പത്തനംതിട്ട: പരുമല പള്ളി തിരുനാളിനോടനുബന്ധിച്ച് നാളെ (3/11/2025) മൂന്ന് താലൂക്കുകളിലെ എല്ലാ സര്ക്കാര് ഓഫീസുകള്ക്കും വിദ്യാഭ്യാസ സ്ഥാപനങ്ങള്ക്കും പ്രാദേശിക അവധി പ്രഖ്യാപിച്ചു. പത്തനംതിട്ടയിലെ തിരുവല്ല, ആലപ്പുഴ ജില്ലയിലെ മാവേലിക്കര, ചെങ്ങന്നൂര് താലൂക്കുകളിലാണ് പ്രാദേശിക അവധി പ്രഖ്യാപിച്ചിട്ടുള്ളത്. മുന്കൂട്ടി നിശ്ചയിച്ച പൊതു പരീക്ഷകള്ക്ക് അവധി ബാധകമല്ലെന്ന് കളക്ടര്മാര് വ്യക്തമാക്കിയിട്ടുണ്ട്.
ഹരിതചട്ടങ്ങള് കര്ശനമായി പാലിക്കുന്നതിന് തീരുമാനം
പരുമല തിരുമേനിയുടെ 123-ാമത് ഓര്മ്മപ്പെരുന്നാളിനോടനുബന്ധിച്ച് സംസ്ഥാന ആരോഗ്യമന്ത്രി വീണാ ജോര്ജിന്റെ അദ്ധ്യക്ഷതയില് സര്ക്കാര്തല ആലോചനായോഗം നടന്നിരുന്നു. പെരുന്നാളുമായി ബന്ധപ്പെട്ട് വിവിധ വകുപ്പുകളുടെ പ്രവര്ത്തനങ്ങള് ഏകോപിപ്പിക്കുകയും ഹരിതചട്ടങ്ങള് കര്ശനമായി പാലിക്കുന്നതിനും വിപുലമായ ക്രമീകരണങ്ങള് ഏര്പ്പെടുത്തുന്നതിനും യോഗത്തില് തീരുമാനമായി.
.
കെഎസ്ആര്ടിസി പ്രത്യേക സര്വീസുകള് നടത്തും
വിവിധ ഡിപ്പോകളില്നിന്ന് കെഎസ്ആര്ടിസിയുടെ പ്രത്യേക സര്വീസുകള് നടത്താനും പഞ്ചായത്തിന്റെ സഹകരണത്തോടെ കുടിവെള്ളം വിതരണം ഉറപ്പാക്കാനും റോഡുകളുടെയും പാലങ്ങളുടെയും അറ്റകുറ്റപ്പണികള് അടിയന്തരമായി പൂര്ത്തിയാക്കാനും നിര്ദേശിച്ചിട്ടുണ്ട്. വഴിവിളക്കുകള് പ്രകാശിപ്പിക്കുന്നതിന് ആവശ്യമായ നടപടികള് സ്വീകരിക്കാനും യോഗം തീരുമാനിച്ചു
