ആധാർ -വോട്ടർ ഐ.ഡി ലിങ്കിങ് ജില്ലയിൽ 50% പൂർത്തിയായതായി ജില്ലാ ഇലക്ഷൻ ഓഫീസർ അറിയിച്ചു. ആകെയുള്ള 2519755 വോട്ടർമാരിൽ 1260728 വോട്ടർമാർ ലിങ്കിങ് പൂർത്തീകരിച്ചു. ലിങ്കിങ് പൂർത്തീകരിക്കാൻ ബാക്കിയുള്ളവർക്കായി നവംബർ 12 , 13 തിയ്യതികളിൽ എല്ലാ ബൂത്തുകളിലും മെഗാ ക്യാമ്പുകൾ നടത്തും. വോട്ടർമാർ വോട്ടർ ഐ.ഡി നമ്പർ, ആധാർ നമ്പർ, മൊബൈൽ നമ്പർ എന്നിവയുമായി അവരവരുടെ ബൂത്തുകളിൽ എത്തിച്ചേരണം. കൂടുതൽ വിവരങ്ങൾക്ക് ബൂത്ത് ലെവൽ ഓഫീസർമാരുമായി ബന്ധപ്പെടാം.
പ്രത്യേക സംക്ഷിപ്ത വോട്ടർ പട്ടിക പുതുക്കൽ യജ്ഞം – 2023 ന്റെ ഭാഗമായി കരട് വോട്ടർ പട്ടിക നവംബർ 9 ന് പ്രസിദ്ധീകരിച്ചിട്ടുണ്ട്. പട്ടികയുമായി ബന്ധപ്പെട്ട് പരാതികൾ ഫയൽ ചെയ്യുന്നതിന് ഡിസംബർ 9 വരെ സമയം അനുവദിച്ചിട്ടുണ്ട്. പരാതികൾ ഉള്ളവർക്ക് ബന്ധപ്പെട്ട ഇലക്ടറൽ രജിസ്ട്രേഷൻ ഓഫീസർ, തഹസിൽദാർ എന്നിവർ മുമ്പാകെ അപേക്ഷ സമർപ്പിക്കാം. ഡിസംബർ 22 നകം പരാതികൾ പരിഹരിച്ച് അന്തിമ വോട്ടർ പട്ടിക 2023 ജനുവരി അഞ്ചിന് പ്രസിദ്ധീകരിക്കുമെന്നും ഇലക്ഷൻ ഓഫീസർ അറിയിച്ചു.
