ന്യൂഡൽഹി: രണ്ട് വർഷത്തിന് ശേഷം പ്ലാറ്റ്ഫോമിലെ രാഷ്ട്രീയ പരസ്യങ്ങൾക്കുള്ള നിരോധനം മാറ്റാൻ ഒരുങ്ങുകയാണ് ഇലോൺ മസ്കിന്റെ ട്വിറ്റർ. അഫിലിയേറ്റഡ് അക്കൗണ്ടായ ട്വിറ്റർ സേഫ്റ്റി വെളിപ്പെടുത്തിയതുപോലെ, വരും ആഴ്ചകളിൽ കമ്പനി രാഷ്ട്രീയ പരസ്യ പെർമിറ്റ് വിപുലീകരിക്കും. തിരഞ്ഞെടുപ്പുകളിലെ തെറ്റായ വിവരങ്ങൾ തങ്ങളുടെ സേവനങ്ങളിലുടനീളം പ്രചരിപ്പിക്കാൻ അനുവദിച്ചതിന് വ്യാപകമായ വിമർശനം നേരിട്ടതിനെ തുടർന്ന് 2019ൽ ട്വിറ്റർ രാഷ്ട്രീയ പരസ്യങ്ങൾ നിരോധിച്ചിരുന്നു.
ഫേസ്ബുക്ക് പോലുള്ള മറ്റ് സോഷ്യൽ മീഡിയ കമ്പനികളും സമാനമായ കാരണങ്ങളാൽ രാഷ്ട്രീയ പരസ്യങ്ങൾ നിയന്ത്രിച്ചു വരികയാണ്. പ്രധാന വിഷയങ്ങളെക്കുറിച്ചുള്ള പൊതു സംഭാഷണം സുഗമമാക്കുന്നതിന് ഇത്തരം പരസ്യങ്ങൾ വീണ്ടും അവതരിപ്പിക്കാനും പദ്ധതിയിടുന്നതായി ട്വിറ്റർ അറിയിച്ചിട്ടുണ്ട്.
രാഷ്ട്രീയ പരസ്യങ്ങൾ നിരോധനം ഏർപ്പെടുത്തിയ അതേ സമയത്തുതന്നെ ട്വിറ്ററിൽ സാമൂഹിക വിഷയങ്ങളുമായി ബന്ധപ്പെട്ട പരസ്യങ്ങളും നിയന്ത്രിച്ചിരുന്നു. നിലവിൽ യുഎസിൽ മാത്രമാണ് ഇത്തരം പരസ്യങ്ങൾക്ക് ഇളവ് നൽകിയിരിക്കുന്നത്.
“മുന്നോട്ട് പോകുമ്പോൾ, ഞങ്ങളുടെ പരസ്യ നയം ടിവിയുടെയും മറ്റ് മീഡിയ ഔട്ട്ലെറ്റുകളുടെയും നയവുമായി വിന്യസിക്കും. എല്ലാ നയ മാറ്റങ്ങളും പോലെ ഉള്ളടക്കം അവലോകനം ചെയ്യുന്നതിനും അംഗീകരിക്കുന്നതിനുമുള്ള ഞങ്ങളുടെ സമീപനം ട്വിറ്ററിലെ ആളുകളെ സംരക്ഷിക്കുന്നുവെന്ന് ഞങ്ങൾ ആദ്യം ഉറപ്പാക്കും. ഇതിന്റെ നടപടികൾ പുരോഗമിക്കുമ്പോൾ ഞങ്ങൾ കൂടുതൽ വിശദാംശങ്ങൾ പങ്കിടും” മറ്റൊരു ട്വീറ്റിലൂടെ ട്വിറ്റർ അറിയിച്ചു.
രാഷ്ട്രീയ പരസ്യങ്ങൾ സ്വയം നേടേണ്ടതാണെന്നും പണം കൊടുത്ത് വാങ്ങാനുള്ളതല്ലെന്നും 2019ൽ അന്നത്തെ സിഇഒ ജാക്ക് ഡോർസി പറഞ്ഞിരുന്നു. ആളുകൾ ഒരു അക്കൗണ്ട് പിന്തുടരാനോ റീട്വീറ്റ് ചെയ്യാനോ തീരുമാനിക്കുമ്പോൾ രാഷ്ട്രീയ സന്ദേശം എത്തിച്ചേരുമെന്ന് അദ്ദേഹം കൂട്ടിച്ചേർത്തു, റീച്ചിനായി പണം നൽകുന്നത് ആ തീരുമാനത്തെ ബാധിക്കുകയും വ്യക്തമായ ലക്ഷ്യമുള്ള രാഷ്ട്രീയ സന്ദേശങ്ങൾ ആളുകളിലെത്താൻ നിർബന്ധിതമാകുകയും ചെയ്യുന്നു. “പണത്തിന് വേണ്ടി ഈ തീരുമാനം മാറ്റാൻ ഉദ്ദേശിക്കുന്നില്ല” ഡോർസി 2019 ഒക്ടോബറിൽ പറഞ്ഞു.
എന്നാൽ ട്വിറ്ററിന്റെ പുതിയ ഉടമ ഇലോൺ മസ്ക്, ഈ പ്ലാറ്റ്ഫോം സ്വതന്ത്രമായ അഭിപ്രായത്തിനുള്ള ഒരു ലക്ഷ്യ സ്ഥാനമാകണമെന്ന് താൻ ആഗ്രഹിക്കുന്നതായി ആവർത്തിച്ച് പറഞ്ഞിരുന്നു. ഇതിന്റ ഭാഗമായി വോട്ടെടുപ്പിന് ശേഷം മുൻ അമേരിക്കൻ പ്രസിഡന്റ് ഡൊണാൾഡ് ട്രംപിനെതിരായ വിലക്ക് മസ്ക് പിൻവലിച്ചിരുന്നു. തന്റെ ഏറ്റവും പുതിയ തീരുമാനത്തിലൂടെ കമ്പനിയുടെ വരുമാനം നഷ്ടം കുറയ്ക്കാമെന്ന് മസ്ക് കണക്കുകൂട്ടുന്നു.
അതേസമയം, ചെലവ് ചുരുക്കൽ നടപടികളുടെ ഭാഗമായി മസ്ക് ഇതിനകം തന്നെ ട്വിറ്ററിലെ 50 ശതമാനത്തിലധികം തൊഴിലാളികളെ പിരിച്ചുവിട്ടിട്ടുണ്ട്. ഇത് കമ്പനിയിലെ ജീവനക്കാരുടെ എണ്ണം 7500ൽ നിന്ന് ഏകദേശം 2500 ആയി കുറച്ചു. സാമ്പത്തിക വർഷാവസാനത്തോടെ കൂടുതൽ പിരിച്ചുവിടലുകൾ നടക്കുമെന്ന ആശങ്ക പലരും പങ്കു വയ്ക്കുന്നുമുണ്ട്.
വർത്തനച്ചെലവ് കുറയ്ക്കാൻ മസ്ക് ചില കടുത്ത തീരുമാനങ്ങളും എടുത്തിട്ടുണ്ട്. ഇതിനിടെ സാൻ ഫ്രാൻസിസ്കോ ഓഫീസ് സ്ഥിതി ചെയ്യുന്ന ഹാർട്ട്ഫോർഡ് ബിൽഡിംഗിന്റെ ഭൂവുടമ ട്വിറ്ററിനെതിരെ കോടതിയെ സമീപിച്ചത് വാർത്തയായിരുന്നു. ഏകദേശം 1.12 കോടി രൂപയുടെ വാടക മസ്ക് അടച്ചിട്ടില്ലെന്നാണ് റിപ്പോർട്ടുകൾ.
ജീവനക്കാരുടെ ഉച്ചഭക്ഷണത്തിനുള്ള ചെലവ് കുറയ്ക്കാൻ ട്വിറ്റർ തീരുമാനിച്ചിട്ടുണ്ട്. 2022 നവംബറിൽ ട്വിറ്റർ ജീവനക്കാർക്ക് 32,000 രൂപയ്ക്ക് ഉച്ചഭക്ഷണം നൽകിയെന്ന് മസ്ക് പറഞ്ഞു. എന്നാൽ മസ്ക് കള്ളം പറയുകയാണെന്നാണ് ഒരു മുൻ ജീവനക്കാരന്റെ ആരോപണം, കമ്പനി ഓരോ ജീവനക്കാരനും പ്രതിദിനം 2000 രൂപയുടെ ഉച്ചഭക്ഷണമാണ് വാഗ്ദാനം ചെയ്തതെന്നും ഇയാൾ ചൂണ്ടിക്കാട്ടി.
