.നെയ്യാറ്റിൻകര: വിദ്യാഭ്യാസ സ്ഥാപനങ്ങൾ കേന്ദ്രീകരിച്ച് വിതരണം ചെയ്യുന്നതിനായി മറ്റ് സംസ്ഥാനങ്ങളിൽ നിന്ന് വൻതോതിൽ കഞ്ചാവ് കടത്തിക്കൊണ്ടുവരുന്ന പ്രതിയെ പോലീസ് പിടികൂടി. പെരിങ്ങമല സ്വദേശി അഭിഷേക് (38) ആണ് പിടിയിലായത്. കഞ്ചാവ് അടക്കമുള്ള കേസുകളിൽ പ്രതിയായ ആളാണ് ഇയാൾ. കൂടാതെ, കഴിഞ്ഞ ദിവസം അറസ്റ്റിലായ ചക്കര പ്രവീൺ എന്ന പ്രവീണിന്റെ കൂട്ടാളിയുമാണ്.
കേരള-തമിഴ്നാട് അതിർത്തി പ്രദേശങ്ങളിൽ വിതരണം
ആഡംബര കാറുകളിലൂടെ ആന്ധ്രപ്രദേശിലെ ഉൾവന മേഖലകളിൽ നിന്ന് 100 കിലോഗ്രാമിന് മുകളിലായി കഞ്ചാവ് കടത്തിക്കൊണ്ടുവന്ന്, കേരള-തമിഴ്നാട് അതിർത്തി പ്രദേശങ്ങളിലെ ഗോഡൗണുകളിൽ ഇറക്കിയ ശേഷം ചെറുകച്ചവടക്കാർക്ക് 10-15 കിലോ വീതം വിതരണം ചെയ്യുന്നതാണ് ഇയാളുടെ രീതി.
ഗുണ്ടാ ശാന്തിഭൂഷന്റെ അറസ്റ്റ്
അഭിഷേക്കിൽ നിന്ന് കഞ്ചാവ് വാങ്ങിയ നിരവധി കേസുകളിൽ പ്രതിയായ ഗുണ്ടാ ശാന്തിഭൂഷനെ കഴിഞ്ഞ മാസം 10 കിലോ കഞ്ചാവുമായി പോലീസ് കസ്റ്റഡിയിൽ എടുത്തിരുന്നു. ചോദ്യം ചെയ്തതിൽ നിന്നാണ് കഞ്ചാവ് കടത്തിയത് പ്രവീൺ, അഭിഷേക് എന്നിവരാണെന്ന് സ്ഥിരീകരിച്ചത്
.
