കൊച്ചി, 2026 ജൂൺ 10

ശബരിമല ക്ഷേത്ര ഭരണത്തിലും അഷ്ടാഭിഷേകം ഉൾപ്പെടെയുള്ള പൂജകളുടെ നടത്തിപ്പിലും സാമ്പത്തിക കാര്യങ്ങളിലും ഗുരുതര ക്രമക്കേടുകളും സുതാര്യതക്കുറവും ഉണ്ടായതായി വിജിലൻസ് റിപ്പോർട്ടിൽ കണ്ടെത്തിയ സാഹചര്യത്തിൽ കർശന നടപടിക്ക് കേരള ഹൈക്കോടതി നിർദേശം നൽകി. കഴിഞ്ഞ 10 വർഷത്തിനിടെ നടന്ന അഷ്ടാഭിഷേകം, മഹാനിവേദ്യം, ഗണപതിഹോമം, മറ്റ് വഴിപാടുകൾ എന്നിവയുമായി ബന്ധപ്പെട്ട എല്ലാ രേഖകളും 10 ദിവസത്തിനകം ഹാജരാക്കാൻ തിരുവിതാംകൂർ ദേവസ്വം ബോർഡിനോട് കോടതി ആവശ്യപ്പെട്ടു.

സുനിൽ സ്വാമി എന്ന സുനിൽ കുമാറോ മറ്റ് സ്പോൺസർമാരോ നൽകിയ പൂജാസാധനങ്ങളുടെ പൂർണ വിവരങ്ങൾ, രജിസ്റ്ററുകൾ, രസീതുകൾ, സ്റ്റോക്ക് രേഖകൾ എന്നിവയും സമർപ്പിക്കണം. ബോർഡിന്റെ മുൻകാല അക്കൗണ്ടുകൾ പരിശോധിച്ച സ്വതന്ത്ര ഓഡിറ്ററുടെയോ ബാഹ്യ ഏജൻസിയുടെയോ വിവരങ്ങളും ഓഡിറ്റ് റിപ്പോർട്ടുകളുടെ പകർപ്പുകളും നൽകാൻ കോടതി നിർദേശിച്ചു. ജസ്റ്റിസുമാരായ വി. രാജാ വിജയരാഘവൻ, കെ. വി. ജയകുമാർ എന്നിവരടങ്ങിയ ഡിവിഷൻ ബെഞ്ചാണ് ഉത്തരവ് പുറപ്പെടുവിച്ചത്. ലഭിക്കുന്ന രേഖകൾ സ്വതന്ത്രമായി പരിശോധിച്ച് നിലവിലെ സാമ്പത്തിക നടത്തിപ്പ് സുതാര്യമാണോ, പണം തട്ടിയെടുക്കൽ തടയാൻ മതിയായ സുരക്ഷാ സംവിധാനങ്ങളുണ്ടോ തുടങ്ങിയ കാര്യങ്ങളിൽ റിപ്പോർട്ട് സമർപ്പിക്കാൻ ഓഡിറ്റ് വിഭാഗത്തിനും കോടതി നിർദേശം നൽകി.

അഷ്ടാഭിഷേക പൂജകളുടെ നടത്തിപ്പിലും പൂജാസാധനങ്ങൾ വാങ്ങുന്നതിനുള്ള തുക ഈടാക്കുന്ന രീതിയിലും ഗുരുതര പ്രശ്നങ്ങൾ ഉണ്ടെന്ന കാര്യം കോടതി നേരത്തെയും ചൂണ്ടിക്കാട്ടിയിരുന്നു. അഷ്ടാഭിഷേകത്തിന് സപ്ലയർ ചെലവെന്ന പേരിൽ തുക കൈപ്പറ്റിയെങ്കിലും അതിന് ആവശ്യമായ ബില്ലുകളോ വൗച്ചറുകളോ വാങ്ങൽ രേഖകളോ ഇല്ലെന്നായിരുന്നു പ്രധാന ആരോപണം. സുനിൽ കുമാർ എന്ന സുനിൽ സ്വാമി ക്ഷേത്രത്തിലേക്ക് പൂജാസാധനങ്ങൾ വിതരണം ചെയ്തതിലും ക്രമക്കേടുകൾ ഉണ്ടെന്ന പരാതിയും പരിഗണനയിലാണ്. കേസ് ഈ മാസം 19ന് വീണ്ടും പരിഗണിക്കും.