കൊച്ചി: എറണാകുളം സൗത്ത് റെയിവേ സ്റ്റേഷന് സമീപത്ത് ആക്രി സാധനങ്ങള് സൂക്ഷിച്ചിരുന്ന ഷെഡില് തീപിടിത്തം. സൗത്ത് പാലത്തിന് സമീപമാണ് തീപിടിത്തം ഉണ്ടായത്. ഉടന് അഗ്നിരക്ഷസേന എത്തി തീയണച്ചതിനാല് വലിയ ദുരന്തം ഒഴിവായി. സൗത്ത് റെയിവേ സ്റ്റേഷനും റെയില്വേ ഓവര് ബ്രിഡ്ജിനും മെട്രോ റെയില് പാലത്തിനും നടുവിലുള്ള ഷെഡിനാണ് തീപിടിച്ചത്.
നഗരത്തിൽ കനത്ത പുക ഉയര്ന്നു.
ട്രെയ്നിലും റെയില്വേ പാലത്തിലുമൊക്കെ ഉണ്ടാകുന്ന മാലിന്യമാണ് ഈ ഷെഡില് സൂക്ഷിച്ചിരുന്നത്. ആസ്പറ്റോസ് കൊണ്ടുണ്ടാക്കിയ ഷെഡില് പെട്ടെന്ന് തന്നെ തീ പടര്ന്നു പിടിക്കുകയായിരുന്നു. തീ പടര്ന്ന ഉടന് തന്നെ സമീപത്തുള്ള കടക്കാരാണ് അഗ്നിരക്ഷാസേനയെ വിവരമറിയിച്ചത്.
ഒപ്പം തന്നെ അതുവഴി പോയ ഒരു കുടിവെള്ള ടാങ്കറില് നിന്നും വെള്ളമെടുത്ത് ആളുകള് തീയണയ്ക്കാനും ശ്രമിച്ചിരുന്നു. ഫയര് ഫോഴ്സ് എത്തി മുക്കാല് മണിക്കൂറോളം ശ്രമിച്ചാണ് തീയണച്ചത്. പ്ലാസ്റ്റിക് അടക്കമുള്ള മാലിന്യം കത്തിയതില് സമീപത്ത് തീയണച്ച ശേഷം കനത്ത പുക ഉയര്ന്നു.
