ഏരുവേശ്ശി ഗ്രാമപഞ്ചായത്തിലെ നാലാം വാർഡിൽ സംസ്ഥാന ഭൂജല വകുപ്പിന്റെ സ്കീമിൽ ഉൾപ്പെടുത്തി നടപ്പിലാക്കിയ നെല്ലിക്കുറ്റി ടൗൺ ഭൂജലാധിഷ്ഠിത കുടിവെള്ള പദ്ധതി ജലവിഭവ വകുപ്പ് മന്ത്രി റോഷി അഗസ്റ്റിൻ ഉദ്ഘാടനം ചെയ്തു. സജീവ് ജോസഫ് എംഎൽഎ അധ്യക്ഷനായി.
ഗ്രാമീണ മേഖലയിലേയും കോളനികളിലേയും കുടിവെള്ളക്ഷാമം പരിഹരിക്കുന്നതിന് വേണ്ടി കേരള സർക്കാർ ആവിഷ്കരിച്ച, കുഴൽ കിണർ ഉപയോഗപ്പെടുത്തിയുള്ള പദ്ധതിയാണ് ഭൂജലാധിഷ്ഠിത കുടിവെള്ള പദ്ധതി. നെല്ലിക്കുറ്റിയിൽ വിഭാവനം ചെയ്ത രീതിയിൽ 23 ടാപ്പുകൾ നൽകി സമയബന്ധിതമായി പദ്ധതി പൂർത്തീകരിച്ചു. നെല്ലിക്കുറ്റി ടൗണിൽ നിലവിലുള്ള പൊതു കുഴൽ കിണർ ഉപയോഗപ്പെടുത്തിയാണ് പദ്ധതി നടപ്പിലാക്കിയത്. ഭൂജല വകുപ്പ് ഡയറക്ടറേറ്റ് സൂപണ്ടിംഗ് ഹൈഡ്രോ ജിയോളജിസ്റ്റ് എം ജി ഗോപകുമാർ റിപ്പോർട്ട് അവതരിപ്പിച്ചു. ഇരിക്കൂർ ബ്ലോക്ക് പഞ്ചായത്തംഗം സോജൻ കാരമായിൽ, ഏരുവേശ്ശി ഗ്രാമപഞ്ചായത്ത് അംഗം മിനി ഷൈബി, ഭൂജല വകുപ്പ് ജില്ലാ ഓഫീസർ ബി ഷാബി, നെല്ലിക്കുറ്റി വികാരി മാത്യു ഓലിക്കൽ, വിവിധ കക്ഷി നേതാക്കളായ ജോയ് കൊന്നക്കൽ, എം സി രാഘവൻ, അജികുമാർ കരിയിൽ, ജോസ് ചെമ്പേരി, ജോസഫ് പരത്തിനാൽ, ജോസഫ് പാലോലിൽ, ടോമി ആനിക്കൂട്ടത്തിൽ, വ്യാപാരി വ്യവസായി ഏകോപന സമിതി നെല്ലിക്കുറ്റി പ്രസിഡൻറ് സുനിൽ, അസി. എക്സിക്യുട്ടീവ് എൻജിനീയർ കെ പി ധനേശൻ എന്നിവർ സംസാരിച്ചു.
