ദേശീയതല ഹാക്കത്തോണായ സ്റ്റാറ്റത്തോണിന്റെ മുപ്പത്തിയാറ് മണിക്കൂർ ഗ്രാൻഡ് ഫിനാലെ ഇന്ന് മുതൽ

ദേശീയ സ്ഥിതിവിവര ഓഫീസ് സംഘടിപ്പിക്കുന്ന ദേശീയതല ഹാക്കത്തോണായ “സ്റ്റാറ്റത്തോൺ – വികസിത ഭാരതത്തിനായുള്ള ഡാറ്റാ യാത്ര”യുടെ മുപ്പത്തിയാറ് മണിക്കൂർ ഗ്രാൻഡ് ഫിനാലെ ജൂൺ 17, 18 തീയതികളിൽ ഫരീദാബാദിലെ മനവ് രചന ഇന്റർനാഷണൽ ഇൻസ്റ്റിറ്റ്യൂട്ട് ഓഫ് റിസർച്ച് ആൻഡ് സ്റ്റഡീസിൽ നടക്കും. സ്ഥിതിവിവരക്കണക്ക്, പരിപാടി നടപ്പാക്കൽ മന്ത്രാലയത്തിന് കീഴിലുള്ള ദേശീയ സ്ഥിതിവിവര ഓഫീസും വിദ്യാഭ്യാസ മന്ത്രാലയത്തിന്റെ നവീകരണ വിഭാഗവും ചേർന്നാണ് പരിപാടി സംഘടിപ്പിക്കുന്നത്. ദേശീയ സ്ഥിതിവിവര സംവിധാനവുമായി നേരിട്ട് ബന്ധപ്പെട്ട അഞ്ച് വിഷയങ്ങളാണ് മത്സരത്തിനായി തെരഞ്ഞെടുത്തിരിക്കുന്നത്.

ഉയർന്നുവരുന്ന സാങ്കേതികവിദ്യകൾ ഉപയോഗിച്ച് ദേശീയ സ്ഥിതിവിവര സംവിധാനം കൂടുതൽ ശക്തമാക്കുക എന്ന ലക്ഷ്യത്തോടെയാണ് ഹാക്കത്തോൺ സംഘടിപ്പിക്കുന്നത്. രാജ്യത്തെ വിദ്യാർഥികളിൽ നിന്നും പുതുസംരംഭങ്ങളിൽ നിന്നുമായി അയ്യായിരത്തിലധികം അപേക്ഷകളാണ് ലഭിച്ചത്. ആദ്യഘട്ടത്തിൽ അമ്പത് ടീമുകളെ തെരഞ്ഞെടുത്ത് വിദഗ്ധരുടെ മാർഗനിർദേശത്തോടെ പരിശീലനം നൽകി. തുടർന്ന് സർക്കാർ, വ്യവസായ മേഖലകളിലെ വിദഗ്ധർ നടത്തിയ വിലയിരുത്തലിലൂടെ ഇരുപത്തിയഞ്ച് ടീമുകൾ ഗ്രാൻഡ് ഫിനാലെയിലേക്ക് യോഗ്യത നേടി. ഇതിൽ ഇരുപത്തിയൊന്ന് ടീമുകൾ വിദ്യാഭ്യാസ സ്ഥാപനങ്ങളെയും നാല് ടീമുകൾ പുതുസംരംഭങ്ങളെയും പ്രതിനിധീകരിക്കുന്നു.

ദേശീയ സ്ഥിതിവിവര ഓഫീസ് സംഘടിപ്പിക്കുന്ന ഹാക്കത്തോണുകളുടെ പരമ്പരയിലെ മൂന്നാമത്തെ പരിപാടിയാണിത്. സർവേ വിവരശേഖരണം, വിവരസംസ്‌കരണം, വിവരസുരക്ഷ, ഉപയോക്തൃ സൗഹൃദ വിവരലഭ്യത, തൊഴിൽ വർഗീകരണത്തിനായുള്ള ബുദ്ധിപരമായ തിരച്ചിൽ സംവിധാനം തുടങ്ങിയ മേഖലകളിലാണ് പ്രശ്നവിഷയങ്ങൾ നിശ്ചയിച്ചിരിക്കുന്നത്. ഗ്രാൻഡ് ഫിനാലെയിൽ പങ്കെടുക്കുന്ന ടീമുകൾ വിദഗ്ധരുടെ മേൽനോട്ടത്തിൽ പരിഹാരങ്ങൾ വികസിപ്പിക്കും. ജൂൺ 18ന് ടീമുകളുടെ അവതരണവും വിജയികളുടെ പ്രഖ്യാപനവും നടക്കും.

.