തിരുവനന്തപുരം: സില്വര്ലൈന് പദ്ധതിക്കെതിരെ ഉയരുന്ന പ്രതിഷേധങ്ങള് മന്ത്രിസഭാ യോഗത്തില് ചര്ച്ചയാകും.
പ്രതിഷേധം ശക്തമാകുന്നതും പ്രതിപക്ഷം സില്വര്ലൈന് വലിയ രാഷ്ട്രീയ വിഷയമായി ഉയര്ത്തുന്നതും മന്ത്രിസഭാ യോഗം വിശദമായി ചര്ച്ച ചെയ്യും. പ്രതിഷേധത്തെ പ്രതിരോധിക്കാന് വ്യാപകമായ പ്രചാരണം നടത്താന് നേരത്തെ സിപിഐഎം തീരുമാനിച്ചിരുന്നു. പദ്ധതിയില് നിന്ന് പിന്നോട്ടില്ലെന്ന് സര്ക്കാര് ഇതിനോടകം നിലപാടെടുത്തിട്ടുണ്ട്. ഈ പശ്ചാത്തലത്തില് ഇനി എങ്ങനെ മുന്നോട്ടുപോകണമെന്നത് സംബന്ധിച്ച തീരുമാനങ്ങളാകും കൈക്കൊള്ളുക.
നഷ്ടപരിഹാരം നല്കിയ ശേഷം മാത്രമേ സില്വര്ലൈന് പദ്ധതിക്കായി ജനങ്ങളില് നിന്നും ഭൂമി ഏറ്റെടുക്കൂവെന്ന് സിപിഐഎം സംസ്ഥാന സെക്രട്ടറി കോടിയേരി ബാലകൃഷ്ണന് വ്യക്തമാക്കിയിരുന്നു. സില്വര്ലൈനില് നിന്ന് പിന്നോട്ടില്ലെന്നാണ് സിപിഐഎം ഊന്നിപ്പറയുന്നത്. പ്രതിഷേധക്കാര് കല്ല് പിഴുതെടുത്താലും വേറെയും കല്ലുകിട്ടുമെന്നും കല്ലിന് ക്ഷാമമില്ലെന്നും കോടയേരി പരിഹാസമുയര്ത്തി. കളക്ട്രേറ്റിനുള്ളിലും സെക്രട്ടറിയേറ്റിനുള്ളിലും കയറി കല്ലിടുന്നു. ഇതെല്ലാം തല്ല് കിട്ടേണ്ട സമരരീതിയാണെന്നും പക്ഷേ പൊലീസ് സംയമനം പാലിച്ചെന്നും കോടിയേരി ബാലകൃഷ്ണന് പറഞ്ഞിരുന്നു.
