മധ്യപ്രദേശിലെ ബേതുലിൽ ഇന്ന് നടന്ന “ആത്മീയ ഉണർവിലൂടെ ആദിവാസി സമൂഹ ശാക്തീകരണം” എന്ന പരിപാടിയിൽ രാഷ്ട്രപതി ദ്രൗപദി മുർമു പങ്കെടുത്തു. പ്രജാപിത ബ്രഹ്മകുമാരീസ് ഈശ്വരീയ വിശ്വവിദ്യാലയമാണ് പരിപാടി സംഘടിപ്പിച്ചത്. ചടങ്ങിൽ സംസാരിക്കവേ, വികസനവും പരമ്പരാഗത മൂല്യങ്ങളും തമ്മിലുള്ള സന്തുലിതാവസ്ഥയാണ് ശക്തവും സമൃദ്ധവുമായ സമൂഹത്തിന്റെ അടിത്തറയെന്ന് രാഷ്ട്രപതി പറഞ്ഞു.

ഉപഭോഗ സംസ്കാരം നയിക്കുന്ന ഇന്നത്തെ അതിവേഗ ലോകത്തിൽ ആത്മീയ ശുദ്ധി സമൂഹത്തിന്റെ എല്ലാ വിഭാഗങ്ങൾക്കും അനിവാര്യമാണെന്ന് രാഷ്ട്രപതി വ്യക്തമാക്കി. സമ്മർദവും സംഘർഷവും നിറഞ്ഞ ലോകത്തിൽ ഇത്തരം സമ്മേളനങ്ങൾക്ക് കൂടുതൽ പ്രാധാന്യമുണ്ടെന്നും അവർ പറഞ്ഞു. ആദിവാസി സമൂഹത്തിന്റെ ജീവിതശൈലി ആത്മീയതയുടെ അടിസ്ഥാന പ്രചോദനങ്ങളുമായി സ്വാഭാവികമായി യോജിക്കുന്നതാണെന്നും പ്രകൃതിവിഭവങ്ങളുമായുള്ള അവരുടെ അടുപ്പം സർവജന നന്മ ലക്ഷ്യമിടുന്ന ജീവിതരീതിക്ക് ശക്തി പകരുന്നതാണെന്നും രാഷ്ട്രപതി ചൂണ്ടിക്കാട്ടി.

സമൂഹത്തിലെ ഏതെങ്കിലും വിഭാഗത്തിന്റെ ശാക്തീകരണം സാമ്പത്തിക വികസനത്തിൽ മാത്രം ഒതുങ്ങുന്നതല്ലെന്നും ആത്മവിശ്വാസവും ആത്മാഭിമാനവും സാമൂഹിക ഉത്തരവാദിത്തബോധവും ചേർന്നാലാണ് യഥാർഥ ശാക്തീകരണം സാധ്യമാകുന്നതെന്നും രാഷ്ട്രപതി പറഞ്ഞു. ആത്മീയ ഉണർവ് വ്യക്തികളുടെ ആന്തരിക ശക്തി തിരിച്ചറിയാൻ സഹായിക്കുമെന്നും അവർ വ്യക്തമാക്കി. ആത്മീയത, സാമൂഹിക ഐക്യം, പരിസ്ഥിതി സംരക്ഷണം, മനുഷ്യ ക്ഷേമം എന്നിവയെ ഉൾക്കൊള്ളുന്ന വികസിത ഇന്ത്യയെ 2047ഓടെ സൃഷ്ടിക്കാൻ എല്ലാവരും ഒന്നിച്ച് പ്രവർത്തിക്കണമെന്നും രാഷ്ട്രപതി ആഹ്വാനം ചെയ്തു.

.