ഇരിട്ടി, 2026 ജൂൺ 7 –
തൊഴിൽരഹിതരായ വനിതകൾക്ക് പരിശീലനം നൽകി പായം പഞ്ചായത്തിനെ ബാംബൂ ഇൻഡസ്ട്രിയൽ വില്ലേജാക്കി മാറ്റാനുള്ള പദ്ധതിയുമായി പഞ്ചായത്ത് രംഗത്ത്. 2023-ൽ വയനാട് ജീവൻജ്യോതിയുമായി സഹകരിച്ച് ബാരാപ്പുഴ പുഴയോരത്ത് 10 കിലോമീറ്റർ ദൂരത്തിൽ 26 ഇനങ്ങളിലായി 5,000 മുളകൾ നട്ടുപിടിപ്പിച്ചിരുന്നു. മൂന്ന് വർഷത്തിനുള്ളിൽ ഇവ വളർന്ന് മുളങ്കാടുകളായി മാറിയിരിക്കുകയാണ്.
കിളിയന്തര പ്രദേശത്ത് മുള, ഈറ്റ, പനമ്പ് എന്നിവ ഉപയോഗിച്ചുള്ള കരകൗശല ഉത്പന്ന നിർമാണം ഒരുകാലത്ത് പ്രധാന ഉപജീവന മാർഗമായിരുന്നു. എന്നാൽ ആവശ്യത്തിന് മുള ലഭിക്കാതിരുന്നതും വിതരണത്തിലെ കാലതാമസവും കാരണം നിരവധി പരമ്പരാഗത തൊഴിലാളി കുടുംബങ്ങൾ തൊഴിലില്ലായ്മ നേരിട്ടു. ഈ സാഹചര്യത്തിലാണ് തൊഴിലാളികൾക്ക് മുള ലഭ്യമാക്കുന്നതിനും പുഴയോര സംരക്ഷണം ഉറപ്പാക്കുന്നതിനുമായി പഞ്ചായത്ത് മുളഗ്രാമം പദ്ധതി ആരംഭിച്ചത്.
വളർച്ചയെത്തിയ മുളകൾ ഉപയോഗിച്ച് മൂല്യവർധിത കരകൗശല ഉത്പന്നങ്ങൾ നിർമിച്ച് വിപണിയിലെത്തിക്കുന്ന തരത്തിൽ പായത്തെ മുള അധിഷ്ഠിത വ്യവസായ വില്ലേജാക്കി മാറ്റുകയാണ് ലക്ഷ്യമെന്ന് പഞ്ചായത്ത് പ്രസിഡന്റ് എം. വിനോദ്കുമാർ അറിയിച്ചു. ആദ്യഘട്ടത്തിൽ താൽപര്യമുള്ള 100 പേർക്ക് സ്റ്റൈപ്പൻഡോടെ പരിശീലനം നൽകും. പരമ്പരാഗത മുള ഉത്പന്ന നിർമാണം, മ്യൂറൽ പെയിന്റിംഗ്, ബാംബൂ മ്യൂറൽ ഡെക്കാപേജ് തുടങ്ങിയ മേഖലകളിലാണ് പരിശീലനം. അഞ്ച് വർഷത്തിനുള്ളിൽ 400 തൊഴിൽരഹിത വനിതകൾക്ക് സ്വയംതൊഴിൽ ലഭ്യമാക്കാനാണ് പഞ്ചായത്ത് ലക്ഷ്യമിടുന്നത്.
