വടക്കാഞ്ചേരി ബസ് സ്റ്റാൻഡിൽ സ്വകാര്യ ബസിൽ കയറാൻ വിദ്യാർത്ഥികൾ കണ്ടക്ടറോട് യാചിക്കുന്ന ദൃശ്യങ്ങൾ സാമൂഹിക മാധ്യമങ്ങളിൽ വ്യാപകമായി ചർച്ചയാകുകയാണ്. നാല് വിദ്യാർത്ഥികളെ മാത്രം ബസിൽ കയറ്റി യാത്ര ആരംഭിച്ച ബസ് ജീവനക്കാർ, മറ്റ് വിദ്യാർത്ഥികൾ എത്ര ആവശ്യപ്പെട്ടിട്ടും കയറ്റാൻ തയ്യാറായില്ലെന്നാണ് ഉയർന്നിരിക്കുന്ന പരാതി. വടക്കാഞ്ചേരിയിൽ നടന്ന സംഭവത്തിന്റെ ദൃശ്യങ്ങളാണ് ഇപ്പോൾ ശ്രദ്ധ നേടുന്നത്.

സംഭവത്തിനെതിരെ എസ്എഫ്ഐ രംഗത്തെത്തി. കെഎസ്ആർടിസി ബസുകളിൽ സ്ത്രീകൾക്ക് സൗജന്യ യാത്ര അനുവദിച്ചുള്ള പ്രിയദർശിനി പദ്ധതി നടപ്പാക്കിയതിന്റെ പ്രതികാരമാണ് സ്വകാര്യ ബസ് ജീവനക്കാർ വിദ്യാർത്ഥികളോട് കാണിക്കുന്നതെന്ന ആക്ഷേപവും ഉയർന്നിട്ടുണ്ട്. വിദ്യാർത്ഥികളുടെ കാര്യത്തിൽ നിയമനിർമാണവും അതിന്റെ പാലനവും ഉറപ്പാക്കണമെന്ന് എസ്എഫ്ഐ സംസ്ഥാന സെക്രട്ടറി പി എസ് സഞ്ജീവ് ആവശ്യപ്പെട്ടു. കൺസെഷൻ ഔദാര്യമല്ല, അവകാശമാണെന്നും വിദ്യാർത്ഥികളോടുള്ള ക്രൂരത അവസാനിപ്പിക്കണമെന്നും അദ്ദേഹം പറഞ്ഞു.

വടക്കാഞ്ചേരി സംഭവം ഒറ്റപ്പെട്ടതാണെന്ന് കരുതുന്നില്ലെന്നും എസ്എഫ്ഐ നേതൃത്വം പ്രതികരിച്ചു. ഭരണകൂട നയങ്ങൾ മൂലമുള്ള സാമ്പത്തിക നഷ്ടം നികത്താൻ വിദ്യാർത്ഥികളെ ചൂഷണം ചെയ്യാൻ അനുവദിക്കില്ലെന്ന് എസ്എഫ്ഐ സംസ്ഥാന പ്രസിഡന്റ് എം ശിവപ്രസാദ് പറഞ്ഞു. പൊതുനിരത്തിലൂടെയാണ് ബസുകൾ ഓടുന്നതെന്ന് ബസ് ഉടമകൾ ഓർക്കണമെന്നും അദ്ദേഹം കൂട്ടിച്ചേർത്തു. ബസ് ഉടമകളും തൊഴിലാളികളും അവരുടെ ആവശ്യങ്ങൾ സർക്കാരിനോടാണ് ഉന്നയിക്കേണ്ടതെന്നും അതിൽ കുട്ടികൾ എന്ത് തെറ്റ് ചെയ്തുവെന്നുമാണ് എസ്എഫ്ഐയുടെ ചോദ്യം.