കൊളംബോ: ചൈനീസ് ചാരക്കപ്പല് സമാധാനത്തിന്റെയും സൗഹൃദത്തിന്റെയും ദൗത്യത്തിലാണെന്ന് ക്യാപ്റ്റന് ഷാങ് ഹോങ്വാങ് . ചൈനയുടെ ബാലിസ്റ്റിക് മിസൈല്, ഉപഗ്രഹ ട്രാക്കിങ് കപ്പല് ”യുവാന് വാങ്-5” ശ്രീലങ്കന് തുറമുഖമായ ഹമ്പന്തോട്ടയില് 16/08/220ചൊവ്വാഴ്ചയാണ് എത്തിയത്. ഇന്ത്യ കടുത്ത എതിര്പ്പിനിടെ എത്തിയ കപ്പല് ഈ മാസം 22 വരെ ഇവിടെ തുടരും. കഴിഞ്ഞ 11 നു കപ്പല് തുറമുഖത്ത് എത്തുമെന്ന് ആദ്യം നിശ്ചയിച്ചിരുന്നെങ്കിലും ശ്രീലങ്കന് അധികൃതരുടെ അനുമതി ലഭിക്കാത്തതിനാല് യാത്ര വൈകി.
”യുവാന് വാങ്-5 സമാധാനത്തിന്റെയും സൗഹൃദത്തിന്റെയും ദൗത്യത്തിലാണ്. ബഹുരാഷ്ട്ര കപ്പലുകളെ ഉള്ക്കൊള്ളുന്ന ഒരു രാജ്യാന്തര തുറമുഖമെന്ന നിലയില്, രാജ്യാന്തര പരിശീലനത്തിന് അനുസൃതമായി ഞങ്ങള്ക്ക് ആവശ്യമായ കപ്പല് സാമഗ്രികള് ഹമ്പന്തോട്ട തുറമുഖം നല്കും”- ക്യാപ്റ്റന് ഷാങ് ഹോങ്വാങ് പറഞ്ഞു.
”കപ്പലിന്റെ സന്ദര്ശനം, ബഹിരാകാശ ശാസ്ത്ര സാങ്കേതിക മേഖലയില് ചൈനയും ശ്രീലങ്കയും തമ്മിലുള്ള കൈമാറ്റം വര്ദ്ധിപ്പിക്കുമെന്നും ഇരു രാജ്യങ്ങളുടെയും ബഹിരാകാശ വ്യവസായത്തിന്റെ പൊതുവായ പുരോഗതി പ്രോത്സാഹിപ്പിക്കുമെന്നും ഞങ്ങള് വിശ്വസിക്കുന്നു. ഇരു രാജ്യങ്ങളിലെയും ആളുകള് തമ്മിലുള്ള സൗഹൃദം കൂടുതല് വളര്ത്തിയെടുക്കും” അദ്ദേഹം കൂട്ടിച്ചേര്ത്തു.
ഇന്ത്യ ആശങ്ക പ്രകടിപ്പിച്ചതിനെത്തുടര്ന്നു ”യുവാന് വാങ്-5” യാത്ര വിവാദത്തിലായി. കപ്പലിന്റെ സാങ്കേതിക ശേഷിയും സന്ദര്ശനത്തിന്റെ ഉദ്ദേശ്യവും സംബന്ധിച്ച് ഇന്ത്യ സുരക്ഷാ ആശങ്കകള് ഉദ്ധരിച്ചതായി പ്രാദേശിക ഉദ്യോഗസ്ഥര് പറഞ്ഞു. കപ്പലിന്റെ ട്രാക്കിങ് സംവിധാനങ്ങള് ഉപയോഗിച്ച് പ്രതിരോധ, ബഹിരാകാശ സംവിധാനങ്ങളില് ചൈന ഒളിഞ്ഞുനോക്കാന് ശ്രമിക്കുമെന്നാണ് ഇന്ത്യയുടെ ആശങ്ക.
