ഉമ്മൻ ചാണ്ടിയുടെ ജീവിതം സിനിമയാകുന്നു

കോട്ടയം, 2026 ജൂൺ 4  ഉമ്മൻ ചാണ്ടിയുടെ ജീവിതകഥ സിനിമയാകുന്നു. ഉമ്മൻ ചാണ്ടി ഫൗണ്ടേഷൻ നേരിട്ട് നിർമിക്കുന്ന ചിത്രത്തിന്റെ തിരക്കഥയും സംഭാഷണവും ഒരുക്കുന്നത് സംവിധായകനും തിരക്കഥാകൃത്തുമായ വിനോദ് ഗുരുവായൂരാണ്.

ഉമ്മൻ ചാണ്ടിയുടെ മകനും നിയമസഭാംഗവുമായ ചാണ്ടി ഉമ്മനാണ് ഇക്കാര്യം അറിയിച്ചത്. അപ്പയുടെ ജീവിതം പുതിയ തലമുറയിലേക്ക് കൃത്യമായി എത്തിക്കാൻ ഈ സിനിമയ്ക്ക് കഴിയുമെന്നാണ് അദ്ദേഹത്തിന്റെ പ്രതീക്ഷ. ഉമ്മൻ ചാണ്ടിയുമായി അടുത്ത ബന്ധമുണ്ടായിരുന്ന നിരവധി ആളുകളിൽ നിന്ന് ശേഖരിച്ച വിവരങ്ങളും പൊതുജനങ്ങൾക്ക് അധികം അറിയാത്ത പല പ്രധാന സംഭവങ്ങളും സിനിമയിൽ ഉൾപ്പെടുത്തുമെന്ന് അദ്ദേഹം പറഞ്ഞു.

തിരക്കഥ പൂർത്തിയായ ശേഷമാകും സംവിധായകനെയും അഭിനേതാക്കളെയും തീരുമാനിക്കുക. ചില സംവിധായകരെയും നടന്മാരെയും മനസിൽ കണ്ടിട്ടുണ്ടെന്നും പിന്നീട് അവരെ സമീപിക്കുമെന്നും ചാണ്ടി ഉമ്മൻ വ്യക്തമാക്കി. ഉമ്മൻ ചാണ്ടിയുടെ ജീവിതം സിനിമയാകുക എന്നത് തന്റെ മാത്രമല്ല, ഓരോ മലയാളിയുടെയും ആഗ്രഹമാണെന്നും അദ്ദേഹം കൂട്ടിച്ചേർത്തു.