, ചിത്രനഗരം എന്ന പേരിൽ കൊച്ചിയിൽ സ്ഥാപിക്കും. പദ്ധതിക്കായി 100 കോടി രൂപ വകയിരുത്തി. സിനിമയ്ക്ക് വ്യവസായ പദവി നൽകൽ, അന്താരാഷ്ട്ര ചലച്ചിത്രോത്സവത്തിന് സ്ഥിരം വേദി ഒരുക്കൽ, ആന്റി പൈറസി സെൽ രൂപീകരണം, ദേശീയ-അന്തർദേശീയ സിനിമാ പ്രവർത്തനങ്ങൾക്ക് അനുയോജ്യമായ അന്തരീക്ഷം സൃഷ്ടിക്കൽ എന്നിവയും പദ്ധതിയിൽ ഉൾപ്പെടുന്നു.