തൊടുപുഴ, 2026 ജൂൺ 17 –
ഇടുക്കി ജില്ലയിലെ ഏലപ്പാറ ചെമ്മണ്ണിൽ രണ്ട് വീടുകൾ ഒഴിപ്പിക്കാനുള്ള നടപടിക്കായി എത്തിയ ഉദ്യോഗസ്ഥർ ദൗത്യം താൽക്കാലികമായി നിർത്തി മടങ്ങി. ഹൈക്കോടതി നിർദേശത്തെ തുടർന്ന് 22-ാം തീയതി ഒഴിപ്പിക്കാനിരുന്ന രണ്ട് വീടുകളിലാണ് നടപടി ആരംഭിച്ചത്. വാതിൽ പൊളിച്ച് അകത്ത് പ്രവേശിക്കാനുള്ള ഉത്തരവുമായാണ് ഉദ്യോഗസ്ഥർ സ്ഥലത്തെത്തിയത്.
എന്നാൽ വീട്ടുകാർ ആത്മഹത്യാഭീഷണി മുഴക്കിയതോടെയാണ് നടപടികൾ അവസാനിപ്പിച്ചത്. സ്ഥലത്തിന്റെ ഉടമസ്ഥാവകാശം സംബന്ധിച്ച തർക്കത്തെ തുടർന്നാണ് പ്രശ്നം ഉണ്ടായത്. ഭൂമിയുടെ ഉടമസ്ഥാവകാശം തങ്ങൾക്കാണെന്ന് ചൂണ്ടിക്കാട്ടി ഹെലിബറിയ എസ്റ്റേറ്റ് കോടതിയെ സമീപിക്കുകയും അനുകൂല ഉത്തരവ് നേടുകയും ചെയ്തിരുന്നു. അതിന്റെ അടിസ്ഥാനത്തിലാണ് ഒഴിപ്പിക്കൽ നടപടികൾ ആരംഭിച്ചത്.
അതേസമയം, ഇതേ സ്ഥലത്തിന് തങ്ങൾക്കും പട്ടയം ലഭിച്ചിട്ടുണ്ടെന്നാണ് വീട്ടുകാർ പറയുന്നത്. ലൈഫ് മിഷൻ പദ്ധതിയിലൂടെ ലഭിച്ച വീടാണിതെന്നും കരം അടയ്ക്കുന്നുണ്ടെന്നും വീട്ടുടമ വ്യക്തമാക്കി. ഭാര്യയുടെ പേരിലാണ് വീടെന്നും അദ്ദേഹം പറഞ്ഞു. പുറത്താക്കിയാൽ ആത്മഹത്യ ചെയ്യുമെന്ന മുന്നറിയിപ്പും വീട്ടുടമ നൽകി. സംഭവത്തെ തുടർന്ന് പ്രദേശത്ത് ആശങ്ക നിലനിൽക്കുകയാണ്.
