ന്യൂഡല്ഹി: പാര്ലമെന്റിന്റെ മണ്സൂണ് സെഷനില് കേന്ദ്രസര്ക്കാരിനെതിരേ ലോക്സഭയില് അവിശ്വാസ പ്രമേയം അവതരിപ്പിക്കാനുള്ള നീക്കവുമായി പ്രതിപക്ഷ സഖ്യം. ‘ഇന്ത്യ’ പ്രതിപക്ഷ സഖ്യത്തിലെ പ്രമുഖരായ തൃണമൂല് കോണ്ഗ്രസിനെ ഉദ്ധരിച്ച് ദേശീയമാധ്യമങ്ങളാണ് ഇക്കാര്യം റിപ്പോര്ട്ട് ചെയ്തത്. 25/07/23 ചൊവ്വാഴ്ച രാവിലെ നടന്ന ‘ഇന്ത്യ’ സഖ്യത്തിന്റെ യോഗത്തില് അവിശ്വാസ പ്രമേയ നോട്ടീസ് സമര്പ്പിക്കുന്നതുമായി ബന്ധപ്പെട്ട വിഷയം ചര്ച്ചചെയ്തതായാണു എന്നാണ് വിവരം.
മണിപ്പുര് വിഷയത്തില് പ്രധാനമന്ത്രി നരേന്ദ്ര മോദിയേക്കൊണ്ട് പാര്ലമെന്റില് പ്രസ്താവന നടത്തിക്കാനുള്ള കഠിനശ്രമത്തിലാണ് പ്രതിപക്ഷം. സര്ക്കാരിനേക്കൊണ്ട് ചര്ച്ചയ്ക്ക് തുടക്കം കുറിപ്പിക്കാനുള്ള മാര്ഗമായാണ് അവിശ്വാസ പ്രമേയത്തെ പ്രതിപക്ഷം കാണുന്നത്. മണിപ്പുര് വിഷയത്തില് രാജ്യസഭയിലും സര്ക്കാരിനെ പ്രതിരോധത്തിലാക്കാനാണ് പ്രതിപക്ഷം ശ്രമിക്കുന്നത്. ഇതിനിടെ, മണിപ്പുര് കലാപത്തില് പ്രധാനമന്ത്രി നരേന്ദ്രമോദി സഭയില് പ്രസ്താവന നടത്തണമെന്ന ആവശ്യത്തില് പ്രതിപക്ഷം ഉറച്ചുനിന്നതോടെ ചൊവ്വാഴ്ചയും സഭ പ്രക്ഷുബ്ധമായി. തുടര്ന്ന് ലോക്സഭ ഉച്ചയ്ക്ക് രണ്ടുമണിവരേയും രാജ്യസഭ 12 മണിവരേയും നിര്ത്തിവെച്ചു.
