ന്യൂഡൽഹി, 2026 ജൂൺ 19

പശ്ചിമേഷ്യയിലെ മാറിക്കൊണ്ടിരിക്കുന്ന സാഹചര്യത്തിനിടെ രാജ്യത്തെ ഇന്ധനലഭ്യതയും കപ്പൽഗതാഗത പ്രവർത്തനങ്ങളും സംബന്ധിച്ച് കേന്ദ്ര സർക്കാർ വിശദീകരണം നൽകി. ദേശീയ മാധ്യമ കേന്ദ്രത്തിൽ ജൂൺ 18ന് നടന്ന മന്ത്രാലയങ്ങൾ തമ്മിലുള്ള സംയുക്ത വാർത്താസമ്മേളനത്തിലാണ് വിവരങ്ങൾ പുറത്തുവിട്ടത്. കഴിഞ്ഞ മൂന്ന് ദിവസത്തിനിടെ ഏകദേശം 1.36 കോടി ബുക്കിംഗുകൾക്കെതിരെ 1.47 കോടി പാചകവാതക സിലിണ്ടറുകൾ വിതരണം ചെയ്തതായി അറിയിച്ചു. രാജ്യത്തെ എല്ലാ ശുദ്ധീകരണശാലകളും ഉയർന്ന ശേഷിയിൽ പ്രവർത്തിക്കുന്നതായും പെട്രോളും ഡീസലും ആവശ്യത്തിന് ലഭ്യമാണെന്നും അധികൃതർ വ്യക്തമാക്കി.

പെട്രോളിയം, പ്രകൃതിവാതക മന്ത്രാലയവും തുറമുഖ, കപ്പൽഗതാഗത, ജലപാത മന്ത്രാലയവും ചേർന്നാണ് വിവരങ്ങൾ പങ്കുവെച്ചത്. പശ്ചിമേഷ്യൻ പ്രതിസന്ധിയെ തുടർന്ന് ക്രൂഡ് ഓയിൽ വില ഉയർന്ന സാഹചര്യത്തിൽ ഉപഭോക്താക്കളെ സംരക്ഷിക്കാൻ പെട്രോളിനും ഡീസലിനുമുള്ള എക്സൈസ് തീരുവ ലിറ്ററിന് പത്ത് രൂപ വീതം കുറച്ചതായി അറിയിച്ചു. ഗാർഹിക പാചകവാതക വിതരണം മുൻഗണന നൽകിയിട്ടുണ്ടെന്നും രാജ്യത്ത് പാചകവാതക വിതരണ ഏജൻസികളിൽ ക്ഷാമം റിപ്പോർട്ട് ചെയ്തിട്ടില്ലെന്നും വ്യക്തമാക്കി. സംഭരണം, കരിഞ്ചന്ത എന്നിവ തടയാൻ വിവിധ സംസ്ഥാനങ്ങളിൽ പരിശോധനകളും നടപടികളും തുടരുകയാണ്.

മാർച്ച് മുതൽ ഇതുവരെ 10.02 ലക്ഷം പ്രകൃതിവാതക കണക്ഷനുകളിൽ വാതക വിതരണം ആരംഭിക്കുകയും 3.22 ലക്ഷം അധിക കണക്ഷനുകൾക്കുള്ള അടിസ്ഥാനസൗകര്യം ഒരുക്കുകയും ചെയ്തിട്ടുണ്ട്. പുതുതായി 9.94 ലക്ഷം ഉപഭോക്താക്കൾ രജിസ്റ്റർ ചെയ്തതായും സർക്കാർ അറിയിച്ചു. അതേസമയം, ഏകദേശം 62,370 മെട്രിക് ടൺ ദ്രവീകൃത പ്രകൃതിവാതകം വഹിക്കുന്ന “ദിശ” എന്ന കപ്പൽ ജൂൺ 19ന് ദഹേജിൽ എത്തുമെന്നാണ് പ്രതീക്ഷ. പേർഷ്യൻ ഉൾക്കടൽ മേഖലയിൽ നിന്ന് ഇതുവരെ 3,639ലധികം ഇന്ത്യൻ നാവികരെ സുരക്ഷിതമായി നാട്ടിലെത്തിക്കാനും കഴിഞ്ഞതായി മന്ത്രാലയം അറിയിച്ചു. രാജ്യത്തെ തുറമുഖ പ്രവർത്തനങ്ങൾ സാധാരണ നിലയിലാണെന്നും തിരക്ക് റിപ്പോർട്ട് ചെയ്തിട്ടില്ലെന്നും വ്യക്തമാക്കി.