കൊച്ചി: സംപ്രേഷണ വിലക്ക് ശരിവെച്ച ഹൈക്കോടതി സിംഗിള് ബെഞ്ച് വിധിക്കെതിരെ അപ്പീല് നല്കി മീഡിയവണ്. ഹൈക്കോടതി ഡിവിഷന് ബെഞ്ചിലാണ് അപ്പീല് നല്കിയത്. അപ്പീലില് വ്യാഴാഴ്ച വാദം കേള്ക്കും.
മീഡിയാവണിന്റെ സംപ്രേക്ഷണ ലൈസന്സ് റദ്ദാക്കിയ ഇന്ഫര്മേഷന് ആന്ഡ് ബ്രോഡ്കാസ്റ്റിംഗ് മന്ത്രാലയത്തിന്റെ ഉത്തരവ് കേരള ഹൈക്കോടതി കഴിഞ്ഞ ദിവസമാണ് ശരിവെച്ചത്. ഇന്റലിജന്സ് റിപ്പോര്ട്ടിന്റെ അടിസ്ഥാനത്തിലാണ് കേന്ദ്രം ചാനലിന് വിലക്ക് പ്രഖ്യാപിച്ചതെന്നാണ് കോടതി ചൂണ്ടിക്കാട്ടിയത്.
നിലവില് ചാനല് സംപ്രേക്ഷണം നിര്ത്തിയിരിക്കുകയാണ്. നിയമ നടപടിയുമായി മുന്നോട്ട് പോകുമെന്നാണ് മീഡിയാവണ് മാനേജ്മെന്റ് അറിയിച്ചിരുന്നു.
മീഡിയാവണ് ചാനല് ഉടമകളായ മാധ്യമം ബ്രോഡ്കാസ്റ്റിംഗ് ലിമിറ്റഡ് നല്കിയ ഹരജിയിലാണ് ജസ്റ്റിസ് എന്. നരേഷ് കഴിഞ്ഞ ദിവസം വിധി പറഞ്ഞത്.
ചാനല് ചട്ടവിരുദ്ധമായി പ്രവര്ത്തിച്ചിട്ടില്ലെന്നും അനുമതി നിഷേധിച്ച കേന്ദ്ര സര്ക്കാര് നടപടി നിയമ വിരുദ്ധമാണെന്നുമാണ് മീഡിയാവണ് അഭിഭാഷകന് കോടതിയെ അറിയിച്ചിരുന്നത്.
