തിരുവനന്തപുരം, 2026 ജൂൺ 17 –

മുൻ സർക്കാർ നൽകിയ എസ്ഐ നിയമനം റദ്ദാക്കാനുള്ള ആഭ്യന്തര വകുപ്പിന്റെ ഇടപെടലിനെതിരെ ബോഡി ബിൽഡിങ് താരം ഷിനു ചൊവ്വ രംഗത്തെത്തി. നിയമനം റദ്ദാക്കാനുള്ള നീക്കത്തിനെതിരെ നിയമപരമായി മുന്നോട്ട് പോകുമെന്ന് അദ്ദേഹം അറിയിച്ചു. ഇലയിട്ടിട്ട് ഊണില്ലെന്ന് പറഞ്ഞ അവസ്ഥയാണ് ഇപ്പോഴുള്ളതെന്നും നിയമനം റദ്ദാക്കുന്നത് കായികതാരങ്ങളോടുള്ള വെല്ലുവിളിയാണെന്നും ഷിനു ചൊവ്വ പ്രതികരിച്ചു.

തന്റെ നിയമനം പൂർണമായും നിയമപരമായിരുന്നുവെന്നാണ് ഷിനു ചൊവ്വയുടെ വാദം. ഒരു കൂട്ടം ആളുകൾ ആസൂത്രിതമായി ഇടപെട്ടാണ് നിയമനം റദ്ദാക്കാൻ ശ്രമിക്കുന്നതെന്നും അദ്ദേഹം ആരോപിച്ചു. ഒരു രാഷ്ട്രീയ പാർട്ടിയുടെയും ഭാഗമല്ലെന്നും തന്റെ യോഗ്യത ആർക്കും പരിശോധിക്കാമെന്നും ഷിനു ചൊവ്വ പറഞ്ഞു. 69 മില്ലിസെക്കൻഡിന്റെ പേരിലാണ് തന്നെ വേട്ടയാടുന്നതെന്നും കായികക്ഷമതാ പരീക്ഷയുടെ വിവരം നാല് ദിവസം മുൻപാണ് അറിയിച്ചതെന്നും അദ്ദേഹം കൂട്ടിച്ചേർത്തു. മെഡിക്കൽ പരിശോധനയിലും പരാജയപ്പെടുത്താൻ ശ്രമം നടന്നെങ്കിലും അത് വിജയിച്ചില്ലെന്നും തനിക്കെതിരായ നീക്കം ഗൂഢാലോചനയുടെ ഭാഗമാണെന്നും അദ്ദേഹം ആരോപിച്ചു.

ശരീരസൗന്ദര്യ മത്സരവിജയികളായ ഷിനു ചൊവ്വയ്ക്കും ചിത്തരേഷ് നടേശനും കഴിഞ്ഞ പിണറായി സർക്കാരിന്റെ കാലത്താണ് എസ്ഐ നിയമനം ലഭിച്ചത്. ശാരീരികക്ഷമതാ പരീക്ഷയിൽ പരാജയപ്പെട്ട ഇരുവർക്കും പാർട്ടി ബന്ധം പരിഗണിച്ചാണ് നിയമനം നൽകിയതെന്ന ആരോപണം ഉയർന്നിരുന്നു. ഇതിന്റെ പശ്ചാത്തലത്തിലാണ് ആഭ്യന്തര വകുപ്പ് നടപടി ആരംഭിച്ചത്. ഷിനു ചൊവ്വയുടെ പരിശീലനം നിർത്തിവെയ്ക്കാൻ ആഭ്യന്തര മന്ത്രി രമേശ് ചെന്നിത്തല നിർദേശം നൽകി. പരാതികളിൽ അടിയന്തര റിപ്പോർട്ട് സമർപ്പിക്കാനും ഡിജിപിയോട് ആവശ്യപ്പെട്ടിട്ടുണ്ട്. അതേസമയം, കായികക്ഷമതാ പരീക്ഷ സുതാര്യമായിരുന്നില്ലെന്നും ഉദ്യോഗസ്ഥർ മനഃപൂർവം തന്നെ പരാജയപ്പെടുത്തിയെന്നും കാണിച്ച് ഷിനു ചൊവ്വ നേരത്തെ പരാതി നൽകിയിരുന്നു.

.