ഡി എച്ച് എസ് ഡോ. കെ. റീനയുടെ സ്ഥലംമാറ്റ ഉത്തരവില്‍ തിരുത്ത്; അവധി പരാമര്‍ശം ഒഴിവാക്കി

തിരുവനന്തപുരം, 2026 ജൂണ്‍ 15 –

ആരോഗ്യവകുപ്പ് ഡയറക്ടര്‍ (ഡി എച്ച് എസ്) ഡോ. കെ. റീനയെ സ്ഥലംമാറ്റിയ ഉത്തരവില്‍ ആരോഗ്യവകുപ്പ് തിരുത്ത് വരുത്തി. ഡോ. റീന 15 ദിവസത്തെ അവധിക്ക് അപേക്ഷിച്ചതിനാലാണ് മാറ്റമെന്ന പരാമര്‍ശം പുതിയ ഉത്തരവില്‍ ഒഴിവാക്കി. പുതിയ ഡി എച്ച് എസിന്റെ നിയമന നടപടികള്‍ നടക്കുന്നതിനാലാണ് സ്ഥലംമാറ്റമെന്നാണ് പുതുക്കിയ ഉത്തരവില്‍ പറയുന്നത്.

15 ദിവസത്തെ അവധിക്ക് അപേക്ഷിച്ചതിനാലാണ് മാറ്റമെന്ന ആദ്യ ഉത്തരവിനെതിരെ ഡോ. റീന ഉള്‍പ്പെടെ വിമര്‍ശനം ഉയര്‍ന്നിരുന്നു. താന്‍ 15 ദിവസത്തെ അവധിക്ക് അപേക്ഷിച്ചിട്ടില്ലെന്നും ശാരീരിക അസ്വസ്ഥത കാരണം രണ്ടര ദിവസത്തെ അവധിയാണ് ആവശ്യപ്പെട്ടിരുന്നതെന്നും ഡോ. റീന വ്യക്തമാക്കിയിരുന്നു. ദീര്‍ഘകാല സര്‍വീസിന് ശേഷം വിരമിക്കുന്ന ഒരാള്‍ക്കെതിരെ തെറ്റായ ചിത്രം സൃഷ്ടിക്കരുതെന്നും അവര്‍ ആവശ്യപ്പെട്ടിരുന്നു.

അതേസമയം, ഡോ. റീനയ്‌ക്കെതിരായ നടപടി “തുരപ്പന്‍ പണി” കാണിച്ചതിനാലാണെന്ന് ആരോഗ്യമന്ത്രി കെ മുരളീധരന്‍ കഴിഞ്ഞ ദിവസം വ്യക്തമാക്കിയിരുന്നു. നിപ പരിശോധനാ ഫലം ലഭിച്ചിട്ടും അത് മന്ത്രിയെ മുന്‍കൂട്ടി അറിയിച്ചില്ലെന്നാണ് മന്ത്രിയുടെ ആരോപണം. വാര്‍ത്താസമ്മേളനത്തില്‍ പങ്കെടുത്തിരുന്ന ഡി എച്ച് എസിന് ഉച്ചയ്ക്ക് ഒരു മണിക്ക് തന്നെ പരിശോധനാഫലം ലഭ്യമായിരുന്നുവെന്നും എന്നാല്‍ വൈകിട്ട് ആറുമണിയോടെയാണ് വിവരം അറിയിച്ചതെന്നും മന്ത്രി പറഞ്ഞു. ഡി എച്ച് എസ് സര്‍ക്കാരുമായി പൂര്‍ണമായി സഹകരിച്ചില്ലെന്നും വകുപ്പില്‍ ചിലര്‍ തുരപ്പന്‍ പണി കാണിക്കുന്നുണ്ടെന്നും മന്ത്രി ആരോപിച്ചു. ഇത്തരം സാഹചര്യങ്ങളാണ് സ്ഥലംമാറ്റത്തിന് കാരണമായതെന്നും ഭാവിയിലും സമാന നടപടികള്‍ ഉണ്ടാകുമെന്നും അദ്ദേഹം വ്യക്തമാക്കിയിരുന്നു.